Na Centro di Bario Playa P’bao y na YMCA na San Nicolas anochinan di informacion importante a tuma luga pa informa mayornan y familiarnan cu tin muchanan special di un proposicion pa cambio di un ley cu por bira un sosten importante pa nan. Na ambos anochi di informacion hopi mayor y profesionalnan den e area di cuido y educacion di muchanan special a atende. Mayornan a duna testimonionan conmovedor di e retonan grandi cu nan tin pa duna nan yiunan special e maximo oportunidad pa desaroya y alcansa un calidad di vida digno.

Na September e lider di fraccion di AVP, mr. Mike Eman y su colega drs. Mervin Wyatt Ras a presenta un proposicion pa cambia e ley cu ta regla ayudo dinanciero, esta Landsbesluit Bijstandverlening. Colega di partido hurista Wendrick Cicilia tambe a contribui na e proyecto aki. E iniciativa di ley aki ta pa mayornan di muchanan bou di 16 aña tambe por bini na remarca pa ayudo aki. Awor aki e ley ta duna e posibilidad solamente pa un persona riba e edad di 16 aña.

E proposicion di Eman-Wyatt-Ras ta pa mayornan di muchanan bao di 16 aña tambe bin na remarca. Durante e anochinan aki e miembronan di Parlamento a splica con nan proposicion ta hinca den otro y a scucha di mayornan riba e gastonan adicional cu nan tin. E suma di e ayudo financiero, segun e proposicion di Eman/Wyatt-Ras, mester ta mescos cu e suma actual pa ayudo financiero pa hende cu handicap den articulo 8 di e ley. Esta Afl. 950,=. Loke ta determina e suma di e ayudo financiero aki ta cu mester tin gastonan necesario cu ta resulta for di e condicion special individual di e mucha special. Pesey tabata hopi importante pa scucha di mayornan.

Mayornan a conta cu nan ta pasa tempo dificil desde cu nan yiu nace. Tin cu a trece dilanti cu nan yiu ta come cuminda special hasta via sonde, cu pa luna ta suma mas o menos 800 florin. Ta haya falta di ayudo mas tempran. Mayornan cu yiunan autista, cu retonan fysico y mental no por laga nan yiu cu niun hende, no por traha, ta haya stress. E mucha cu tin cu siña come, papia y move tin cu paga alrededor di 150 florin cada biaha cu haya logopedie of fysiotherapie y otro tipo di terapia nan. Pa test tin un wachtlijst largo. Ora e mucha bira mas grandi ergo therapie, behavioral therapy y sensori stimulating therapy y products no ta ser cubri. Ta haci falta un revalidatiearts.

Tambe e parlamentarionan Eman y Wyatt-Ras por a constata e necesidad pa mas trahado social, fysiotherapie na scol y otro profesionalnan na e scolnan mes. Si mayornan ke manda nan yiu un les special esey ta dificil y hasta pa bay scol tin cu paga pa dia den caso e mucha ta den rolstoel. Transportacion special tambe ta un gasto adicional pa e famianan. Otro necesidad cu no ta ser cubri ta pampers, wipes, cama special, weight blanket, tillift of lift pa banjo/auto, rollator, stroller special, rolstoel, rampa pa bay scol y otro facilidadnan. Hopi ta e gastonan cu mayornan tin cu no tin ayudo pe awor. Na final di ambos anochi parlamentarionan Eman y Wyatt-Ras a keda mas convenci ainda di e necesidad grandi pa nan proposicion di ayudo financiero pa famianan cu muchanan special bira un realidad mas pronto posibel.

LEAVE A REPLY

Please enter your comment!
Please enter your name here