Conseho di ministro di Reino a reuni diabierna pasa, sin tuma decision definitivo riba e tema cu tabata riba agenda, cu tabata e situacion financiero. A pospone decision te aki menos di tres siman, dia 20 di september, ora lo tin e siguiente reunion di gobierno di Reino. Riba su mes e fecha aki ta algo inusual, pasobra e reunion aki, di e gabinete Hulandes aumenta cu e ministronan plenipotenciario di e islanan, usualmente ta tuma lugar tur prome diabierna di luna. Den e sentido aki tambe e reunion di diabierna pasa tabata un siman mas tempran. Contal cu e fecha ta mustra riba cierto urgencia pa caba di regla e asunto, e desacuerdo entre gobierno di Aruba y gobierno di Hulanda/Reino, pa loke ta e maneho financiero Arubano y e supervision riba esaki.

Manera anuncia pa gobierno di Aruba mes, nan tin tres siman pa bin cu un plan cu por discuti y eventualmente aproba den conseho di ministro di Reino. Mirando cu desde un principio e puntonan di vista ta hopi aleha di otro, ta improbable cu gobierno di Aruba ta bay propone algo cu ta satisface gobierno Hulandes. Esaki pa ambos tema cu tin riba mesa, tanto e adaptacionnan proponi pa CAFT pa presupuesto 2019, como e asunto di e cambionan den e ley local di supervision (LAft). Pa loke ta e prome tema, lo mester bay na e recomendacionnan haci pa CAFT y cu cual gobierno di Aruba no (kier) a cumpli y por lo tanto a bira base pa e recomendacion na gobierno di Reino pa duna Aruba un instruccion pa cumpli a cu esakinan. Kico e recomendacionnan tabata? Pa cuminsa, e asunto – conflictivo – di inclusion si o no di gasto di personal di e Plan di Crisis Social den e gastonan di personal general, limita na Afl. 479 miyon. Te awor nos no ta mira ni tende nada cu ta mustra riba un acercamento den e asunto aki. Ademas tin, relaciona cu gasto di personal, e peticion di CAFT pa elabora un norma nobo pa gasto di personal total, incluyendo Staten, Contraloria General, Conseho Consultivo (RvA) y DOW. Pa straño cu e por zona, pa hopi aña caba ta maneha e total parcial di gasto di personal cu no tabata inclui e entidadnan aki. Pa un impresion di e gastonan total por consulta conseho anual di RvA riba presupuesto di pais Aruba, cu ta representa mas di 50% di e gastonan total den e presupuesto, un situacion realmente preocupante.

Tambe CAFT ta desea di mira un plan integral di reforma fiscal pa e proximo añanan, algo cu pa varios motibo a keda colga y nos tampoco a haya pa mira. Consecuencia ta cu e reforma, y entrada pa segundo mita di 2019 tambe a keda posponi, poniendo mas presion riba cumplimento cu e presupuesto aproba y acorda. Banda di esaki, e entradanan insuficiente presupuesta pa AZV na 2019, di casi Afl. 25 miyon, ta otro preocupacion, cu riba su mes caba por percura pa yega na e deficit permisible pa e aña aki (-0,5% di GDP). Sin embargo, e asunto mas di principio, y tambe mes urgente, ta keda e cambio den e ley di supervision den parlamento di Aruba algun luna pasa. Di loke nos por destila di e declaracion di e presidente di parlamento siman pasa, nada no a cambia den posicion di e fraccion gubernamental mas grandi. Cu esaki ta parce cu en berdad, manera nos a comenta anteriormente, un adaptacion nobo di e ley cu por satisface Hulanda no ta posible. Cu esey, e unico ruta pa reestablece e supervision financiero di Reino ta institucion di un ley di Reino, manera e otro islanan tin caba. Unavez e decision keda tuma den gobierno di Reino cu ta esaki ta e ruta na lugar di e ley Arubano, cu gobierno anterior a acorda cu Hulanda, no tin awa pa laba mas. E supervision lo keda reestableci y Aruba mester simplemente cumpli.

Si tur e esfuerso cu a hinca den bringa e asunto aki cu Hulanda, pa yega na un resultado ‘cero’ te awor, a keda inverti den resolve e problemanan financiero cu gobierno tin, nos ta kere cu nos por tabata hopi mas leu. Actualmente gobierno ta bringando un bataya riba dos frente; esun cu Hulanda pa trata di deshaci di e supervision financiero, y otro pa sanea y restructura finanzas publico. Pa logra por ehemplo un reforma fiscal exitoso, ta necesario conta cu apoyo no di tur pero sikiera di mayoria di e partnernan den sector priva. Tin señalnan cu gobierno ta cuminsa comprende esaki y ta dispuesto di dialoga mas cu e gremionan empresarial riba temanan clave manera e reforma fiscal. Esey ta positivo pero ta keda e problema cu realmente no tin un alternativa bastante satisfactorio pa e BBO, mientras cu ta spera si di logra esaki, pa deshaci di e desbentahanan cu BBO tin.

Di otro banda, ta practicamente imposible cu gobierno por gana e gremionan na su banda den e confrontacion cu Hulanda, realmente di mesun manera cu na 2014 y despues gobierno anterior tabata para su so den su lucha cu Hulanda. Di berdad gobierno actual ta dispuesto di hiba e lucha inutil y sin perspectiva aki tambe?

 

LEAVE A REPLY

Please enter your comment!
Please enter your name here