E aña aki celebracion di nos fecha nacional tin un caracteristica special ya cu ta wordo conmemora 40 aña di nos Himno y Bandera y 30 aña di Status Aparte di pais Aruba. Un persona cu semper ta envolvi den e celebracion nacional aki ta sr. Stanley Dabian di Departamento di Cultura Aruba (DCA).
Sr. Dabian ta haya cu mas cu claro nos mester stimula mas y mas ariba amor patrio y importancia di e tipo di celebracion aki. Pero comunidad mester cuminsa na los fei di un tendencia politico. “Na Aruba nos tin cu tur cos ta politica …”, el a bisa.
E envolvimento di politica ta wordo expresa den social media, ya sea pa ehempel pasobra a wordo cambia un cos of cu ta bin cu idea nobo of structura nobo. “Tur cos ta wordo hinca den esfera politico”, el a indica. Mientras e ta considera cu como Arubiano nos mester ta orguyoso di nos simbolonan di identidad y tambe di nos Status Aparte cu a hunga un rol den e desaroyo di nos pais.
E celebracion aki mas cu claro –segun sr. Dabian- ta uno nacional caminda e intencion su tras ta pa uni e pueblo denter di e celebracion sin wak direct kendenan ta goberna. “E celebracion aki ta di Arubiano. E Arubiano Orguyoso manera Setar a trece…”, el a bisa.
Esencia di celebracion
Sr. Dabian a declara na Bon Dia Aruba cu e aña aki e esencia mes di e celebracion di 18 di Maart ta poni riba logronan caminda nos mester ta agradecido di nan durante e ultimo tres decada di Status Aparte. E di dos enfoke ta poni riba e 40 añanan cu nos tin nos simbolonan nacional di Himno y Bandera cu tur Arubiano mester ta orguyoso di dje, ya cu nan ta simbolonan di nos identidad.
Nan ta simbolonan cu nos hendenan ta representa riba cualkier tereno ora cu nan ta bay eventonan internacional pa representa Aruba. Pero hunto cu nos simbolonan nacional nos tin nos ortografia y nos idioma Papiamento. Ademas fei 1986 nos tin nos propio moneda y e manera cu nan a wordo traha.
Un aspecto importante cu el a destaca riba tereno di autonomia ta cu nos tin nos propio Gobernador, pero tambe nos mester ta agradecido cu nos tin instancia manera Banco Central, Raad van Advies, derecho di voto pa eligi nos propio gobernante y nos tin nos propio Constitucion di Aruba. E ta haya cu nan ta aspectonan cu nos mester ta agradecido como Arubiano.
“Eseynan ta djis pa nombra un par cu ta esencia importante cu nos como pais awe denter di e 30 aña di Status Aparte, nos ta celebra esey”, el a bisa.
Pa duna contenido na e celebracion aki lo tin competencia di Poeta di Patria durante fin di siman aki na Fort Zoutman. Un evento cu a crece cu aña y cu e biaha aki ta conta cu e sosten di Setar, mirando e importancia cu telecomunicacion a hunga un rol importante den nos mundo di awendia. Ademas di otro actividad cu ta envolvi tambe e muchanan di scol. Tambe ayera y durante awe ta tumando luga e pre final Festival di Canto y mañan lo ta e gran final.
Actonan protocolar
Dia 17 di maart fei 6’or pa 7’or anochi ariba Monumento 18 di Maart lo tin un ceremonia protocolar. Y despues riba e mesun dia den oranan di anochi e manifestacion cultural grandi ariba Plasa Betico Croes.
Pa e siguiente dia ariba 18 di maart lo tin ofrenda floral di parti di Gobierno pa 8’or di mainta na Plasa Henny Eman. Pa 8:15 am lo tin ofrenda floral na plasa Betico Croes. Pa 8:35 am lo bay tin ofrenda floral riba plasa Juancho Irausquin como gesto di gradicimento na nos estadistanan Arubiano cu a contribui na Status Aparte.
Tambe lo bay tin e custumbrando ceremonia protocolar fei 11’or di mainta unda tur nos grupo uniforma lo forma parti di un desfile dilanti nos dignatarionan y invitadonan en general. E grupo cu no a inscribi ainda pa e desfile ainda nan tin chens pa manda nan peticion.
E celebracion e aña aki ta bay mas leu caminda di parti di departamento di Cultura como Comision Celebracion Dia Nacional, tambe nan ta hopi agradecido y nan ta aplaudi tur instancia deportivo, centronan di bario, clubnan, etc… cu ta haciendo aña pa aña actividadnan pa honra e tipo di celebracion nacional aki. Tur esunnan cu ta bay tin actividad ariba 18 di maart pa manda tur informacion di nan programa na e e-mail adres: standabian@cultura.aw. Di e forma aki nan actividad ta aparece riba e custumbrando calendario di actividad den cuadro di dia 18 di Maart.
