Malesanan cronico afectando Aruba den forma grave

E malesanan cronico ta forma un problema hopi mas grandi pa Aruba y su sistema di salud cu ta mustra cu nos pais ta consciente di dje.

Esaki por conclui for di un alinea cortico den analisis di desaroyo social na Aruba cual Departamento di Asuntonan Social a haci y converti den un rapport profundo. E cifranan no ta nobo pero nan ta poco conoci. E nivel di mortalidad na Aruba causa pa malesanan cronico na 2000 ya a surpasa esun proyecta pa e paisnan di OECD na 2020 cu 50%. E trendo aki ta keda y asina no ta sostenibel pa nos sistema di salud, segun e rapport.

Aruba ta afecta pa malesanan cronico di diabetes y cardiovascular. Punto interesante ta cu diabetes hopi biaha tambe ta causa e malesanan cardiovascular y tambe cancer.   Pero den e estadisticonan di diabetes no ta tene cuenta cu esaki, siguramente ora di determina e mortalidad. Esaki ta algo cu no ta specificamente un problema aki na Aruba pero internacionalmente. Un investigacion a sali afo cu si analisa e malesanan cronico mundialmente mas profundo, lo mira cu pa hopi paisnan diabetes ta e causa di morto number 1. Banda di esaki hopi hende no sa cu tin un relacion tambe entre diabetes cu cancer.

Mescos cu otro paisnan Aruba ta purba di conscientisa pueblo pa preveni malesanan cronico. Tambe tin politiconan cu ta sugeri cu mester bin cu un ‘sugartax’ of otro medidanan pa asina pone mas presion riba e fabricantenan di productonan pa baha e cantidad di sucu of salo. Pero nos por mira cu sigur den e sector di restaurant unda mas y mas hende ta busca nan cuminda pa hiba, no hopi movecion pa uza menos sucu, salo of vet den e cuminda.