Den e tempo nos dilanti na varios ocasion e tema di ‘indexering’ di salario di empleado publico lo bin dilanti. Cada partido den e asunto lo conta nan parti di e storia y finalmente ta na cada un di nos pa kere esun cu nan kier kere. Esey no tin ningun sentido si nos no añadi e ‘hard facts’ cu mester acompaña cualkier evaluacion serio pa por opina cu un base. Un intento pa pone esaki nos dilanti.

Mester bisa cu desde semper, y esey lo keda asina tambe, lo tin lucha pa mas salario, pa loke ta gobernacion un lucha hiba a traves di sindicato. Den e caso di gobernacion ta miho nos papia di ‘sindicatonan’ pasobra e tempo cu tabatin un sindicato pa empleado publico ta leu nos tras y no lo bolbe mas. Esey no ta haci e complicacion menos pa cualkier gobierno, cu ora sinta cu sindicato ta trata di henter un bateria di representante, tur cu nan ‘issues’ y nan ‘dolornan’ particular. Esey no ta haci negocia mas facil, pero en fin, lo mester custumbra cu esey.

Mas dificil ainda ta e idea cu indexering a bira un derecho di empleado publico. Esey no ta skirbi ningun caminda pero tur gobierno te awe no a haci tanto esfuerzo pa kita e impresion ey. Naturalmente mester ta asina cu cualkier gobierno tin e responsabilidad di percura pa su empleadonan tin un salario digno, di cual nan mester por biba. Esey ta importante tambe for di e punto di vista cu, si bo kier pa bo empleadonan ta integro y confiable, pa nan no cuminsa pidi o tuma placa di cliente pa aumenta nan entrada, anto lo mester percura pa cumpli cu e exigencia di mantene salario na nivel aceptable. Mester remarca si cu e relacion cu corupcion ta relativo, den e sentido cu hende no ta bira corupto asina lihe pa necesidad, mas bien pa no tin e norma y balornan necesario pa comporta nan mes corectamente. Pa splica un tiki mas: hopi biaha ta esnan den posicion halto, unda por tuma decision, ta resulta di ta corupto. No necesariamente e subalterno cu un salario chikito ta bira corupto, a pesar cu e por haci bon uso di e placa, aunke naturalmente tin excepcion.

Tur gobierno mester actua segun e realidad di e pais ta indica. Un pais mas prospero lo percura pa su empleadonan publico tambe tin un nivel di bida mas cu adecuado. Kico esey ta significa pa Aruba, concretamente? Ultimo biaha cu a haci un estudio amplio di e asunto aki tabata mas di 10 aña pasa, cu a culmina den e rapport di National Commission on Publica Finance (NCPF; 2007). Conclusion: e nivel di pago di Aruba su empleadonan publico ta hopi mas halto cu e resto di e region. Cu esaki ta bisando cu di e momento ey mester pone tur deseo o exigencia di empleadonan publico un banda? No, pero e ta sirbi si di contexto cu ta relativa e exigencia di compensacion di cualkier aumento di costo di bida segun e indicador CPI calcula pa CBS.

Ademas, y esey a bin dilanti den e articulo di un parlamentario di e fraccion mas grandi cu ta sostene gobierno, cu a aparece den nos edicion di ayera, cu ademas gobierno anterior, como contraprestacion pa bay di acuerdo cu e cambionan den e sistema di APFA na 2014, a acorda un aumento gradual di e salarionan, mediante e aumento di diferente premie cu – lamentablemente – a surgi den e sistema di compensacion pa empleado publico. E acuerdo aki ta core di 2014 te 2024 y ta caba un peso grandi pa cualkier partido cu ta gobernando actualmente.

Nos ta bisa ‘lamentable’ pasobra e sistema, cu su diferente premienan ta bira mas dificil pa maneha, aparte di e famoso ATV-dagen cu ta haci cu e empleado publico tin un schedule anual di dia liber cu ta monstruoso compara cu sector priva. Conta acerca cu e empleado publico ta keda cas tres biaha mas hopi pa enfermedad y nos a suma un cantidad di tema cu lo mester discuti tambe, no papia di placa so.

Riba tur esaki ta bin e realidad cu no tin placa. Nos no ta bisa esaki pa defende gobierno, nan ta bon capaz pa defende nan propio causa, sino pasobra esey ta e berdad sunu di awe. Si haci e pregunta si por cambia e realidad aki, mester bisa si, pero e ta rekeri cu cierto cos mester cambia. Ta indispensable pa gobierno baha e cantidad di empleado cu e tin, pa por paga loke keda miho ora yega momento cu esey ta hustifica. Sindicatonan cu ta kere cu por keda aumenta gasto di payroll sin restructura aparato publico, ta bibando den nan propio ‘bubble’. Gobierno tambe sa esey pero no ta mustrando te awe tanto gana pa cuminsa atende e problema grandi aki. Y cu e gastonan di personal en total na Afl. 735 miyon pa 2019, contando acerca Staten, Raad van Advies, Algemene Rekenkamer, DOW y sector subsidia, cu ta mas di 50% di gasto total di gobierno,y no e Afl. 479 miyon parcial cu ta discuti cu CAft, no tin espacio pa wega politico, ni di gobierno, ni di sindicato.

 

LEAVE A REPLY

Please enter your comment!
Please enter your name here