Organisacion Espacial di India ta examinando e fayo tecnico cu a hiba na aborto di e lansamento dialuna di un astronave cu intencion di aterisa den e banda leu di luna, segun un oficial a bisa.
E mision Chandrayaan-2 a keda aborta poco prome cu despega dialuna trempan pa e Organisacion di Investigacion Espacial di India (ISRO pa su siglanan den Ingles) ora cu un a observa un ‘fayo tecnico’ den e launcher.
Vivek Singh, director di media di ISRO, a bisa cu e organisacion mester por scoge un fecha nobo pa e lansamento dentro di algun dia. El a nenga di bay den detaye.
Chandrayaan, e palabra den Sanskrit pa ‘nave lunar’, ta diseña pa un aterisahe suave riba e polo sur di luna y pa manda un rover pa explora deposito di awa, confirma pa un mision espacial di orbita anterior.
Pallava Bagla, editor di ciencia pa e canal noticiero New Delhi, a bisa cu e fecha pa lansamento mester cumpli cu cierto criteria tecnico, y lo por dura algun siman of luna pa un fecha nobo. Tambe el a bisa riba su canal cu e raket y satellite tabata sigur, y cu e hidrogeno y oxigeno likido a ser retira for di e raket. E detayenan completo di kico a bay fout lo ta disponibel ora e cientificonan por haya acceso na e racket y despues cu realisa un evaluacion completo, el a bisa.
Dr. K. Sivan, presidente di ISRO, a bisa siman pasa cu como e mision Chandrayaan-2 na balor di $140 miyon ta e mas prestigioso di e pais te awo, den parti pa motibo di e complehidad tecnico di un aterisahe suave riba superficie lunar – un evento cu el a describi como ’15 minuut di teror’.
Si India lo a logra e aterisahe suave, lo ta apenas e di cuater pais pa logra esaki, despues di Merca, Rusia y China.
