A pone un minister cu a bay hiba su yiu Hulanda bolbe pa un reunion cu mester a resulta den su retiro. Pero ayera e reunion publico di Parlamento riba futuro di minister Marisol Lopez Tromp a laga basta pregunta atras. Sigur riba e cantidad di caso di corupcion cu el a topa den menos di seis luna di trabao y cu e lo a bay elabora mas riba nan, pero no a haya oportunidad. Esnan cu kier a retir’e a hala atras, a pidi suspension di e reunion y awor kier mediacion y no a ni entrega e mocion di desconfianza pa cual a yama e reunion publico.

Parlamentarionan di POR Dellanire Maduro y Alan Howell a pidi e reunion pa entrega e mocion di desconfianza contra nan minister. Y nan a haya sosten di lidernan di fraccion di RED y MEP. E intencion no tabata pa e reunion a bira uno tocante corupcion sino uno di un minister cu no por traha cu su partido y como tal lo mester bay.

Pero, contratonan pa trahador spirito, compania di parlamentario den Serlimar, proceduranan robez na DIP y un ‘gedoogbeleid’ pa permiti piscamento cu harpun y pa UTVnan drenta Parke Nacional Arikok, ta apenas algun di e casonan cu a yama mas atencion durante e reunion maratonico di Parlamento. Un reunion cu mester a nifica fin di e carera di minister Marisol Lopez Tromp den e gabinete aki. Pero e minister a haci uso di su prome tanda pa splica ampliamente cu e decisionnan cu el a tuma pa para e accionnan aki no por ta motibo di un crisis den gobernacion. Al contrario, nan ta cuadra cu e programa di gabinete Wever Croes cu ta pone hopi enfasis riba integridad.

Lopez Tromp a bolbe di Hulanda e dia anterior, pa asina defende su mes di acusacionnan, cu e mes ta bisa di no ta compronde. Pasobra unicamente locual el a haci ta maneha e departamentonan cu el a haya bao di su encargo fin di januari, na un forma mas transparente y integro posibel, particularmente despues di a topa cu hopi iregularidad.

Lider di fraccion di POR Dellanire Maduro tabatin palabra di elogio pa Minister President Evelyn Wever Croes kende ta wanta e pais aki stabil den un tempo di crisis. Sinembargo e no por a bisa mescos di su propio minister. Es mas, POR ta haya cu su minister no ta comunica, ni ta inspira confianza, duna respet y no ta sincero cu e partido. E no ta atende reunion di partido of ta laga warda riba dje pa final cancela reunion. Maduro a ilustra cu sin un relacion di comunicacion sincero, no tin confianza y como tal, ta sostene e pensamento di e otro minister di POR, cu sigui cu Lopez Tromp ta imposibel, den luz di garantisa gobernacion stabil. POR a kere cu e minister lo a tene honor na su mes dia 5 di Juni, ora cu a anuncia cu no kier sigui traha cu Lopez Tromp. Riba conseho di Prome Minister a dicidi pa bay den mediacion, pero a considera cu Lopez Tromp no tabatin interes. Maduro ta desaproba e forma con Lopez Tromp a papia contra su propio colega di partido, Minister Bikker, particularmente riba e temanan di UTV den Parke Nacional Arikok y piscamento di harpun. Hopi hende a perde trabao, mester di entrada y aunke tur hende ta para pa medio ambiente, mester tin balance. Particularmente si Fundacion Parke Nacional Aruba ta permiti jeep si drenta y tin un maneho diferente pa UTV, por ehempel. E enfoke di Conseho di Minister ta pa yega na punto comun y traha na interes general. Ademas, Maduro ta bisa cu na momento cu Minister Bikker a declara di no lo atende reunion di Conseho di Minister si Marisol Lopez Tromp no tuma honor na su mes. “Esey lo tranca gobierno y Aruba mester di su gobierno awor aki.” E parlamentario a sigui bisa cu siete Minister a duna señal dia 24 di Juli di no kier sigui traha cu Minister Lopez Tromp y a kita su carteranan caba. “Y contrario na Parlamento, nos no conoce un minister independiente. Nos a spera di e minister di tuma honor na su mes y entrega e puesto.” Maduro a enfatisa cu esey no ta kita afo cu no mester investiga corupcion, pero cu e problema ta e funcionamento di e minister den un gobierno.

Su colega Alan Howell tambe a bisa cu trankilidad den Gobernacion ta mas importante cu cualkier cos na e momentonan aki y cu aunke cu e tema di mocion di desconfianza no ta agradabel, e situacion di funcionamento di Conseho di Minister, unda un minister di POR y sosteni pa otro 6 minister no kier traha mas cu Lopez Tromp ta uno di gravedad. Howell a bisa cu ningun momento ta acusa e minister di corupcion, al contrario. Pero cu e relacion cu POR no tey mas y cu ningun otro minister tin e confianza pa sigui traha cu Lopez Tromp. Y cu mester pidi e minister pa retira pa gobernacion por sigui.

Parlamentario independiente Daphne Lejuez tabata e prome pa a hiba palabra y a ilustra e pasonan legal pa por pidi retiro di un minister, y cu un problema den Conseho di Minister no por ta e argumento. Es mas, e no por compronde e urgencia di e reunion. “Kico ta clasifica e urgencia, cu no por a warda 10 dia, cu ta basicamente 5 dia di trabou, pa asina por trata esaki sin cu mester a interumpi plannan personal.” Lejuez tabatin hopi pregunta a base di kico Parlamento por a pidi un mocion di desconfianza, mirando cu segun Constitucion, ta si e Minister a haci algo iresponsabel contra Parlamento por pidi su retiro.

E mesun pregunta ta locual e Parlamentarionan di AVP cu tabata presente tabatin, esta kico ta e motibo di e desconfianza contra minister Lopez Tromp.

Miembronan di fraccion di MEP a enfoca riba e importancia di stabilidad den gobernacion, particularmente den contexto di e crisis financiero, e impacto di Covid, y negociacionnan cu Hulanda. E disputa interno di POR, a bira uno nacional segun Rocco Tjon. “Y mi ta fiel na locual mi a siña, esta cu memey di crisis mester di claridad y transparencia.” Pero pa pueblo, e ta mas importante pa haya e garantia cu gobierno ta sigui, despues cu a topa cu mal maneho, corupcion y a tuma pasonan pa evita corupcion. Otro miembronan tabata puntra e minister kico e lo haci pa kibra e impasse y si e ta compronde posicion di Prome Minister.

Sinembargo, e tono di e reunion a cambia na momento cu Ricardo Croes di RED a hiba palabra. E parlamentario a bisa cu no ta pasobra el a firma e carta pa yama e reunion ta nifica automaticamente cu e ta cla pa sostene e mocion. Su intencion tabata pa duna e minister e oportunidad pa defende su mes. Pero locual tabata yamativo ta cu Sr. Croes a mustra cu documentonan unda cu siete minister, incluso minister Rudy Lampe, lo a bisa di no kier sigui traha cu minister Lopez Tromp, no ta cuadra cu realidad. Es mas, na final, ta e ponencia di Ricardo Croes a resulta di ta pakico a pidi pa schors e reunion. Pasobra berdad a resulta cu aunke cu minister Lampe a firma un documento pa duna Prome Minister e tarea temporal pa tuma encargo di e cartera di minister Lopez Tromp, ningun momento a firma e documentonan pa bisa cu no por traha mas cu e minister.

Y esaki tabata e ponencia di Lopez Tromp durante e reunion. Pasobra e documentonan aki tabata prepara pa e comision di mediacion, encabeza pa mr. Arie Swaen. Pero segun Lopez Tromp, e comision aki a papia cune diasabra prome cu el a biaha, pero no tabata un mediacion. Y pio, ayera den Parlamento, el a ricibi copia di e documentonan cu no tabata ni inclui su contestanan ni tampoco e anexonan unda supuestamente e siete ministernan a firma di no kier sigui traha cu su persona.

Pero e remarke ey na comienzo di su defensa, no tabata mustra di lo a bira uno asina impactante. Pasobra su ilustracion di tur e casonan di corupcion y problema financiero cu el a topa tanto na Serlimar como DIP ta locual a capta tur atencion.

Lopez Tromp a splica con el a bira minister y a acepta e cartera, despues di a pasa un investigacion di antecedente rigoroso. E tabata e prome minister pa pasa e proceso nobo aki. Y como tal, el a bisa di tabata hopi consciente di su responsabilidad. Y como parlamentario por haya informacion di ministernan, pero como minister ta haya un otro bista di e problemanan. Y e problemanan tabata imenso.

Pa cuminza, a topa cu un Serlimar cu yen di contrato priva, pero sin placa y un director cu no tabata haci su trabao. A retira e director, a pidi surseance di pago pa restructura y scapa e compania. Parlamento a bay di acuerdo cu un suma adicional di 6 miyon pa scapa Serlimar y aunke e placa no a yega completo, por a sigui danki na e pasonan legal. Pero e compania a stop contratonan priva, entre otro di casa di parlamentario Alan Howell. Tur e decisionnan pa sanea Serlimar a crea e prome tensionnan cu POR. Pero segun Lopez Tromp, no tabatin tempo pa bay reuni, pasobra Covid a dal y e trabaonan mester a sigui.

Banda di Serlimar, a topa cu yen di procesonan dudoso den otorgamento di tereno den DIP y mester a cuminza cu un investigacion y aki tambe a suspende hende yega na su propio partido. Atrobe el a haya keho di dirigencia di POR, pero no a reuni pa motibo di falta di tempo. Segun Lopez Tromp e tabata avisa e partido cu su oranan tabata largo pa purba atende tur e situacionnan. No tabata situacion facil pero cu e tabata dispuesto pa soluciona.

Locual a bira un punto di tension grandi tabata e ponencia di su colega minister di Husticia riba piscamento cu harpun y tambe e UTVnan. Pa loke ta e prome, e Minister a bisa cu ambos ta cay bao di su responsabilidad y e lo no actua contra tratado ni ley. Tanto minister Bikker como minister Chris Romero tabata kier pa el a firma un asina yama ‘gedoogbeleid’ pa permiti piscadonan usa harpun, ademas di pisca especienan cu ta protehi pa ley. Basa riba consehonan di Directie Natuur en Milieu y Comision Flora y Fauna, el a bin cu sugerencianan pa piscamento cu harpun, pa mara esaki na condicion estricto pero ya e relacion cu minister di Husticia a daña. Pa loke ta UTV, esey ta un asunto di Fundacion Parke Nacional Aruba cu ta autonomo y e no ta bay

mina nan maneho.

E Minister a tuma tres ora pa splica na placa chikito tur e problemanan cu el a topa, entre otro salarionan halto pa personanan cu nunca el a mira, y kendenan lo tabata traha na su despacho. El a yama nan ‘spirito’. Nunca el a topa nan, no tabatin ni adres conoci. Pero si tabata paga salarionan cu ta mas halto cu hasta algun director di departamento tabata ricibi. Ora cu el a stop e pagonan, partido POR a bolbe hala su atencion.

Marisol Lopez Tromp a referi directamente na lider di POR Otmar Oduber di a sigui mete den asunto di gobierno y su cartera en particular, ya cu Oduber a pesar di a retira como minister, a bolbe como consehero di minister Bikker. Lopez Tromp a corda tur cu e casonan coruptivo den DIP a produci e investigacionnan Avestruz y despues Flamingo, unda a investiga cas di Sr. Oduber y “mi no kier pa Flamingo haya mas yiu.” E Minister a bisa di lo tabatin mas informacion di casonan di corupcion di tereno, casnan na Seroe Colorado, y otro, pero lo a laga nan pa e di dos tanda.

 

Tabata na momento di su di dos oportunidad pa hiba palabra cu Ricardo Croes di RED a exigi pa busca e documentonan cu e minister no a ricibi. E tabata kier a mustra cu minister Rudy Lampe nunca a firma un documento pa mustra di kier pa Lopez Tromp tuma su retiro. A suspende e reunion pa mas di un ora.

Pero tur cos a para, despues cu Dellanire Maduro, despues di otro pausa, a pidi pa suspende e reunion, pa studia e documentonan, pasobra el a realisa cu Parlamento tabata falta informacion pa por a sigui cu e reunion publico. Pero tambe a haci peticion na Minister Lopez Tromp pa sigui cu mediacion. Tur esaki sin cu ningun momento a presenta e mocion di desconfianza. Presidente di Parlamento Ady Thijsen a honra e peticion, y a puntra Minister Marisol Lopez Tromp si e tabata dispuesto pa sigui cu mediacion. Y asina a clausura e reunion, bao protesta di particularmente parlamentarionan di AVP, kendenan a mustra cu nan si tabata kier a tende di tur e casonan di corupcion cu e Minister lo a presenta ainda. Pero na final Mr. Thijsen a cera e reunion, sin pone un fecha ki tempo e reunion lo continua, y si e lo continua mes. En todo caso, Marisol Lopez Tromp ta minister ainda, encarga cu Ordenanza Teritorial, Infrastructura y Medio Ambiente. Y aunke coalicion no kier a mishi cu temanan di corupcion, tabata netamente e avalancha di caso di corupcion cu e minister a topa, a domina henter e reunion ayera.

 

LEAVE A REPLY

Please enter your comment!
Please enter your name here