Irak a pasa un resolucion pa pidi militar stranhero pa bandona e pais, despues di asesinato di general Irani, Qasem Soleimani na aeropuerto di Bagdad mediante un atake di drone.

Parlamento tambe a pidi pa entrega un keho formal na Nacionnan Uni pa violacion di soberania Iraki na man di Merca. Casi cinco mil soldaat ta den Irak como parti di un coalicion internacional contra Estado Islamico (Islamic State, IS). E coalicion a pausa operacion contra IS na Irak.

E morto di Soleimani a aumenta tension entre Washington y Tehran. Bou di su liderazgo, Iran a reforsa Hezbola na Lebanon y otro gruponan militante pro-Iran, a expande nan presencia militar na Irak y Siria, a orkestra e ofensiva Sirio contra gruponan rebelde den e guera civil largo na e pais.

Irak ta den un posicion dificil como aliado di Iran, cu ta exigi vengansa pa matamento di Soleimani. Gobierno di Bagdad ta mira e asesinato di e general como un violacion di e terminonan di presencia di e coalicion.

Mientras tanto, ta existi e preocupacion cu algun parti di poblacion Iraki cu ta simpatisa cu Iran ta aliena pa e asesinato, y cu gruponan militante pro Iran por busca vengansa. E resolucion a wordo aproba pa parlamento despues cu prome minister interino, Adel Abdul Mahdi a pidi pa un fin na presencia militar stranhero den un discurso na parlamentarionan.

“Gobierno di Irak mester traha pa pone fin na presencia di militar stranhero riba suelo Iraki, prohibi nan pa uza su tera, espacio aereo of awa pa cualkier motibo”, el a bisa. Ademas gobierno tin cu presenta un keho formal dilanti ONU contra Merca ‘pa nan violacion di soberania y siguridad Iraki’.

Prome cu e voto, e prome minister a bisa cu presencia militar Mericano den e pais mester stop lo mas pronto posibel. Segun Abdul Mahdi, un fin na presencia militar di Merca na Irak ta miho pa reorganisa relacion mas saludabel y corecto cu Merca y resto di estadonan.” E Operation Inherent Resolve, manera e coalicion internacional ta conoci formalmente, a anuncia cu ta stop operacion contra IS pa proteha militar Mericano, Britanico y otro tropanan stranhero basa na Irak.

Merca a conseha tur su ciudadanonan pa bandona Irak y a desplega 3.000 efectivo militar adicional na medio oriente. Presidente Donald Trump a adverti Iran severamente cu cualkier atake di vengansa contra ciudadano Mericano lo resulta den represalia.

Analistanan ta bisa cu Iran por desplega atake cibernetico contra Merca, of lo purba ataca obhetivo of interes militar di Merca den medio oriente.

 

LEAVE A REPLY

Please enter your comment!
Please enter your name here