E fluho di migrante Venezolano ta continua si no tin un solucion politico interno y Latinoamerica lo mester cooperacion internacional pa enfrenta un situacion sin precedente den e region, asina hefe di Acnur, Filippo Grandi a adverti na Santiago de Chile.

Alto Comisionado di Nacionnan Uni pa Refugiado (Acnur) ta bishita Chile, cu tin 400.000 Venezolano, y ta e tercer pais den ricibi cantidad di migrante y refugiado di Venezuela, pa reuni cu gobierno di Sebastian Piñera y ciudadanonan Venezolano, den un gira cu lo continua na Brasil.

“Mi no ta asina optimista” tocante futuro di e crisis migratorio di Venezuela, Grandia afirma, den un declaracion cortico na prensa, despues di reuni cu e canciyer Chileno, Teodoro Ribera.

“E fluho aki ta bay continua si no tin un solucion politico na Venezuela cu ta permiti cu e personanan ey ta bolbe pa nan pais,” e alto funcionario di Nacionnan Uni a añadi.

Grandi, cu ta e prome hefe di Acnur pa bishita Chile, a sigura cu e fluho di migrante den e region ta “esun mas importante na mundo” den ultimo decadanan y a yega na mas di cuatro miyon ciudadano di e pais ey cu a emigra den ultimo añanan.

Tambe e; a haci un yamada na comunidad internacional pa colabora cu un region cu “ a duna hopi den termino di recurso, pero cu mester di cooperacion y apoyo internacional di donante y institucionnan financiero pa comparti e responsabilidad di e acogida di e Venezolanonan.”

Canciyer Ribera a bisa cu gobierno Chileno y Acnur a comparti e “preocupacion pa respet pa derecho humano y e labor humanitario cu mester in den e casonan aki.”

Siman pasa, gobierno Chileno a cancela entrega di visa na e ciudad Peruano Tacna, centralisando e tramitacion na Lima pa por ordena e creciente demanda, cu a causa problema na frontera entre ambos pais.

 

LEAVE A REPLY

Please enter your comment!
Please enter your name here