Ayera tardi ex-minister Sr. Otmar Oduber a tene un rueda di prensa durante cual el a elabora y duna un updata pa loke ta su envolvimiento y desaroyo di caso Flamingo.

Oduber a informa cu ainda no tin decision pa loke ta trata caso Flamingo, pero loke si a tuma luga, y loke a informa nan, ta cu e investigacion pa cu esaki a termina y aworaki a yega e punto na unda mester entrega e rapport di henter e investigacion cu a tuma luga durante mas cu tres aña, desde cu a duna e tarea pa investigacion cuminsa.

Segun el a indica, siman pasa mester a entrega e rapport aki pa asina Ministerio Publico, Procurador General den e caso aki, por tuma un decision si ta bay over pa un caso den corte a base di loke nan a encontra den e investigacion aki of si ta dicidi lo contrario, cu no lo tin un caso cu ta continua.

Oduber a splica cu na november ultimo tin un orden di rechte comissaris pa prome instancia caminda cu Oduber, hunto cu su abogado, a haci uso di un articulo pa mustra riba e hecho cu desde cu nan a aresta su persona, y cu a pasa 23 dia cera na KIA, cinco pa shete luna a pasa sin cu el a tende algo di e investigacion.

“Nos a bay corte pa pidi, a base di un articulo cu ta existi na unda hues por ordena den e caso aki pa rond af e investigacion den dos luna of den un termino cu hues ta haya adecuado, mirando loke ta trece pa dilanti,” el a indica.

El a sigui splica cu 24 ora prome cu e caso aki a tuma luga, fiscal den corte a manda documentonan pa hues splicando cu e no ta compronde pakico Oduber a lanta e caso contra Ministerio Publico, pasobra nan ta terminando cu e investigacion caba, y pa casualidad nan lo termina cu esaki y net e dos luna cu ley ta prescribi ta loke nan ta pidi pa rond af e investigacion.

“P’esey mi ta sali afo awe di e forma categorico aki. Pa trece na luz di dia e inhusticia, e calumnia cu mi a biba, e forma cu mi a wordo humilia na momentonan cu mi tabata den KIA, e forma cu mi a wordo humilia y cu a kibra mi bida, no solamente mentalmente, pero fisicamente, financieramente, economicamente, cu mi ta bisa ta yega cierto momento cu e cosnan aki mester sali na luz di dia,” Oduber a expresa.

El a recorda cu dia 24 di juni di aña 2020 rechte comissaris y landsrecherche, RST a drenta Oduber su cas cu a kima, e cas cu e tabata bibando aden y e cas di su mayornan tambe pa busca documentonan, prueba y placa entre otro pa e caso.

Caso Flamingo a cuminsa pa motibo di e acusacionnan a bin door di un proces verbal crea pa BCI, Bureau Criminele Inteligentie di Polis. Segun Oduber a remarca, e acusacionnan ta basa ariba redo, ariba loke nan a tende y na final e proces verbal ta caba bisando cu no por tuma nada di loke cu ta den e rapport pa usa como prueba ningun caminda.

Despues di mas di tres aña di investigacion y 23 dia cera na KIA, segun Oduber, ningun dia nan a interog’e pa ningun di e acusacionnan original di caso Flamingo, no a haci ningun pregunta riba e acusacionnan cual inicialmente a cuminsa cu caso Flamingo.

“Despues cu mi a sali for di KIA e investigacion a cera y te dia di awe no tin nada di loke caso Flamingo tabata,” el a agrega.

Oduber a keda deteni aña pasa den luna juni. Despues cu Oduber tabata deteni pa 10 dia, Fiscal kier a prolonga su detencion, a bay corte pa esaki, pero hues a dicta cu no tin suficiente prueba concreto pa mantene Oduber cera. Despues di esaki Ministerio Publico a bay Hoge Beroep y ta na e momento ey, segun Oduber ta splica, el a haya sa cu tin un acusacion di parti di Marisol Lopez Tromp den su contra y a dicidi di prolonga su detencion basa ariba e aangifte di Lopez-Tromp.

Segun Oduber a sigui splica, e aangifte di parti di Lopez-Tromp den su contra a wordo haci dia 24 di juli, un luna despues cu recherche a drenta Oduber su cas, y e aangifte aki, segun Oduber ta remarca, ta locual Ministerio Publico a gara y asina cuminsa puntr’e tocante spookambtenaar y algun tereno.

Di e shete acusacion cu cual a cuminsa na prome instante pa caso Flamingo, a termina cu dos acusacion y Marisol Lopez Tromp tabatin shete acusacion tambe den su contra y na final un a keda, cual ta tocante ‘spookambtenaar’.

Sigui mas di e noticia di caso Flamingo den nos siguiente edicion di Bon Dia Aruba.