Diaranson ultimo 24 di november SKOA a haci un actividad cu e crèchenan pa trece dilanti informacion importante tocante inscripcion pa aña escolar 2022-2023. Un dia unico, ya cu ta e prome biaha cu nan a haci e actividad aki.
Asina a anuncia Anuesca Baly, director di SKOA na Bon Dia Aruba. El a splica cu nan a acerca tur e crèchenan pa nan duna informacion primordial tocante inscripcion cu ta bay cuminsa dia 1 di december pa kleuterschool, pa asina mayornan por inscribi na yiunan.
Nan a bisa cu esaki ta bay tuma luga via online via nan website www.skoa.aw. Tambe nan a splica na e doñonan di crèchenan kico ta wordo haci den etapa di kleuterschool, pa motibo cu SKOA kier yega na un punto caminda e crèchenan sa kico nan ta haci y kico e crèchenan mes ta haci pa nan tin un miho concordancia y miho colaboracion cu otro.
“E tabata un atardi hopi ameno y por consider’e como un fructifero, aunke tabata e prome biaha pa tur partido, tanto pa SKOA como pa e crèchenan, na unda cu nos a haya tipnan cu nos tambe por tuma na cuenta . Nos lo kier sigui cu e tipo de encuentronan aki caminda nos ta duna informacion”, Baly a menciona.
E reunion aki a conta cu aproximadamente 40 crèche cu a asisti, cu aworaki nan sa kico mester tene na cuenta cune pa e siguiente biaha. Ademas Baly a sigura cu “e encuentronan aki lo bay ripiti den futuro” pa asina por trece dilanti informacion valioso, pa motibo cu esaki ta parti di obligacion di SKOA como un instancia di educacion grandi manera nan ta, esta duna informacion na tur banda, tanto di mayornan como otro stakeholders.
Den ultimo lunanan a keda conoci cu gobierno ta bin haciendo mas control den e crèchenan pa nan por mehora nan servicio, lo cual muchanan mester siña den e linea di desaroyo, pero tambe e reglanan di un crèche. Na e momentonan aki diferente crèchenan ta habri y no tin control riba lo cual e muchanan ta haya eynan, siendo cu tin partinan cu ta forma parti di kleuterschool, parti di crèche y parti di scol basico.
“Den un crèche bo no por siña por ehemplo pa skirbi, pasobra e mucha ta cuminsa siña skirbi ora e ta bay scol basico. Ni na un kleuterschool nan ta cuminsa skirbi pasobra cada cos tin nan momento y nan temporada den area di desaroyo. Esey ta e cosnan cu gobierno lo kier haci ”, Baly a expresa.
Tambe el a destaca cu ta importante pa mayornan tin conocemento cu muchanan cu ta cumpli 4 aña ta esunnan cu tin cu cuminsa bay pa kleuterschool. Den comunidad tin algun informacion robes na unda cierto mayornan ta warda te cu na yiu ta cumpli 5 aña pa inscribi nan den kleuterschool, siendo cu e informacion ey ta robes y yiu ta perdiendo un aña di enseñansa.
