Durante su conferencia di prensa diahuebs 22 di juli, Minister di Salud y Turismo, Dangui Oduber, a toca e topico di obesidad. E topico aki ta uno cu ta causa preocupacion pa comunidad di Aruba, specialmente mirando e cifranan alarmante di personanan cu ta sufri di problema cu sobrepeso. Minister Oduber a splica un poco con prevencion ta e yabi pa bringa e problematica aki.

E problema di obesidad ta hopi grandi na Aruba. Minister Oduber a indica cu 70% di e poblacion tin sobrepeso y di e 70% aki, 25% ta obeso. Pa e motibo ey el a remarca cu a bin e plan di prevencion, y p’esey AZV ta yuda Ministerio di Salud combati e problema aki, pa cuminsa tuma accionnan concreto, no solamente cu campañanan di conscientisacion pero cu accionnan real pa yuda esnan cu tin problema cu obesidad.

Ministerio di Salud ta enfoca hopi riba e parti di prevencion. Oduber ta splica cu tin recomendacion di Raad van Advies, tin recomendacion di IMF y comunidad di Aruba ta consciente cu si no cuminsa inverti y tuma accionnan concreto riba prevencion, e fondonan di AZV ta bira impagabel. “Aruba tin un comunidad cu no ta asina saludabel, p’esey tambe nos tin nos Plan Nacional di Prevencion cu ya caba a wordo lansa”, Oduber a bisa.

El a indica cu nan a calcula caba e beneficio di cada intervencion cu nan haci, muy specialmente den e edadnan mas jong ora ta mucha of hoben. Por ehempel intervencion di un mucha di 12 aña ta spaar den un ciclo di bida di un ciudadano, entre 50 y 75 mil florin.

“E return on investment di prevencion, no solamente bo tin un miho calidad di bida pa e ciudadano, bo ta aumenta su autoestima, pero a largo plaso bo ta logra reduci bo gastonan tambe”, Oduber a subraya.

El a menciona cu no hopi tempo atras e tabata na AZV pa papia riba cuater pilar riba cual ta bay enfoca pa reduci e gastonan y el a sigura cu un di nan ta e Aruba Healthy Lifestyle Center, cu ta dirigi pa personanan cu tin problema cu obesidad.

Minister Oduber a indica cu durante e ultimo lunanan nan tabata ocupa cu e planeamento di e Healthy Lifestyle Center buscando oficina, trahando e lista di vacatura cu ta inclui vacatura pa dietista, fisioterapista, basis arts, nutricionista, entre otro. Aworaki, segun el a señala, nan a termina cu e fase di planeamento, a identifica algun espacio caba na unda por establece e oficina y ta spera cu pa comienso di luna di september nan por cuminsa cu e prome proyecto piloto pa guia esnan cu tin problema cu obesidad.

El a comenta tambe cu ta bay amplia e cantidad di scol cu ta participa den e proyecto Scol Saludabel y motiva mayoria di scol na Aruba pa participa activamente den e proyecto aki y den tambe diferente campañanan di conscientisacion.

Minister Oduber a remarca cu su ministerio ta bay sigui sostene y financia e proyecto piloto Jump18, cu a wordo lansa aña pasa y ta bao direccion di Dr. Jamiu Busari. Jump18 ta un programa dirigi pa mucha y hoben di entre 4 y 18 aña cu ta confronta problemanan cu obesidad.

E programa aki a cuminsa na aña 2021 cu e proyecto piloto di 18 mucha y hoben cu a dura seis luna largo durante cual e participantenan a haya guia di nutricionista, dokter, a fisioterapista y practica diferente ehercicio pa asina yuda nan cu nan problema di sobrepeso.

Minister Oduber a enfatisa cu tur participante a termina e proyecto piloto exitosamente, ningun di nan a subi di peso y 90% di nan a baha peso. “Ora bo papia cu e muchanan personalmente tur ta bisa bo con esaki a cambia nan bida, cambia nan estilo di bida, cambia nan percepcion y aumenta nan autoestima cu tabata hopi abao prome cu nan a cuminsa cu e proyecto”, el a agrega.

Jump18 ta bay lansa oficialmente nan segundo edicion den luna di augustus, na unda un otro grupo di hoben ta bay haya e oportunidad di participa y completa e programa pa otro seis luna mas.

Oduber a resalta cu e ta un reto hopi grandi pasobra prevencion no ta mustra e resultado a corto plaso, pero ta tuma por lo menos cinco pa dies aña pa por wak e resultado. “Pero nos ta comprometi como ministerio pa inverti den prevencion, pasobra hopi asignatura di gobiernonan anterior, diferente Minister di Salud a papia hopi di prevencion, pero nos ministerio no solamente a desaroya un plan conhuntamente cu PAHO (Organisacion Panamericano di Salud). Si no nos ta pone fondonan disponibel tambe pa asina por ehecuta e plan nacional aki, cu aki cinco of dies aña nos ta spera di bay mira e resultadonan”, e minister di Salud a indica.

LEAVE A REPLY

Please enter your comment!
Please enter your name here