E situacion economico den paisnan di Centroamerica ta influencia directamente emigracion. Ta p’esey cu paisnan manera Guatemala, Honduras y El Salvador mester aumenta nan entrada ‘per capita’ te por lo menos 8.000 dollar pa aña, pa por enfrenta e problema aki, cu ta causa exodo masal di nan ciudadanonan, segun economistanan.
Instituto Peterson pa Economia Internacional (PIIE) a calcula cu e tres paisnan aki lo mester di por lo menos 18 aña pa eleva nan entrada nacional te alcansa e obhetivo cu presidente Donald Trump ta propaga, pa baha migracion te na un minimo.
PIIE a pone como ehemplo Mexico, cua yega na e nivel di prosperidad ey na 2005 y a cuminsa disminui su migracion pa Estadonan Uni, pa cual awe e ta mas bien un pais di transito pa ciudadano di otro pais, entre nan esunnan di Centroamerica, pero tambe di Caribe, Suramerica y hasta di Africa.
“Pa migracion baha, El Salvador y Guatemala mester duplica nan entrada per capita actual, mientras cu Honduras lo mester hacie tripel di loke e ta awor,” Anabel Gonzalez, miembro senior di PIEE, ta splica y ta expone cu e PIB per capita na 2017 na El Salvador tabata 3.889 dollar; na Guatemala 4.471 dollar; y na Honduras algo menos di 2.500 dollar. Tur ta nivel mas abao cu e 9.244 dollar di promedio di America Latino y Caribe.
“Si Fondo Monetario Internacional (IMF) ta indica cu e crecemento potencial pa Centroamerica ta keda na 4 % di promedio durante 2015 pa 2020, por tuma Guatemala y El Salvador, cu por mantene e ritmo di crecemento aki, entre 17 y 18 aña, pero pa Honduras e reto ta mas grandi ainda,” e specialista den e reporte di PIIE ta bisa.
