Recientemente Inspectie Volksgezondheid Aruba a ricibi alrededor di 100 kwaliteitsjaarverslagen prome di juni. Esaki ta e prome aña cu tur dunadonan di cuido na Aruba mester entrega un kwaliteitsjaarverslag.
Den e comunicado ricibi di IVA, e ta un logro grandi pa a ricibi mas cu 50% di e kwaliteitsjaarverslagen riba 1 di juni 2018, despues di 9 luna di preparacion. Den e documento aki IVA ta pidi informacion di entre otro e maneho, incidentenan, kehonan cu a wordo entrega, protocol y proceduranan di un practica y/of institucion di cuido. Pa e Ley di Calidad di Cuido, e ultimo dia pa entrega e kwaliteitsjaarverslag tabata diabierna 1 di juni 2cu a pasa. Na final di e dia aki, IVA a ricibi alrededor di 100 documento di e 180 cu mester wordo entrega in total.
For di september 2017, IVA a cuminsa manda varios recordatorio y a tene diferente anochi di informacion. Pues, a sinta hunto cu e diferente dunadonan di cuido pa splica kico ta wordo spera di nan. Ademas a traha un documento standard cu e diferente componentenan cu mester tin den e verslag y a manda esaki pa tur dunadonan di cuido. Na e manera aki, nan lo por a yena e informacion necesario mas facil.
Como cu IVA ta profila su mes manera un organisacion pro activo y transparente, a haci’e un prioridad pa caba cu su propio jaarverslag riba 1 di juni tambe. Den e Jaarverslag 2017 di IVA por haya informacion di entre otro sondeonan haci, keho y calamidadnan ricibi den 2017 y desaroyonan interno.
E meta di IVA ta pa stimula mehoracion di e calidad di cuido na Aruba. Pa por haci esaki, e ta importante pa ricibi data concreto pa por midi e situacion actual y extrae cua puntonan mester di atencion e añanan venidero.
Un kwaliteitsjaarverslag no ta solamente importante pa IVA, pero muy specialmente pa e veld di cuido mes. Pa es motibo e diferente gruponan di cuido (p.e. partera, dokternan di cas, specialista etc.) lo haya conseho y recomendacionnan specifico a base di locual a wordo conclui di e contenido di e kwaliteitsjaarverslagen pa nan grupo di cuido. Pues, esaki lo ta e momento oportuno pa por siña di otro pa asina por keda mehora e calidad di cuido na Aruba. Tur esunnan cu no a entrega nan kwaliteitsjaarverslag riba 1 di juni 2018, por spera un waarschuwingsbrief riba 4 di juni 2018, e comunicado ta sigui bisa.
Un copia di e jaarverslag aki a wordo entrega na minister Dangui Oduber(MEP), tur dunadonan di cuido y e comision di Salud di parlamento. E jaarverslag aki lo wordo poni riba e website di IVA den e siman venidero.
