Iraq ta sentencia 27 homber cu castigo di morto

Iraq a sentencia 27 prizonero cu castigo di morto pa nan parti den e masacre di 2014 cu a mata mas cu 1.700 hende den teritorio controla door di ISIS. “Central Criminal Court” a publica un veredicto cu 27 persona acusa di a participa den locual ta wordo conoci manera e Speicher Massacre, sin embargo, e decision ainda por wordo apela. Esaki ta e di dos conviccion enorme relaciona cu e masacre aki cu miembronan di ISIS a ehecuta den 2014.

ISIS a publica algun video despues di e masacre aki cu ta mustra un fila di militarnan Iraqi marchando cu arma den direccion di nan cabes. Despues ISIS a publica e imagennan di e masacre riba internet. Den 2016, Iraq a horca 36 hende cu a forma parti di e masacre.