(TimesOfIndia) – Awe, dia 15 di augustus, India ta celebrando 75 aña di Independencia. Pueblo Indio ta duna honor ta tur lider cu a lucha cu curashi pa libertad di nan nacion den pasado. Riba Dia di Independencia 2022, prome minister di India ta bay hisa e bandera tricolor na e Red Fort, Old Delhi. Tambe e ta bay duna un discurso na e nacion.

Sinembargo, e aña aki no ta bay conta cu tur programa cultural y celebracion na scolnan, pa motibo di e pandemia di Covid-19. Dia di Independencia di India, esta dia 15 di augustus, ta declara como un dia festivo nacional, loke ta nifica cu tur oficina di gobierno, post, banco y tienda ta cera.

Kico ta e historia di Dia di Independencia?

Pa hopi aña, India tabata bao control di e Raj Britanico. E East India Company a goberna India pa alrededor di 100 aña. Tabata na 1757 cu East India Company a gana e bataya di Plassey. Tabata despues di e victoria aki cu e Compania a cuminsa eherce su poder riba India. E nacion tabatin su rebelion contra e gobernacion exterior pa prome biaha na 1957. Henter e pais a uni contra poder Britanico. Tabata un evento desafortuna, ya cu India a keda derota e tempo ey, pero despues di esey, gobernacion di India a wordo pasa na e Britaniconan, cu a goberna e pais te na momento cu India a obtene su independencia.

E pais a enfrenta un campaña largo pa obtene independencia.

Gran Bretaña a cuminsa debilita despues di e dos guera mundial, y India finalmente a haya su libertad. E lucha di India pa libertad semper a keda como un inspiracion pa mundo henter, ya cu e tabata e campaña menos violento na mundo.

Kico ta significado di Dia di Independencia?
 E dia aki ta recorda e pueblo Indio di tur sacrificio cu esnan cu a lucha pa libertad mester a haci pa asina libera India for di control Britanico. Dia 15 di augustus ta un dia festivo nacional cu ta wordo celebra hisando bandera, cu parada y cu eventonan cultural.

Kico ta algun hechonan interesante tocante India?

India ta yama pa e riu Indus.

India ta e democracia mas grandi na mundo.

India a yega di tin 14 Prome Minister, entre cual un tabata un hende muhe, Indira Ghandi.

India a yega di tin 13 presidente full-time, di cual solamente uno tabata un hende muhe, Pratibha Patil.

E bandera nacional di India a keda diseña pa Pingali Venkayya, kende tabata un di e luchadornan pa libertad y tambe agricultor na Andhra Pradesh.
Animal nacional di India ta e tiger. E himno nacional di India a keda adopta tres aña despues di independencia.

Mahatma Ghandi no a celebra e prome Dia di Independencia na Delhi. Gandhi, e tata di e nacion, tabata den ayuno na Bengal pa pone paro na e violencia Hindu-Musulman, e tabata den welga di hamber na Kolkata, leu di e celebracionnan di independencia na Delhi. Gandhi tabata preocupa y trahando duro pa stop e violencia resultado di e division. El a declara: “Pa mi, paz entre Hindu y Musulman ta mas esencial cu e proclamacion di independencia.”

Con ta celebra Dia di Independencia?

Riba e dia aki ta canta e himno nacional, tambe tin ceremonia di hisa bandera y ehercicionan militar rond di e pais na diferente institucion, hogar y sociedad. Indionan ta haci un esfuerso pa bisti den e colornan di e bandera pa celebra nan nacion y cultura. Bula fli ta otro tradicion cu ta sigui durante dia di Independencia, cu participacion di tur grupo di edad. E ta representa e libertad cu a logra riba e dia aki.

Na ki ora ta celebra Dia di Independencia?
 India a gana su independencia dia 15 di augustus 1947 pa mey anochi. E prome Prome Minister di e pais, Jawaharlal Nehru, a duna un discurso bunita cuminsando cu e palabranan “Marcando e ora di mey anochi, mientras mundo ta drumi, India ta lanta pa bida libertad”. Desafortunadamente, mientras India a gana independencia, el a keda dividi den dos pais, India y Pakistan. Pakistan ta celebra su Dia di Independencia riba 14 di augustus na lugar di 15 di augustus.