Instituto Biba Saludabel y Activo (IBiSA) a papia tocante e programa di deporte escolar pa e aña 2019/ 2020, tambe pa esunnan cu despues di deporte por participa den Olimpiada Escolar.

Aña pasa, Minister Dangui Oduber a introduci Olimpiada Escolar. Monique van Embden, director di IBiSA, ta splica cu nan a ripara cu aña pasa, e actividad tabata exitoso cu diferente deporte unda cu gran cantidad di mucha a participa.

E ta spera cu Olimpiada Escolar por motiva scolnan, docente, alumno y mayornan, pa nan percura cu aña escolar binidero nan por participa den actividad deportivo. “E team di IBiSA tin un periodo caba cu ta preparando”, el a bisa

Nan actividad lo tene cuenta cu espacio cu tin den e programa escolar fuera di nan actividad deportivo. Lo purba pa tene cuenta cu diferente scol, edad y brinda programa varia cu ta entusiasma e muchanan.

Pa nan ta importante cu mucha ta fanatico di un deporte manera futbol, pero nan kier entusiasma e mucha cu ta prefera deporte mas individual, manera atletismo. “Nos ta haci apelacion na tur scol y mucha pa participa. Nos ta haci esaki pa boso y ta spera cu tur hende por haci bon uzo di dje. Pa nan comparti cu nos feedback cu tin riba e programa cu a tuma luga y esun cu lo tuma pa tin oportunidad pa keda traha riba mehoracion y calidad di nos actividad”, el a expresa.

Hefe di Departamento di Deporte y Actividad Fisico, Edgar Erasmus, a duna un resumen di aña escolar 2018/ 2019 unda cu e re-introduci Olimpiada Escolar. Nan tabatin un total di 29 scol cu a participa den scol basico. Pa scol avansa, nan tabatin 11 scol.

Aña pasa tambe a introduci deporte den scol preparatorio, unda cu 6 scol a participa. “Nos a haya total di 46 scol cu a participa den deporte escolar. Nos structura pa locual ta e deporte ta pa haci cu tur scol haya un chens husto pa nan participa den forma di torneo y despues clasifica pa hunga den Olimpiada Escolar.”

Den Olimpiada nan tabatin 13 deporte, tambe a introduci crossfit, kids atletico, baile deportivo, landamento. Asina un total di 13 deporte cu mucha por competi. Nan ta contento cu presentacion di scol y esunnan cu aporta.

“IBiSA ta organisa y ta spera di haya cooperacion di scol pa participa pa haci evento aki bunita. E ta un proyecto despues di scol y tin reto pa e muchanan yega, pero a pesar di tur esey, e tabata tremendo”, Erasmus a expresa.

William Erasmus, hefe di departamento di desaroyo den deporte y hefe suplente di Edgar Erasmus, a splica cu lo uza e mesun sistema di registracion. Tambe sistema di con pa informa cada scol.

Nan tin e kalender cla pa kleuter, scol basico y secundario. Pa categoria di kleuter nan tin 4 deporte pa hunga den olimpiada. Den e kalender di scol basico y avansa nan tin deporte den team y individual.

Pa e parti di Olimpiada nan a introduci tres deporte, unda cu e tres deporte no mester clasifica pa participa. E scolnan cu kier sigui y participa ta haya e oportunidad pa asina duna tur hende un chens den e Olimpiada Escolar.

Nan lo manda un formulario di inscripcion y informacion pa e scolnan. Nan ta spera pa scol trece formulario bek pa nan. Cada mucha por scoge cua deporte nan kier participa pa e aña escolar. Den e formulario mester skirbi e persona di contacto, pa asina IBiSA por tin contacto cu nan. Ora di haya lista, nan lo prepara un schema. Prome cu esey nan lo bolbe manda un formulario na e mucha pa tin siguransa cu nan lo participa.

Tambe dia 20 y 21 di augustus proximo, dos coordinador di IBiSA lo atende scolnan pa entrega e lista. Nan lo percura pa tur scol haya esey. E siguiente siman nan lo pasa pa recoge formulario.

E kalender di deporte ta yen ‘di scol habri te cu scol cera’. E prome competencia ta di trefbal cu lo habri aña cune. Scol basico y kleuter lo ta 2:30pm despues di scol y pa scol avansa ta 3:00pm. “Nos ta comunica cu si mucha ta cana mas laat y e laga sa na tempo, nos por haci cambio. Spera cu docente, mayor cu kier nan yiu participa y mustra interes”, Erasmus a bisa.

 

LEAVE A REPLY

Please enter your comment!
Please enter your name here