Gobierno di Jamaica a bisa dialuna pasa cu a “adkiri” propiedad di e 49% di accionnan di PetroJam, cu tabata den man di e empresa estatal Venezolano Pdvsa. Asina gobierno di e isla, a base di un ley aproba na februari di e aña aki, a bira 100% propietario di e empresa petrolero, di cual gobierno tabata propietario caba pa 51% di accion, den e joint venture cu Pdvsa.
E decision di Jamaica a bin algun dia despues cu e hunta temporal di administracion di Pdvsa, nombra pa e lider opositor Juan Guaido, a pidi gobierno di Jamaica pa no tuma control di e accionnan cu Pdvsa tabatin, den un severo crisis di gobernabilidad cu regimen di Maduro ta enfrentando.
Robert Nesta Morgan, secretario di prome ministro di Jamaica, Andrew Holness, a bisa cu nan a ricibi e carta manda pa e ekipo di Guaido y a manda esaki pa oficina di procurador general.
“Sinembargo, e accionnan awor ta propiedad di Jamaica,” Morgan a bisa den un comunicado, den cual e ta detaya cu e fondonan pa e pago di e accionnan ey a keda deposita riba un cuenta garantisa en espera di presentacion di reclamo.
Ambos socio no a logra ehecuta plannan di modernisacion di e planta di refinacion, cu a bira mas dificil ainda despues di e sancionnan cu Merca a impone riba regimen di Nicolas Maduro.
Jose Ignacio Hernandez, representante legal di Guaido den exterior, a splica cu su persona y presidente di e hunta directivo temporal di Pdvsa, Luis Pacheco, “ya a solicita cu cualkier compensacion mester keda negocia cu e gobierno legitimo di Venezuela.”
