Diabierna ultimo, informacion a circula for di banda Venezolano indicando cu Aruba ta preparando pa reapertura di frontera aereo cu Venezuela, despues di un publicacion di vice-presidente di Camara di Comercio di La Vela de Coro, Juan Gotopo, riba e red social X.

Den contexto di e tragedia siman pasa ora cu un barco a naufraga lagando atras varios persona morto y desaparecido, periodista Jhon Watts di Noticia Impacto a puntra prome minister Evelyn Wever-Croes durante conferencia di prensa diabierna tocante control di frontera. Watts a puntra si Warda Nos Costa, radar, prevencion y control ta funcionando den costa di Aruba.

Wever-Croes a contesta indicando cu “esey ta un punto crucial.”

“Ora cu nos a habri e frontera maritimo cu Venezuela na comienso di e aña aki, den prome mita di aña, un di e condicionnan tabata cu Venezuela ta bay haci mas na controlnan preventivo na su costa, specialmente estado Falcon, cu ta esun mas cerca y cu mas frecuentemente ta sali boto pa Aruba,” prome minister a indica. “Nos no ta mira mucho di esey ta tuma lugar. Pasobra nos ta weita varios boto cu a drenta, y e ora ta mustra cu di nan banda no ta haciendo suficiente. Pues un di e prome cosnan cu nos a haci ta pidi nan pone mas atencion riba e aspectonan preventivo di e control di costa ayanan.”

Pa e banda di Aruba, Wever-Croes a bisa cu ta purbando di aumenta control di costa. “Pa esaki nos tin cu bolbe papia cu Hulanda, pasobra nos tambe tin scarsedad di personal. Nos no tin control di costa posible 24/7. Den combinacion cu radar, wardacosta y nos propio polis maritimo ta haciendo lo maximo si.”

Tocante e tragedia cu a sucede siman pasa, Wever-Croes a indica cu “mi tambe ta desea cu nan por a detecta esaki prome pa evita e tragedia.”

Di otro banda, prome minister a bisa cu CMMA (Coordinatiecentrum Mensenhandel Mensensmokkel), cu ta e punto di coordinacion na Aruba cu ta traha riba contrabanda y traficacion di hende, di trafico y trato di hende, tambe a cuminsa cu algun tayer y trabao di prevencion. “Entre otro, nan ta trahando hunto cu embahada di Reino na Caracas riba un proyecto di duna mas informacion y conscientisacion ayanan na Venezuela caba. Kiermen nos mes ta bay Venezuela bay splica con peligroso e ruta aki ta, y cu e tin consecuencianan severo pa esnan cu ta haci e traficacion. E capitannan di e botonan aki ta core riesgo di un castigo.” Wever-Croes a indica cu e aña aki a cambia e castigo na un maximo di 18 aña den prison, pa motibo di trafica of trato di hende ya cu ta algo ilegal.

Apertura di frontera
 Considerando cu entrada ilegal ta bira un forma pa drenta Aruba mientras cu e frontera legalmente ta cera, Watts a puntra Wever-Croes si comunicacion cu autoridadnan na Venezuela ta bay bon, si ta comunicacion estrecho of no tin coordinacion ora di traha. “Comunicacion cu Venezuela ta bay a traves di ministerio di Relacion Exterior di Hulanda, door cu relacion exterior ta un asunto di Reino,” Wever-Croes a indica. “Y ‘kinanan, nos departamento di Relacion Exterior, embahada, consulado, tin contacto cu otro tambe. Kiermen na e nivel ey ta bayendo bon.”

Sinembargo, Wever-Croes a indica cu “dia nos tabata negociando reapertura di frontera maritimo, cu a conduci na e reapertura na mei di e aña ki, e tabata un hopi bon comunicacion. Tabatin bon reunionnan cu a tuma lugar, tur e ekiponan di Aruba, di Venezuela a bay Corsou, hunto cu Corsou a reuni y a haci hopi bon palabracion. Nos Aduana cu nan Aduana, nos autoridadnan maritimo cu nan autoridadnan maritimo, y e ta funciona.” Segun Wever-Croes, e resultado di esaki ta cu tur barco cu sali for di Venezuela pa yega Aruba – riba via legal – ta sali for di Venezuela ora Aruba ya a duna su aprobacion. “E ta trahando perfecto,” segun Wever-Croes.

Mientras tanto, vice-presidente di Camara di Comercio di La Vela de Coro, Juan Gotopo, a indica riba su cuenta di X cu prome minister Evelyn Wever-Croes a indica cu “tin contacto cu e consul y cu embahador di Reino na Caracas. Cooperacion despues di apertura maritimo ta bayendo bon. Nos ta den preparacion pa apertura [di frontera] aereo. Na januari ta bay defini un fecha.”

E noticia aki a circula ampliamente den medionan di comunicacion na Venezuela, te cu noticieronan local a acerca Wever-Croes, kende a confirma e noticia aki.

Potret di archivo.