Jerwin Giel 7 pa 8 aña despues di su diagnostico di cancer: “Mi kier ta un inspiracion pa otronan”

Awe mundo ta celebra dia Mundial di Cancer. Un dia dedica na conscientisacion y prevencion di un enfermedad cu hopi na mundo ta perde nan bataya contra dje, pero hopi cu tambe ta gana e lucha y ta sigui bringa e bataya te na final.

Jerwin Giel ta un hoben cu alrededor di shete pa ocho aña pasa mester a enfrenta e realidad na momento cu el a ricibi e noticia cu hopi ta spera cu nunca nan lo mester ricibi den nan bida. E noticia cu e tin cancer. Den un entrevista cu Bon Dia Aruba e ta conta su storia y unda e ta para awe despues di su lucha contra cancer testicular na un edad jong.

Giel ta conta cu tur cos a cuminsa cu un dolor di lomba cu e no por a splica. El a bay dokter varios luna pa e dolor di lomba ey y el a haya tur sorto di pildo pa e dolor, pero nada no a kita e dolor.

Despues el a ripara cu su produccion di zaadcel a cuminsa bira menos y un dia sinta den gym mientras e tabata train, un di su testiculonan a krimp y den e krimpmento el a sinti un dolor cu e no por a splica, un dolor cu nunca el a experiencia si e mester compar’e cu algo otro.

Den e mesun siman, Giel ta sigui conta, el a bay dokter y el splica e dokter full e situacion, cu su produccion di zaadcel ta practicamente nada, e dolor di lomba y awo e dolor di su testiculo. “Ora mi a bay mishi cune e tabata sinti duro, manera piedra. E dokter su wowo a manera habri pasobra ya caba mi tabatin 6 pa 7 luna cu e dolor di lomba,” el a bisa.

El a sigui splica cu despues su dokter di cas a mand’e cerca Dr. Moreta y a pidi’e pa bay saca sanger y haci potret di su lomba, pero Giel, jong y poco rebelde, a bay saca sanger so y no potret di lomba.

“Mi ta corda e fecha, 13 of ta 16 di december mi tabata den klas y Moreta a yama mi puntra mi unda mi ta. El a bisa mi pa mi sali for di klas, bay hospital, saca potret y bay cu e potret cerca dje. Eynan caba mi a saca afo, mi a conclui cu esey no ta e proceso normal pa haci trabou,” el a remarca.

Despues di saca potret di su lomba el a bay oficina di Dr. Moreta y el a haya e noticia cu e tin cancer di testiculo etapa 3-4. “Asina mi a haya sa cu mi tabatin cancer. Mi a bis’e pa yama mi familiarnan pasobra ami ta un hende cu gusta haci joke y si ami bisa nan, nan no ta bay kere mi,” el a indica.

Giel a sigui splica cu e mesun momento ey dokter a bis’e pa drecha su cosnan pa e drenta hospital di biaha pasobra pa e siguiente dia ya caba e mester a opera pa saca e tumor madre cu tabata su testiculo banda drechi. Despues di e operacion Giel a pasa Pasco cu famia na cas y e siguiente siman e mester a acudi pa su prome sesion di kimoterapiatherapie.

Cada ciclo di kimoterapia tabata dura 21 dia y Giel a haya cuater ciclo en total. Durante cada ciclo, el a indica, pa cinco dia stret e tabata haya kimoterapia y riba dia 9 cu 16 e tabata haya kimoterapia los den oncologia. Durante e cinco dianan ey e mester a keda den hospital y cada dia mi tabata haya dos pa tres saco di kimoterapia y riba diabierna e tabata esun di mas pisa.

“Ami semper ta busca e parti bon den situacionnan malo y ora mi a haya sa cu ora bo ta haya kimoterapia bo tin derecho di pidi kico cu bo kier di come, ami a probecha y purba haci’e leuk pa mi,” el a recorda.

El a conta cu pa e prome dos ciclonan su curpa no a reacciona malo manera nan tabata spera. El a recorda cu el a cuminsa sinti malo durante e di tres ciclo y eynan el a ripara cu su cabey a cuminsa cay, el a cuminsa sinti flauw sin energia. “E kimoterapia ta asina fuerte cu bo ta haya e smaak den bo scupi, bo ta haya e holo den bo orina, holo den bo af, e ta echt hole kimico. E ta mata e celnan malo, pero e ta mata e celnan bon tambe,” el agrega.

Pa loke ta e efectonan fisico di e kimoterapia, el a conta el sintinan di biaha. Despues di su prome dia di kimoterapia el a ripara cu en berdad el a lanta sin dolor, pero su horea tabata fluit, fluit manera cu un klapchi a rementa patras di su Korea of cu un zonido hopi duro a rementa, y te dia di awe ainda e ta asina.

“Pero ya aworaki mi a bira selective hearing. Ora cu hende bisa mi algo cu mi no tin gana di tende, mi ta haci manera cu mi no a scucha. Atrobe mi ta purba saca algo bon di e situacion menos agradabel,” Giel a bisa.

El a corda tambe e prome biaha cu su cabey a cuminsa cay. El a conta cu el a realisa den klas cu su cabey a cuminsa y na e momento ey su mes a tuma e decision cu e ta kita su cabey pasobra e no ta bay lag’e dicidi ki ora e ta cay.

Giel a conta cu un di memorianan mas leuk ta durante aña nobo cu el a pasa den hospital. El a pidi permiso pa bay tira klapchi den parking lot y pe esaki tabata algo hopi leuk pasobra ora el bira wak patras tur hende tabata wak e for di e bentananan.

“Durante e proceso mi tabata wak e banda positivo y mi tabata keda un persona alegre, pero inconscientemente mi ta tabata birando un persona miserabel. Miserabel den e sentido cu mi ta mustra contento pafo, pero di paden mi tabatin gana di yora y esey mi a realisa despues cu tempo,” el a remarca.

Despues cu el a caba cu su ciclonan di kimoterapia, Giel ta sigui conta, el a pensa cu e ta cla, pero dos dia despues nan a inform’e cu e tin cu bay Hulanda pa opera. Nan no bis’e na Aruba ki tipo di operacion e ta bay ta y el a bay cu e pensamento cu e ta algo chikito. Pero pa su sorpresa ora el a yega Hulanda nan a bis’e ki tipo di operacion e ta bay ta.

“Nan a bisa mi e momento ey cu nan ta bay habri mi full, nan ta bay saca tur mi lymphnodes pasobra door di e kimoterapia mi lymphnodes a bira teratoom. Esey kiermen cu nan ta cuminsa haya djente, cabey, huña etc. y nan kier a saca tur e lymphnodes cu a bira teratoom,” el a bisa.

Giel a remarca cu te na e momento net prome cu e mester a drenta e camber di operacion, ta prome baha cu el a yora den full e proceso di tratamento. “Mi tabata yora te snik y mi no por a stop. Mi djis no por stop, ni cu mi tabata kier of purba. E nursenan tabata puntra mi pa calma mi pero mi tabata hari y yora, e djis kier a sali afo. No ta cu mi tabata kier yora, djis e mester a sali afo.”

Por ultimo Giel ta enfatisa cu aunke e ta conta su storia for di su perspectiva cu un punto di bista di un mente fuerte y actitud positivo, e ta remarca cu si no ta pa su ekipo di apoyo, tur esunnan cu a yud’e di un of otro manera, e experiencia tabata diferente, pero e ta sigur cu sin nan probablemente e no lo ta para unda e ta para aworaki.

“Mi ta keda semper agradecido na tur cu a yuda mi y na Dios. Mi kier ta un inspiracion pa otronan cu un mente fuerte bo por pasa tur obstaculo cu bin den bo caminda.”