Diabierna mainta, fraccion di AVP a wordo ricibi pa Gobernador di Aruba, relaciona cu e preocupacion reinante cerca fraccion di AVP, pa e hecho cu den concepto di fraccion di AVP, reunion inconstitucional a wordo yama pa diabierna mainta.

Lider di fraccion di AVP, sr. Marlon Sneek, na salida di e reunion a informa cu e reunion a bay den un ambiente sumamente positivo y cu e accion aki ta pa mustra na tur hende cu AVP no ta bay participa na e tipo di reunionnan aki.

Ora cu tur hende ripara cu fraccion di AVP no a asisti na e tipo di reunionnan aki, ta pa e hecho cu no ta participa na reunionnan caminda ta tiramento di lodo tin, un reunion inconstitucional cu a wordo yama.

“Un reunion a wordo yama pa diabierna mainta riba ‘geloofsbrieven’, caminda Prome Minister lo bin duna Parlamento informacion, pues na luga cu ta parlamento ta yama Minister pa bin duna cuenta, awo ta Minister ta yama Parlamento pa bin duna cuenta.

Esaki ta mundo riba su cabes, sigura ora cu nos cana e ley- y articulonan cu tin pa loke ta trata ‘geloofsbrieven’ nos por mira cu den e caso aki sr. Richard Arends a cumpli cabalmente cu tur e exigencianan cu tin mester pa loke ta geloofsbrieven.

Den un geloofsbrief, e unico momento cu bo tin cu declara un trabou cu bo tabatin, ta na momento cu bo tabatin un funcion di openbare funktie, pues bo tabata traha directamente pa gobierno.

P’esey e tempo aya tampoco nos a mira Minister Presidente Evelyn Wever-Croes entrega den su geloofsbrieven cu e ta traha cu oficina di abogado Croes-Wever-Tjong, pero tur hende tabata sa cu tur diahuebs e tabata den Corte pa atende, supuestamente por nada, e casonan aki, caminda e oficina di abogado ey ta manda cobra esunnan cu nan a representa.

E tempo ey, mester a mira si tabatin hendenan cu mester a entrega nan retiro ora cu nos a tende cu hendenan cu tabatin cuenta, manera Irus Krius cu placa tabata wordo manda di cuenta di bufete di abogado Croes-Wever-Tjong riba e cuenta aki, pero e tempo ey Wever-Croes a bisa cu su tata a bira hende grandi anto e no por haci tur cos mas, anto nos ta haci e cosnan p’e.

Awe si e tata no ta hende grandi mas pa e por bira abogado di RDA y si kier cuestiona cosnan, esey ta cosnan cu tin cu bay cuestiona, esta con bin un Prome Minister c’un RDA cu ta resorta bou di dje, anto su mesun tata ta e abogado di e compania estatal cu ta resorta bou di su persona.

Esey ta integridad?

Ya cu integridad ta, manera Wever-Croes mes ta bisa tur ora, haci lo corecto ora cu ningun hende ta mira y awe nos ta mira su tio tin un disputa di 1 miyon florin cu RDA, e abogado di e tio ta Hendrik Croes cu ta su tata y e abogado di otro banda ta su tata Hendrik Croes tambe.

Pues su tata mes ta bay bringa contra su mes pa wak kende e ta bay duna 1 miyon florin y e tipo di cosnan aki nan kier sconde, esaki ta cosnan cu nan no kier pa pueblo haya sa cuanto placa nan ta stricando atrobe riba lomba di pueblo.

Awor kier purba di atacha un persona cu ningun dia a tuma e funcion cu nan ta papia di dje, ningun dia a cobra un salario pa fungi como registercontroller di e compania RDA.

Awor nan kier yama un reunion publico pa purba di haci fiesta riba e tema aki anto ta e cosnan aki pa nos fraccion ta inaceptabel y nos a mira con sistematicamente nan ta purbando di desabilita contrincantenan politico.

Nos a cuminsa parce nos pais bisiña caminda simplemente pasobra un hende tin un otro color politico, e tin un otro pensamento politico, tin cu busca un manera caba cu e hende aki pa purba di pretende cu e hende no tin caracter y no ta di confia.

Ta e cosnan aki nos a mustra Gobernador cu fraccion di AVP no ta acepta y nos a trece e precupacion aki cerca su persona y ta keda na su persona kico e ta haci cu e preocupacionan cu nos a trece dilanti,” lider di fraccion di AVP, Marlon Sneek a declara despues di e reunion cu Gobernador.

 

 

 

LEAVE A REPLY

Please enter your comment!
Please enter your name here