Durante e XXVI Congreso Constitucional di Federacion di Trahadonan di Aruba (FTA) cu a tuma luga siman pasa riba Flexibilisacion Laboral a bin como invitado for di Mexico Salim Kalkach Navarro, sub-secretario di Confederación Revolucionaria de Obreros y Campesinos (CROC) y Tesorero di Alternativa Democratica Sindical de las Americas (ADS).

Kalkach Navarro durante un entrevista na Bon Dia Aruba a splica cu el a wordo invita door di su compañeronan sindicalistanan di FTA door di e experiencia cu e tin na Mexico pa loke ta trata flexibilisacion laboral ya cu e ta forma parti di e di dos organisacion mas grandi na e pais ey.

El conta cu su experiencia den congreso aki tabata hopi interesante na unda cu e seminario aki a sirbi como instrumento pa intercambia puntonan di bista y con ta resolve un problema como reforma laboral of flexibilidad na diferente paisnan.

“Na final e parti mas importante ta cu mi pais a cambia di optica, el asunto di sub-contract a bira un asunto di Estado na unda cu gobierno a tuma e decision di cambia e reglanan, esaki pa nos ta bon pasobra tuma un decision corecto”, Kalkach Navarro a conta.

Asina mes, el a splica cu durante 20 aña Mexico a laga cu sub-contratacion sigui crece, empresanan grandi a cuminsa contrata trahadonan pa asina nan bay traha den diferente servicio, e number di trahadonan cu sub-contract a surpasa e cifra di 4 miyon y door di esaki e banco mas grandi na Mexico cu ta BBVA Spaño cu capital na Mexico cu mas di 37.000 trahado, tabatin casi henter e cifra aki cu sub-contract, ora pandemia a haci impacto na nivel mundial, Kalkach Navarro a bisa cu a cuminsa haya hopi cancelacion di contractnan y retiro sin pago, companianan grandi di outsourcing y sub-contract a cancela tur contractnan sin ningun responsabilidad social loke a causa un crisis di Estado.

Kalkach Navarro tambe a menciona cu di 900 compania di sub-contract 337 tabatin registro na secretaria di Trabou, 100 so tabata registra na siguridad social y 40 so tabata paga impuesto, pa loke a cuminsa ripara cu sub-contract tabata un mecanismo pa evita pago di impuesto y ademas pa evita responsabilidad laboral.

Aworaki, gobierno di Andres Manuel Lopez Obrador for di 1 di september a cambia e ley na unda esaki no ta posibel mas, pa motibo di esaki 2 miyon di trahado cu sub-contract den menos di tres luna a cuminsa traha cu e compania principal.

Hubert Dirksz cu awor ta fungi como tesorero di FTA a splica cu e situacion na Mexico ta diferente compara cu esun di Aruba, pa motibo cu nan a bay den sub-contratacion y esey tabata pa hopi tempo caba cu a causa un desaster na e pais ey, na Aruba tambe ta pa basta aña caba pero esaki ta regula pa ley y ley di contratacion ta limita pa con ta haci e contratacion directo, pero e problema awor ta cu companianan kier tin flexibilisacion cu nan kier elimina condicion cu nan tin cu contractnan di construccion loke ta causa problema.

“E caminda ta habri pa contrata un trahado ki ora cu ta, pa cuanto cu ta, sin condicion, esey a causa problema tur caminda”, Dirksz a señala.

Loke e companianan kier den e flexibilisacion ta algo diferente cu ta cu nan kier espacionan habri pa move trahado na unda ta desea y ki ora nan ta desea, y pa esey nos ta bisa cu mester keda riba nivel corecto y mester wordo regula” Dirksz a finalisa.