Siman pasa e parlamentonan di e cuatro paisnan di Reino Hulandes a reuni atrobe, manera ta sucede dos biaha pa aña. Manera sa pasa mas vez, no a sali tanto resultado for di e reunionnan y nos no por kita e impresion cu e encuentro periodico ta birando mas y mas un ceremonia obligatorio, sin cu tin avance berdadero pa ningun.

Esaki lo no ta nada straño tampoco, pasobra ta e parlamentonan ta reuni, y no e gobiernonan ehecutivo cu concretamente ta formula y ehecuta un maneho. E ultimo aki naturalmente si tin maneho, loke riba e islanan no semper ta garantiza. Pero esey como observacion den banda. En todo caso, den e situacion mas faborable e paisnan ta yega na un consenso riba cierto tema, y ta carga e responsabilidad pa comunica cu nan ehecutivo riba e acuerdonan, loke finalmente por resulta den legislacion efectivo. Si no tin iniciativa directamente di parti di ehecutivo, parlamento mes por tuma iniciativa pa tal legislacion, loke no semper lo ta e caso, cu e pregunta si finalmente ta yega na implementacion di loke a acorda.

Mas tanto por observa cu despues di cada encuentro cada delegacion ta bay nan cas, cu cada partido presente cu nan mes pensamento cu no necesariamente ta cuadra, ni cu e linea di pensamento mayoritario expresa pa e lider di delegacion, ni cu loke a keda palabra finalmente den e ‘Afsprakenlijst’ di IPKO. Hasta den caso cu tin consenso aparente, manera den e caso di e famoso ‘geschillenregeling’, e areglo di disputa entre paisnan insular di Reino y gobierno di Reino, cu a haya un consenso varios aña pasa di tur delegacion, tambe esun Hulandes, y te awe ainda no ta yega na tal areglo. Y esaki, pa algo cu tur delegacion sa masha bon: gobierno ehecutivo Hulandes bao di ningun condicion ta bay somete su mes na cualkier situacion unda na nivel di Reino nan lo ta suheto na posicion tuma – eventualmente conhuntamente – pa e partnernan isleño. Ni masque cuanto e islanan ta ‘team up’, hasta cu apoyo parlamentario Hulandes, esaki no ta bay sucede.

Loke si por pasa ta cu riba puntonan menor, manera mas presencia y voz pa e delegadonan di e islanan den por ehemplo tratamento di leynan di Reino den parlamento Hulandes, ta bin mas posiblidad. Pero esey no ta mas cu adorno, mientras pa varios aña varios politico di e islanan ta boga pa ‘igualdad’ den Reino. Hamas lo tin un situacion unda e islanan por ‘outvote’ Hulanda, e situacion lo no surgi nunca. Esaki tin tur cos di haci cu nos pasado conhunto, unda e teritorionan colonial tabatin un opcion pa keda den Reino, manteniendo derecho di autodeterminacion, cu e islanan por eherce, birando entidad independiente…, si algun dia nan poblacion dicidi den mayoria suficiente cu esey lo ta e futuro. Un di e motibonan ta, y nos no a tende nos politiconan bay contra esaki, cu mester tin un garantia di bon gobernacion na e islanan, pa garantiza bon gobernacion pa e ciudadano Hulandes, cu ta nos, e poblacion di e islanan. Esey ta un responsabilidad cu no por coresponde na e gobierno di e isla, sino ta algo di e totalidad cu yama Reino Hulandes. Esey ta e dualidad den e Statuut, cu un banda di colaboracion a base di igualdad, y di otro banda e supervision pa garantiza bon gobernacion.

Awor, gobierno local semper ta purba ‘rek’ e posibilidadnan pa optimaliza nan poder politico. Pa esey por tin comprension di un banda y ta yama pa tratamento di disputa den Reino di un manera razonable. Sin embargo, loke e islanan ta purba logra cu ta bin un instancia hudicial cu ta duna veredicto imperativo contra Reino Hulandes, lo no mira luz di dia nunca, segun nos opinion. Ta pesey, despues cu parlamentarionan Hulandes a formula algo asina cu e islanan, nan propio partidonan a para e asunto ey y no a bin un propuesta di ley asina cu lo a mara man di gobierno Hulandes. Den IPKO por papia y palabra kico cu ta, esey no ta representa e berdadero poder politico den e partidonan clave na Hulanda.

Cu esey anto como meta inalcanzable, kico ta e cosnan cu si por sali como asunto util y razonable for di e consulta entre parlamento? Tur e asuntonan cu por regla centralmente den ley di Reino, pero cu e islanan mes por regla tambe cada un separadamente, basta tin un union di pensamento y ta crea leynan concordante na e diferente partinan di Reino. Di e manera aki ta posible cu e islanan ta percura diligentemente pa legislacion propio, evitando asina cu finalmente ley di Reino ta bira necesario y ta impone esaki riba nan cabez, pa despues nan bay grita… Y ta aki ta unda e islanan mes ta fayando grandemente. Por ehemplo, tin un retraso grandi den legislacion pa duna cumplimento na tratadonan internacional cu a bira vigente pa e islanan. Bo kier keda sin cumpli te dia cu na Hulanda nan bisa bo cu nan ta hinca e asunto den un ley di Reino? Esey ta loke a pasa concretamente cu e supervision financiero, cu ta bira ley di Reino, despues cu e propio gobierno aki a sabotea e ley di Aruba mes. Awor para pa e consecuencia.

Pa bolbe na e utilidad di IPKO: Nos ta mira esaki solamente si parlamento, y e partidonan envolvi, tuma esaki como estimulo pa actua den cas propio, y no mira e encuentro como oportunidad pa mahadera tocante asunto inalcanzable. Esey por bira realidad?

LEAVE A REPLY

Please enter your comment!
Please enter your name here