Un empresa di cuido di salud concebi pa Amazon, Berkshire Hathaway y JPMorgan pa ataca e aumento di gasto ta disolviendo.
Haven, forma na 2018 pa e tres gigante corporativo Mericano, lo stop operacion pa fin di februari, un vocero di e compania a bisa ayera. E no a duna un motibo pa disolucion di e empresa.
E compania independiente a ser crea pa enfoca riba mehora e cuido cu ta duna empleadonan di e negoshinan ey, mientras ta haci un miho trabao di maneha e gasto. Pero expertonan di beneficio a spera cu otro companianan lo adopta ampliamente cualkier plan desaroya pa Haven si esakinan proba di ta efectivo pa controla gasto.
Noticia di creacion di e empresa casi tres aña atras a sacudi e stocks di seguronan di salud cu ta maneha cobertura patrocina pa dunado di trabao.
Pero e empresa basa na Boston tabata mas tanto silencioso desde cu a nombra un CEO di perfil halto – profesor di Harvard, autor y ciruhano Dr. Atul Gawande – y despues anuncia su nomber na 2019. Gawande a retira aña pasa na mei.
Seguro patrocina pa dunado di trabao ta cubri alrededor di 157 miyon persona, segun e Kaiser Family Foundation. Esey ta casi mita di henter e poblacion Mericano y ta e porcion mas grandi di e mercado di seguro di salud di e pais.
Costo di cuido di salud a aumenta mas lihe cu salario y inflacion pa varios aña, poniendo stress riba famia y empleadonan. Fundadonan di Haven a adverti di cuminsamento cu e compania tabatin un tarea dificil, y nan no tabata spera solucionnan rapido.
Nan tabatin varios prioridad pa e compania. Nan tabata kier pa e busca maneranan pa yuda empleadonan tuma miho decisionnan pa nan cuido y duna nan e miho opcionnan disponibel. Nan tambe tabata kier pa Haven desaroya miho programanan pa mehora salud y trata particularmente cu obesidad y humamento, cu ta contribui na malesanan cronico manera cancer, malesa cardiaco y depresion.
Un vocero di Haven a bisa cu e compania a haci progreso riba un cantidad di area. A cuminsa diseñonan nobo pa beneficionan di cuido di salud cu ta elimina pagonan propio (eigenbijdrage) y a curasha acceso na cuido primario. El a bisa cu Haven tambe a identifica areanan pa elimina costo di medicina cu receta, y a ‘aborda asuntonan relaciona cu fraude, desperdicio y abuso’.
Amazon a bisa den un declaracion ayera cu Haven ‘a traha hopi bon’ como un luga pa bin cu ideanan y test esakinan, pero a agrega: “Awo cu nan ta cla pa implementa, nos ta ripara cu haci esaki independientemente tin mas sentido.”
Amazon, JP Morgan y Berkshire Hathaway tambe tin plan pa sigui colabora informalmente.
