gerente mfa y servicio sia.jpg

Pueblo di Noord y vecindario ainda ta wardando cu Servicio di Impuesto Aruba (SIA) lo cuminsa ofrece su servicio den instalacion di edificio MFA-Noord.  Despues cu a wordo anuncia cu SIA pronto lo tin su lokaal den e edificio menciona un gran expectativa a wordo lanta… pero ainda nada.

Sr. Richard Tromp kende ta manager di MFA-Noord a declara cu hopi entusiasmo na Bon Dia Aruba cu tin un desaroyo y e proceso ta andando pa SIA lo por cuminsa funciona den e edificio moderno aki. Ya caba tin algun mueble a wordo instala y nan ta na spera cu e computernan, printernan y otro instrumentonan di trabou  tambe lo wordo instala pronto. Pues e meta cu nan tin su dilanti ta cu eventualmente pa 1 di april SIA su localidad den MFA-Noord lo cuminsa opera.

Pakete di servicio 

Sr. Tromp a bisa na Bon Dia Aruba cu e habitantenan di Noord y bisindario lo por ta trankil cu e servicio di departamento di Impuesto ta bin. Aworaki nan tin un poco di contratiempo ya cu no tur e aparatonan t’ey. Nan tin si e personal caba y gerencia di MFA-Noord ta spera cu en berdad pronto, esta 1 di april SIA lo ta brindando su servicionan den e edificio aki.

Sr. Tromp a señala cu departamento di Impuesto ta un di e servicio cu mas ta hala atencion pasobra tur e otronan a drenta caba y esaki ta e unico cu ainda nan ta wardando riba dje pa drenta pa asina nan por duna e pakete di servicio completo.

Desde cuminsamento caba ora cu nan tabatin nos anochi di informacion nos a bisa cu lo tin Censo, departamento di Impuesto, AZV y laboratorio, y tur a cuminsa opera caba cu excepcion di SIA. 

“Nos ta spera cu en berdad dia 1 di april nan ta akinan pa nos por ofrece e pakete completo pa tur nos clientenan cu ta bin akiden”, el a bisa. Sr. Tromp ta reconoce cu tin basta interes y nan usuarionan ta puntra hopi, no solamente persona cu ta biba den e bario di Noord, pero otro personanan cu ta traha den e districto aki y bisindario.

Sr. Tromp a bisa cu satisfaccion cu e acogida y presencia di usuarionan cada dia ta mas grandi den instalacion di MFA-Noord. 

 

LEAVE A REPLY

Please enter your comment!
Please enter your name here