Ayera India a lansa regulacionnan nobo pa companianan di rednan social y website di streaming digital pa haci nan mas responsabel pa e contenido online comparti riba nan plataforma, dunando gobierno mas poder pa controla esaki.
Ministerio di Tecnologia di Informacion a bisa cu e regulacionnan nobo lo rekeri pa plataformanan di rednan social manera Facebook y Twitter rapidamente elimina contenido cu autoridadnan considera ta contra ley. E regulacionnan ta inclui un mecanismo di supervision estricto cu lo permiti gobierno prohibi contenido afectando ‘e soberania y integridad di India’.
E regulacionnan tambe lo rekeri pa companianan di rednan social asisti investigacionnan di agencianan di cumplimento di ley Indio. Nan a keda anuncia mientras debate ta andando tocante libertad di expresion y e suspension di Twitter di algun cuenta Indio vincula na protesta agricultor despues cu reguladonan a duna orden pa blokea esakinan.
Minister di Tecnologia di Informacion, Ravi Shankar Prasad a bisa cu e regulacionnan nobo tabata ‘un mecanismo institucional progresivo suave’, rekeri pa ‘seguridad y soberania di India, orden publico, y violacion of cualkier otro material sexualmente explicito’.
Nan lor ekeri companianan di rednan social elimina contenido ilegal lo mas lihe posibel, pero dentro di no mas cu 36 ora despues cu nan ricibi un orden legal of di gobierno.
E reglanan nobo tambe ta rekeri companianan di rednan social nombra loke gobierno ta yama ‘chief compliance officer’ y ‘chief grievance officer’ pa trata kehonan di agencianan di cumplimento di ley. E agentenan aki mester ta ciudadano Indio y mester duna reportenan di cumplimento mensual na gobierno.
“Gobierno ta ricibi critica di gobierno y e derecho na disidencia, pero ta hopi importante pa usuarionan ricibi un forum pa expresa nan keho contra abuso y maluso di rednan soial”, Prasad a bisa durante un conferencia di prensa riba television.
Website di rednan social tambe mester revela na gobierno e fuente original di cualkier ‘informacion malo’. No a keda inmediatamente cla si esaki ta nifica plataformanan di mensahe manera WhatsApp, Signal y otronan lo mester kibra end-to-end encryption an India pa por cumpli.
Apar Gupta, director ehecutivo di India Freedom Foundation, un grupo defensor di derechonan digital, a bisa cu gobierno pidiendo plataformanan di rednan social pa duna detaye tocante e origen di informacion ‘ta socava derechonan di usuario y por conduci na auto-censura si usuarionan tin miedo cu nan combersacionnan no ta priva mas’.
E regulacionnan nobo mester drenta na vigor dentro di tres luna. Tambe lo aplica na plataformanan di streaming digital, manera Netflix y Amazon Prime, cu lo mester pone un ‘rating di clasificacion’ pa describi e contenido riba nan plataforma.
Twitter a haya su mes den un enfrentamento cu gobierno e luna aki, na momento cu a nenga di cumpli completamente cu un orden di gobierno pa elimina algun cuenta, incluyendo esnan di organisacion noticiero, periodista, activista y politico, citando su ‘principionan pa defende discurso protegi y libertad di expresion’.
Gobierno a bisa cu e cuentanan – un cantidad no specifica – tabata usando hashtag provocativo pa plama desinformacion tocante protestanan masivo di agricultornan cu a sacudi gobierno di prome minister Narendra Modi.
A parce cu accionnan di Twitter a pone gobierno di Modi rabia, cu durante añanan a busca pa reforsa su control di rednan social, particularmente Twitter y Facebook. A sirbi Twitter un aviso di no-cumplimento y a menasa su oficialnan cu un boet y prison di hasta shete aña pa violacion di e orden.
Modi su mes tin un cuenta activo riba Twitter, @narendramodi, cu mas di 66 miyon siguido.
