E progreso riba ehecucion di actividadnan den e agenda di ehecucion pa Aruba ta generalmente positivo. Pero a pesar di un aparato publico grandi, tin poco capacidad pa ehecuta e landspakket. Asina TWO ta bisa Tweede Kamer di Hulanda den un raportahe di progreso riba e landspakket pa Aruba.

Desde comienso di 2021, e Tijdelijke Werkorganisatie, TWO cu ta anticipa e COHO ta trahando cu Aruba (y Corsou y St. Maarten) pa implementa e landspakket pa cada pais. E temanan di e landspakket ta keda periodicamente elabora den e agenda di ehecucion, den cual tin e pasonan concreto cu mester tuma pa realisa e reformanan necesario. Den cada agenda di ehecucion tin prioridadnan stipula y ta menciona e accionnan mas concreto posibel. Manera ta conoci, Gobierno y TWO a caba di yega na acuerdo pa e agenda di ehecucion pa e kwartaal coriente.

Pero conforme e concepto di ley di Reino COHO, TWO ta brinda periodicamente un reportahe riba ehecucion di e agenda di ehecucion, unda ta duna evaluacion riba e progreso di cumplimento di e palabracionnan haci den dicho agenda.

E di dos reportahe di e agenda di ehecucion pa 2022 ta describi e progreso di e landspakket pa e periodo di 16 di Februari 2022 te cu 15 di Mei 2022. E reportahe como tal ta enfoca riba parti di e agendanan di ehecucion pa e prome y di dos kwartaal di 2022.

Tweede Kamer no solamente a ricibi e relato di TWO, pero tambe di Aruba como reaccion, particularmente mirando cu e progreso di e ehecucion di e palabracionnan di e landspakket no semper ta sinta na Aruba.

Falta capacidad na nivel di ambtenaar

Segun TWO, Aruba ta mustra regularmente riba e disponiblidad limita di capacidad na nivel di ambtenaar pa ehecucion di e landspakket. Aruba conoce un sector publico grandi, pero e capacidad di forma maneho y coordina ta hopi limita. Pa e motibo aki no por pone kita hende for di nan responsabilidad diario pa traha riba e proyectonan di e landspakket. Esaki riba su mes ta confirma e importancia pa reforma di e sector publico.

TWO Hulanda na e momentonan aki, den luz di e hecho cu e reformanan aki ta exigi cautela y tempo, y no por keda conclui a termino corto, ta tene combersacionnan riba sosten di capacidad, por ehempel den forma di gerente di programa y expertonan riba contenido pa temanan A, B, E y F, cu ta riba Maneho Financiero, Costo y Efectividad di Sector Publico, Reforma Economico, y Cuido. Mester bisa cu Aruba tambe conoce un TWO, pero e reportahe specifico aki ta presenta pa e TWO di Hulanda.

Pero asina mes, segun e relato na Tweede Kamer, a tuma un paso importante pa un reforma real di e sector publico, cu ta e creacion di un mapa vial (stappenplan) den cuadro di tema B, cu ta Costo y Efectividad di Sector Publico. Entre otro a tuma dos sesion na nivel administrativo unda a determina e ambicion pa e futuro di sector publico di Aruba. A papia cu un cantidad di actor envolvi, y parti di e ambicion ta un transformacion cauteloso na un ocupacion adecuado unda ta mira tanto na e cantidad di personal, incluso e gasto total di salario, pero tambe na calidad di e aparato di ambtenaar.

A base di e ambicion stipula lo finalisa e plan vial aki, cu ta describi con ta bay logra e obhetivo en cuestion. Tambe lo inclui e resultadonan di e revision di recurso humano cu a conclui recientemente. Despues lo cuminza un trayecto di cambio multianual di Gobierno. E diferente metanan lo ta den e agenda di ehecucion pa e proximo añanan.

Maneho Financiero

Tambe pa tema A, cu ta Maneho Financiero a logra concretisa e asina yama stappenplan cu ta describi con Gobierno ta den control. E plan aki mester a keda concretisa na Juni. Den nan tin recomendacionnan for di e investigacion riba e organisacion financiero, pero tambe ta conta pa otro accionnan cu ta canando caba, por ehempel e renobacion di e structura di reportahe y e investigacion riba maneho di subsidio. Pa trece e maneho financiero na un nivel aceptabel, mester fortifica e funcion di control financiero, mescos cu e base huridico, y tambe e procesonan di trabao financiero y uso di sistemanan financiero. E mapa vial ta inclui plannan multianual unda na prome instante lo pone tur asunto na ordo y despues ta pasa pa optimalisacion. Banda di esaki a trece e condicionnan cu ta necesario dilanti. Pa motibo di ainda e falta di capacidad necesario ta mira un progreso slow den e proceso.

A tuma conscientemente hopi tempo pa e proceso pa crea e mapanan vial pa temanan di Maneho Financiero y Costo y Efectividad di Sector Publico. E proceso di creacion ta carga enfaticamente na un imagen conhunto na e metanan cu kier logra y e plataforma pa carga e trayecto, crucial pa sigura cu ta logra e cambio.

BTW

E ambicion di Aruba ta pa implementa un structura nobo y mas simple di belasting, esta e BTW. Aruba a reevalua e proyecto inicial riba algun punto. A discuti e ahustacionnan cu actornan envolvi, esta e stakeholders, cu tabata hopi critico riba e contenido y e factibilidad pa logra prome cu Januari 1, 2023. Tambe tabatin critica riba aumento di entrada for di belasting sin cu Gobierno ta introduci medidanan pa baha gasto. Mientrastanto TWO Hulanda y IMF, a conseha Aruba riba e ahustacionnan cu a propone. Segun e relato, Aruba awor ta studiando e consehonan y consecuentemente pa motibo di esaki, e planificacion di e cambio di e structura di belasting ta cana atras. Paralel na e cambio aki, Aruba ta traha tambe riba e desaroyo continuo di Servicio di Impuesto,particularmente pa logra cobra e belasting atrasa, hisa cumplimento, digitalisacion y mehoracion di e operacion di e servicio mes. E reaccion di Gobierno ta cu esaki ta un tarea di Pais Aruba mes, pero cu ta trahando pa yega na un plataforma amplio cu mester carga e cambionan riba e structura di belasting.

Investigacionnan riba tereno di mercado laboral y seguridad social tambe a keda conclui den e ultimo periodo. A compila un nota general cu a base di e investigacionnan ta describi un pakete coherente na medida. E nota ta forma e base pa consultacion social amplio y discusion cu stakeholders pa fin di 2022. Esaki lo mester resulta den decision administrativo riba reformanan concreto. Den cuadro di e fortificacion di e clima di inversion a haci un comienso na e autoridad di competencia husto (mededingingsautoriteit). E plan di acercamento entretanto a keda aproba.

Sector di cuido

Tambe a logra presenta un rapport basa riba investigacion riba cuido y e structura di cuido, aunke cu cierto retraso, segun TWO Hulanda. Hunto cu Aruba lo tene reunionnan pa yega na un plan di implementacion multianual pa yega na un structura di cuido cu ta robusto y pagabel. A pone e palabracionnan den e agenda di ehecucion cu awor ta na vigor.

Enseñansa

Banda di e revision actual di e structura di enseñansa, tambe ta tumando paso cu tin di haci cu e idioma di instruccion y e introduccion di un sistema di siguimento di enseñansa. Esaki ta sucede a base di algun di e recomendacionnan cu a sali afo di e reportahenan intermedio y e prioridadnan cu Aruba a mara na nan. E otro recomendacionnan awor ta keda elabora basa riba e revision completo.

TWO Hulanda ta bisa cu riba e tereno di fortificacion di Estado di Derecho, e actividadnan ta duna muestra di suficiente adelanto. Asina ta tuma paso pa yega na un autoridad di wega di placa conforma e palabracionnan. Pero locual si a keda pega, ta e trayecto di profesionalisacion di Arumil. Pero esaki ta pa cuenta di Hulanda, segun TWO Hulanda.