Diamars anochi a tuma luga introduccion di Buurtzorg Caribbean, un sistema di cuido na cas di hende grandi nobo y revolucionario. Durante e conferencia tabata presente e fundador y director di Buurtzorg Hulanda, Jos de Blok, co-fundador y director di personal Sra. Gonnie Kronenberg y CEO di Buurtzorg Internacional, Thijs de Blok.
Buurtzorg a wordo estableci na aña 2006 na Hulanda. E ta un organisacion di cuido na cas caminda ta duna cuido personal pa hende grandi. E ta un organisacion innovativo y ta traha cu ekiponan independiente.
E enfoke di Buurtzorg ta pa pone cuido na prome luga sin tin mester di perde tanto ora haciendo trabounan administrativo. “Ta cuido nos ta duna, nos no tin burocracia caminda tin cu bay yena yen papel. Un hende cu mester duna cuido mas cu 60% di su ora di trabou ta bay haciendo trabounan administrativo, na Buurtzorg esey no ta bay asina”, nan a splica.
Buurtzorg a cuminsa cu cuater nurse y a pone como meta pa revoluciona e industria di cuido E organisacion a crece exponencialmente y actualmente ta emplea 15 mil nurse. E proposito di Buurtzorg ta pa yuda e persona biba un bida significativo y autonomo.
Cu buurtzorg e ekiponan di enfermeronan ta responsabel pa cada bario y nan mes ta brinda e cuido y nan ta haci tur planeamento, desaroyo personal y nan mes ta busca hende pa traha. Nan ta responsabel pa e organisacion y proceso completo, y ekiponan independiente ta conecta via e portal di Buurtzorg caminda nan por comunica cu otro ekiponan y cu e directornan.
E ekiponan independiente ta consisti di maximo 12 nurse y na momento cu e ekipo surpasa 12 nurse e ekipo ta dividi y asina mas ekiponan ta wordo forma. E ekiponan ta traha den un comunidad di 5 mil pa 10 mil persona.
Jos de Blok, fundador y director, inicialmente a studia un carera den economia, pero despues di algun aña y despues di cay den depresion el a dicidi di cambia rumbo y a tuma e decision di studia enfermeria. Asina na 2006 de Blok, hunto cu Sra. Kronenberg a lanta Buurtzorg
Den su presentacion Sr. de Blok a splica cu e modelo di organisacion aki nan a revoluciona e industry di cuido na cas. Segun estadisticanan cu de Blok a presenta satisfaccion di clientenan ta 9, satisfaccion di empleadonan ta 9 y nan a gana tambe cinco biaha como miho empleador di aña.
Buurtzorg a expande den e ultimo añanan y aworaki ta ofrece diferente tipo di cuido, por ehempel cuido pa hoben cu discapacidad, cuido pa mamanan cu a caba di haya yiu, cuido di fisioterapia entre otro.
Buurtzorg ta wordo ofreci na mas di 30 pais rond mundo. Thijs de Block a asumi su puesto como CEO di Buurtzorg Internacional na 2021 y a traha na Buurtzorg Asia y tambe cu diferente proyectonan na Sur Korea, Hapon, Taiwan y Australia. E ta e persona encarga cu implementacion di e sistema revolucionario di Buurtzorg na e diferente partinan di mundo.
