Pone e exito di studiantenan di paisnan di Caribe den Reino riba papel, splica kico mester haci pa mehora y kico mester haci pa sigura cu studiantenan tin mas exito den nan estudio superior. Esey tabata e instruccion cu ResearchNed a haya di cuater Minister di Enseñansa di Reino.

Ta un rapport cu a keda cla na 2019 caba y ta bon conoci memey di Parlamentarionan Hulandes.

Segun e investigado nan, tin diferencianan grandi pa cada situacion y dificilmente por trece tur esakinan den un rapport. Tin situacionnan multidimensional y problematica cu por diferencia di otro na nivel individual. Pero tin un liña cora hopi cla, esta cu e transicion di educacion, di e paisnan den Caribe pa Hulanda ta un paso impactante.

Apesar di tur preparacion y guia cu e paisnan ta duna y ta ricibi na Hulanda, hopi biaha ta subestima e paso aki. Los di enseñansa superior, na nivel HBO y WO (universidad), tin como 600 studiante di Caribe cu ta cuminsa nan estudio profesional intermedio, MBO. Nan ta cuminsa generalmente na un nivel promedio abou y tin mas edad cu e studiante di Hulanda. Mita di e grupo cu ta cuminsa ta caba e estudio, cu ta hopi menos cu otro studiante cu no ta di Hulanda (65 porciento) y di Hulanda mes cu ta 75 porciento. E rendimento ta abou particularmente cerca studiantenan masculino.

En general, e resultado entre studiante masculino y femenino di e paisnan Caribense ta similar den e prome aña, pero despues e studiantenan masculino ta cuminsa cana atras.

Pa aña tin como 750 studiante cu ta bay Hulanda pa HBO y como 250 ta cuminsa nan estudio Universitario, WO. Casi mita di studiantenan HBO, 48 porciento, ta cambia di estudio den e prome aña y e cantidad cu ta cambia di estudio na nivel WO ta 43 porciento.

Retonan ta sigui durante henter e trayectorio di estudio. En principio, e cantidad di studiante di Caribe cu ta cay afo no ta mucho diferente cu e cantidad promedio na Hulanda. E problema ta cu e caida den estudio memey di studiantenan di entre otro Aruba ta continua, mientras cu e ta baha serca otro studiantenan.

E rendimento pa yega na un HBO diploma ta abou. Mientras cu 33 porciento di studiantenan no-Hulandes cu a migra pa Hulanda ta gradua di HBO despues di cinco aña, e cifra ta unicamente 23 porciento pa studiantenan di nos isla. E porcentahe di graduacion di studiante di Hulanda ta 51 porciento, despues di cinco aña di HBO. Na nivel WO, e diferencianan ta mas chikito. Despues di cuater aña, 43 porciento di studiantenan cu a bay Universidad ta logra nan Bachelors, compara cu 58 porciento di studiantenan migrante y 61 porciento di otro studiantenan.

Pasobra studiantenan di Caribe ta cambia di estudio cu mas cu frecuencia compara cu otro y como tal ta perde mas tempo den nan estudio. Y e retrasonan cu nan ta experiencia ta nifica cu na final di ocho aña, como 40 porciento di studiantenan ta logra nan diploma HBO. E ta mas halto serca studiantenan di WO, cu despues di ocho aña ta obtene nan diploma. Aunke mas abou cu e average studiante na Hulanda e studiante di nos islanan cu ta bay universidad tin dos biaha mas probabilidad di caba nan estudio compara cu esunnan cu ta caba HBO.

Den entrevistanan ta mustra cu studiantenan di Corsou y Aruba ta hopi convenci di nan direccion di estudio, pero den practica ta cambia esaki hopi lihe cu ta mustra cu tin un espacio entre expectativa y realidad, mas cu cerca cualkier studiante na Hulanda.

Aunke cu no tin cifra concreto pa haci comparacion cu esunnan cu ta bay studia den region of na Merca, e impresion ta cu e grado di exito ta mas halto. Esaki ta motibo pakico mas cu antes ta promove pa studiantenan sigui nan estudio den region y no na Hulanda y pakico no ta ofrece financiamento di estudio pa MBO na Hulanda.

Diferencia entre studiantenan di e diferente islanan y exito di estudio

E grupo mas grandi di Caribe cu ta bay studia na Hulanda ta di Corsou, sigui cu un distancia, esunnan di Aruba, y despues St. Maarten, sigui pa studiantenan di islanan BES. E porcentahe ta relativo na e populacion di e paisnan. E paisnan ta bon representa na nivel HBO. E cantidad di studiante di Aruba den MBO na Hulanda ta relativamente abou, particularmente pasobra Aruba ta descurasha e practica aki. Pa loke ta WO, studiantenan di Corsou ta mas hopi tanto den cifra relativo como absoluto. E exito di estudio na tur tres nivel no ta diferencia mucho entre studiantenan di Corsou y Aruba, apesar cu studiante Arubiano ta menos exitoso compara cu su colega di Corsou. E studiantenan di St. Maarten tin hasta miho rendimento.

Acercamento actual

E preocupacionnan pa e exito di estudio relativamente abou di studiantenan di Corsou y Aruba ta existi hopi tempo caba, tanto riba e islanan como na Hulanda y a tuma pasonan pa por yuda mehora e perspectiva. Por ehempel, ta organisa mercado di estudio y profesion, tin session nan informativo na scol, biahe nan orientativo, tin oferta pa guia individual y tayernan, tin sesionnan informativo di e scolnan na Hulanda, y tin asistencia di financiamento di estudio pa studiantenan HBO y WO pa nan por haci e transicion practico, manera ayudo pa haya cas. Ademas tin informacion online pa futuro studiantenan por haya un idea di kico por spera nan den nan estudio.

Tambe enseñansa preparativo na e islanan ta bisa di ta brinda preparacionnan pa e transicion mas trempan posibel, unda ta integra esaki den e curiculo y ta envolvi ex-studiantenan pa duna informacion kico por spera. Pero e preocupacion ta keda cu e preparacionnan pa e transicion ta cuminsa laat y cu e informacion riba escoho di estudio y bida den otro ambiente no ta yega na e studiante. E ta un hecho cu pa hopi e escoho di estudio no ta bon pensa.

Aunke cu Corsou, St. Maarten y Aruba tin mentornan pa guia e hobennan, ta keda preocupacionan. Esunnan mas grandi ta cu hopi biaha vivienda no ta bon regla ora cu yega Hulanda. E ta dificil pa guia esnan cu ta bay riba nan mes, por ehempel pa MBO y esnan cu si ta haci uso di guia, despues di un aña ta ripara cu nan ta stop di busca sosten.

Hulanda

Na un cantidad chikito di HBO tin comunidadnan di studiantenan di Caribe cu ta organisa sosten y encuentronan. Pero e entidadnan educativo mes no tin provision specifico pa studiantenan di Caribe, hopi biaha pa motibo cu e cantidad di studiante ta chikito. Mas ainda, studiantenan di Caribe no ta den bista, pasobra nan ta registra como studiante Hulandes, y como tal no por haci uzo di servicionan cu tin pa studiantenan internacional.

E preocupacion ta cu tin un acumulacion di problemanan practico, personal y relata na estudio memey di hopi studiante cu ta cuminsa na Hulanda. Nan no ta busca ayudo pa nan problemanan social emocional y cambio of stop cu estudio, y rendimento di diploma ta hopi abou.

E analisis a mustra cu locual ta haci na preparacion no a trece suficiente mehoracion, y studiantenan di nos paisnan generalmente no ta suficientemente bon forma pa ta independiente, no tin e habilidad nan pa studia y no ta domina Hulandes suficiente. E preparacion specifico tampoco ta suficiente. No tin manera pa haya un bista mas realistico di bida na Hulanda y hopi biaha ta ora cu a cuminsa studia, ta realisa cua ta e direccion di estudio cu ta cuadra cu nan. Mas ainda, tin poco sosten pro activo ora di acumulacion di problema y na momento cu e studiante ta pasa den momentonan emocional. Studiantenan cu ta bay Universidad ta un poco miho prepara den tur esaki.

Comparacion

No tin ningun otro grupo di studiante na Hulanda cu resultadonan di estudio comparativamente abou manera esun di studiantenan di nos paisnan. Pero, tampoco tin otro grupo cu tin cu confronta e mesun retonan cu studiantenan di nos paisnan. Pa mayoria studiante di Caribe, no tin otro opcion cu bay leu di cas pa studia y Hulanda ta hopi diferente pa loke ta cultura, clima, sociedad. Como tal, mas tempo pa preparacion of scohe pa studia den region ta mustra un miho opcion. Bon Dia Aruba lo amplia riba e investigacion grandi aki den su proximo edicionnan, un rapport extenso cu ta inclui un serie di recomendacion concreto.