Tin dos proyecto monumental interesante pa nan singularidad y tambe riba nan posibel destino: E Imeldahof Convent y e tankinan di awa na Kibaima.

E tankinan di awa na Kibaima ta aparece riba e lista di proyectonan di ‘fast track’ cu Stichting Monumenten Fonds Aruba (SMFA) a presenta den cuadro di reactivacion di Aruba su economia, meymey di e pandemia di coronavirus.

E stichting aki cu ta percura pa restaura y conserva nos monumentonan, tabatin varios proyecto na caminda caba. Pero nan a selecta un par di nan pa presenta dilanti e comision di fast track pa pidi cooperacion di gobierno, no financiero, sino di facilidad di e procesonan pa ehecuta nan. Ademas di e dos prome menciona ariba den e lista, nan a inclui entre otro, e edificio monumental di ex Botica Aruba cu ya caba nan a cuminsa cu e procedura di destaho publico, y tambe varios trabao di mantencion, por ehempel esun di E Faro.

Imeldahof Convent

E proyecto aki a lanta algun stof cerca e comunidad Catolico riba cual lo bira su destinacion of uzo pa futuro, mirando cu ta trata di un edificio cu tin un identidad religioso cune. Tin hendenan cu ta kere cu lo pone un hotel den dje, y bin cu actividad di fiesta pa nan.

Te ainda Stichting Monumenten Fonds Aruba no ta doño di edificio aki. E ta un propiedad di Lands Aruba. Pero e stichting aki ta considera e edificio aki como uno “hopi special,” segun Sra. Anne Witsenburg, kende ta directora di SMFA.

E ta un proyecto cu tin hopi restriccion y e stichting aki ta haya cu e restriccion aki ta bon. E tin restriccion riba e parti monumental y tambe den su historia. Como ex convento e ta un luga religioso of sagrado. Pasobra e tabata e residencia di e soeurnan, y ademas tin e kapel.

Sra. Witsenburg a declara na Bon Dia Aruba cu e pensamento di bin cu un hotel, y crea ambiente festivo den dje, no ta e concepto. El a splica cu e concepto ta pa traha un scol hotel chikito, manera un boutique hotel cu capacidad entre 20 pa 25 camber so.

E lo bira un luga unda nos studiantenan di e facultad di Hospitalidad y Turismo di Universidad di Aruba, por experencia locual nan a studia teoreticamente. Con e ambiente ta pa traha den un hotel. “E tin mas tanto un funcion educativo cu tur respet pa e pasado,” el a bisa.

E ta compronde cu na prome instante, ora cu e stichting a anuncia cu nan ta studiando e posibilidad pa e bira un hotel, hopi hende a enfoca riba dje. Pero el a bisa cu mas tanto e fundacion ta enfocando riba e parti educativo mas tanto.

Aunke e enfoke ta pa e bira un hotel, pero el lo ta un hotel scol. El a trece algun ehempel, entre nan esun di Corsou cu ta yama Herm Klooster hotel (Hotel’t Klooster). E ta un tipo di boutique hotel chikito, caminda cu “sumo respet pa pasado e hendenan por keda eyden,” el a bisa.

Pero tambe tin un proyecto similar na Hulanda cu ta yama lear hotel herm Klooster hotel. E ta un monumento di añanan 50, kiermen di e mesun periodo di Imeldahof Convent. E tin 21 camber y e ta cay bao un scol. Te hasta Papa Juan Pablo II a yega di keda den e hotel ey. “E ta e miho forma di respet cu bo por haya pa e historia religioso cu e luga tin,” el a bisa.

Te ainda Imeldahof Convent ta den man di Lands Aruba, pero no mucho cos a pasa. Mientras mas tempo ta core, e risico pa deteriora ta bira mas grandi. Den pasado tabatin Orthopedagogie Center den dje. Actualmente nos por compronde cu tin gewoon e cushina ta wordo uza. E stichting aki a ripara cu tin of tabatin algun training di e oficialnan di marinier cu por daña infrastructura di e edificio aki.

Ademas nan ta ripara cu no tin hopi hende cu por of cu kier inverti den algo asina, ya cu e no ta algo interesante comercialmente. “Ta p’esey nos tin e sentido cu mester haci algo,” segun Witsenburg.

Mirando cu e proyecto aki ta den e lista di fast track, gobierno a duna confirmacion pa SMFA por realisa e estudionan debido. Pero e siguiente paso ta si gobierno lo bende of duna e edificio ey, mirando cu e fundacion aki ta interesa riba su restauracion, y evita cu e lo por bira un ruina den futuro.

Tankinan di awa na Kibaima

Otro proyecto interesante y casi di e mesun caracteristica no comercial di Imeldahof Convent, pero cu otro dimension, ta e tankinan di awa na Kibaima. E tin di haci cu nos historia industrial cu ta bal la pena enfoca riba dje.

Witsenburg a indica cu di e cuater tankinan, dos di nan ta mustra bon pa pone agricultura den dje, pero di un manera innovativo. Otro tanki nan ta evalua si por bin cu un sorto di restaurant of tienda, unda lo wordo haci uzo di e frutanan of berduranan cu a wordo produci. Of pa bende den forma di mercado pa e clientenan. Y e di cuater tanki, eventualmente lo pone oficinanan den dje. E lo tin tur e facilidad necesario di un forma innovativo. Nan ta bezig si nan por inclui Camara di Comercio (KvK) y Land Aruba ya cu nan ta bezig cu e ‘incubator project’ pa duna oportunidad na companianan chikito.

 

Nan tin e confirmacion cu conseho di minister ta bay di acuerdo cu e estudio of investigacion haci riba e tankinan di awa na Kibaima. Pa tal fin, gobierno a brinda e servicio di nan departamentonan den e tereno aki.

Witsenburg a bisa cu nan ta tankinan cu tin alrededor di 90 aña bieu. Nan a wordo traha al estilo Art Deco pa e mesun arkitecto di water toren na Playa y San Nicolas. Esunnan di Kibaima ta cuater tanki, algun di nan den miho estado cu otro. E fundacion no tabatin cla kico lo por bira e proyecto aki, te cu aña pasa, nan a pensa riba tereno di agricultura.

Hulanda a brinda oportunidad di subsidio cu tabata pa Hulanda so pa nan haci investigacion riba: kico ta posibel den proyecto di e caracteristicanan aki. Den dje nan a haya un evaluacion di e construccion mes, y kico e fundacion por haci pa dun’e, dunando un funcion nobo, y si e ta factibel den e parti financiero.

Nan a cuminsa traha riba e estudio aki cu expertonan local y tambe Monumenten Bureau a duna su aporte den dje. Tambe nan a traha cu ayudo di BOEi foundation cu tin experiencia riba tereno di herencia industrial na Hulanda. SMFA ta na expectativa di e resultado final di e proyectonan aki.

LEAVE A REPLY

Please enter your comment!
Please enter your name here