(AFP)—Critica contra plannan di Merca pa un ehecucion publico pa peloton di fusilamento militar a aumenta diabierna, mientras Vice-presidente JD Vance a expresa duda si e ehecucion realmente lo ser transmiti en vivo manera a propone, y a insisti cu e no lo wak e transmision si esaki sucede.
E ehecucion di Nidal Hasan, planea pa dia 3 di december na Fort Hood, Texas, unda el a mata 13 hende cu tiro na 2009, lo ta e prome ehecucion pa peloton di fusilamento militar di Merca desde 1945.
Ora periodistanan a puntra Vance tocante e transmision en vivo planea, el a bisa cu e no “sa si di berdad esaki lo sucede”.
“Esaki ta un homber cu, den mi opinion, a comete e atake terorista mas malo riba teritorio Mericano despues di 9/11,” Vance a bisa. Pero el a agrega cu si e ehecucion keda transmiti en vivo, “mi no lo wak e transmision”.
Representante Austin Scott di Partido Republicano di Presidente Donald Trump a bisa cu e ta sostene ehecucion di Hasan, pero “transmiti ehecucionnan en vivo ta algo cu jihadistanan ta haci. Merca ta mihor cu esey”.
Senador Mark Kelly, un Democrata cu ta miembro di Comite di Servicionan Arma di Senado, a bisa cu Hasan mester “enfrenta husticia”, pero cu ehecucionnan publico ta “e tipo di cos cu Iran y Taliban ta haci. Ta cu nan nos kier ta asocia?”
Un funcionario di Pentagono a confirma na AFP diahuebs cu e ehecucion lo ser transmiti en vivo, despues cu Secretario di Defensa Mericano Pete Hegseth a bisa: “Nos lo percura pa hende por wak e ehecucion, pa e ta publico.”
Pero Trump a contradeci e confirmacion di Hegseth diabierna, bisando cu ainda no a tuma un decision si e ehecucion lo ser transmiti publicamente, aunke e ta sostene e ehecucion. “Nan ta determinando esey, pero lo mat’e,” Trump a bisa. “Di berdad no ta importa mi con e ta muri, mientras cu e muri.”
Companianan tecnologico YouTube, Meta y X no a responde inmediatamente na peticionnan pa comentario tocante si nan lo permiti transmision di e ehecucion riba nan plataformanan. TikTok a referi AFP na su politica cu ta prohibi imagennan di “incidentenan grafico y violencia”, incluyendo “tiramento di un persona”.
Alto Comisionado di Nacionnan Uni pa Derecho Humano a condena e plan, bisando den un mensahe manda na AFP diabierna cu “transmiti un ehecucion en vivo ta ekivalente na un ehecucion publico y lo viola e prohibicion absoluto di tortura”.
Arsobispo Paul Coakley, presidente di Conferencia di Obisponan Catolico di Merca, a bisa cu esaki ta un “promocion barbarico di un cultura di morto y mester ser reconsidera”.
