Jerwin Giel deportista y entrepreneur cu un curason di oro: “No ta costa bo nada pa ta un bon hende”

Jerwin Giel ta un hoben di 33 aña di edad deportista y entrepreneur. Jerwin ta conoci pa hunga futbol pa hopi aña y algun aña atras el a dicidi di colga su sapatonan di futbol y cuminsa un aventura nobo den e sport di coremento y triatlon.

Den un entrevista cu Bon Dia Aruba, Jerwin ta conta el a cuminsa train coremento na momento cu Romar Arends, su mentor, tabata practica coremento y landamento mientras cu e tabata train futbol. El a realisa cu aunke e tin amor y pasion pa e deporte di futbol, e tabata kier haci e transicion di un deporte den ekipo pa un deporte individual y asina el a dicidi pa stop di hunga futbol.

“El a dura mi tres aña pa mi stop futbol pasobra mi tin pasion y amor pa e deporte y semper mi a pensa cu e deporte ey ta locual a tene mi den bon caminda cu mi por a biaha conoce mundo. Pero a yega un punto cu mi a bisa mi mes mi kier wak di kico ami ta capaz. Mi ta wak mi curpa manera un tempel y mi ripara cu sali y bebemento ta leuk, pero mi kier wak con leu mi por yega cu deporte y asina mi a cuminsa tuma e cos na serio y mi a cuminsa dedica tempo y bao di guia di Andy Gomes mi a yega na un otro nivel”, el a splica.

Jerwin tin tres aña participando den e competencia Ronde van Aruba E ta conta cu su prome aña el a participa cu un ekipo di Colegio San Antonio cu tabata consisti di dos ex-alumno y dos docente actual “y asina mi a haya e dushi di ronde mi prome aña”. E ta splica cu e ta un hende cu ta gusta desafia su mes, e gusta saca su mes for di su zona di comfort y el a dicidi e siguiente aña pa participa den e categoria duo.

Na final Jerwin hunto cu Amadee Nicolaas a participa den Ronde van Aruba y a logra sali segundo luga. E ta conta cu e aña aki e idea tabata pa participa den e categoria duo un biaha mas pero e team di Viper Strong a propone pa join e categoria di cuater pa kibra e record di Aruba. Jerwin hunto cu e otro coredonan a logra kibra e record y sali na prome luga na Ronde van Aruba di e aña aki.

“Tur e cosnan aki ta bin cu sacrificio cu nos cada un ta haci, e no ta un hende so ta logra kibra record, tur hende mester a pone di nan parti y esey ta e dushi di Ronde van Aruba, bo ta depende di otro pa bo logra yega”, el a agrega.

Jerwin su meta pa otro aña den Ronde van Aruba ta pa haciele su so. E motibo pakico e kier haciele su so, e ta splica, ta pasobra ora cu el a wordo diagnostica cu cancer y a bira malo el a keda cu diferente dificultadnan y dokternan a bis’e cu nunca el lo por haci deporte atrobe. “Esey ta nan palabra pero ami ta cana tur dia y mi ta sinti mi ta bendiciona, cu Dios ta guia mi y despues cu mi a bira malo mi a bay gym back coy forsa y mi a logra hunga futbol back”, el a conta.

Despues di hunga futbol pa 4 aña mas o menos y aworaki cu e ta practica coremento, Jerwin ta bisa cu e ta sinti cu e ta den e miho forma cu el a yega di ta incluso prome cu a pasa den cancer. “Aworaki mi ta den best shape ever cu mi tabata”, el a bisa, “Por ehempel e aña aki mi a caba na 11 luga di Aruba su miho coredonan y den mi categoria di 30 pa 34 aña mi a caba na di dos luga. Ami no ta limita mi mes na loke dokter ta bisa mi. Mi ta prefera di purba pa wak si di berdad esey ta limite si of no”.

Apart di ta un deportista, Jerwin ta considera su mes un entrepreneur ya cu e tin dos negoshi cu e ta dirigi. One Touch Response ta un ‘panic button’ pa hende grandi y Design Centrum ta un oficina di arkitecto. E ta conta cu e idea pa cuminsa cu One Touch Response a nace na momento cu su mesun wela, un persona grandi a cay na su cas y no tabatin con pa yudele di biaha. Na momento ey el a dicidi di actua riba su idea y traha pa yuda personanan cu tin mester di dje.

Jerwin ta splica cu in principe no ta facil pa haci locual e ta haciendo pasobra e tin cu demostra su mes ariba mercado y demostra cu locual e ta haciendo ta haci un diferencia y locual el a siña ta cu e caminda pa exito no ta stret pa yega bay na e top. “Bo tin cu siña bo lesnan na caminda si no bo ta keda pega, bo ta keda haci mesun cosnan y mientras bo keda haci mesun cosnan bo ta keda haya e mesun resultadonan y si bo keda haya e mesun resultadonan bo no por sigui, bo no ta bay dilanti”, el a bisa. “Nos ta tuma tur cos ‘one day at a time’. Mi no ta ainda unda mi kier ta, pero si mi ta agradecido di logra loke mi a logra”.

Por ultimo Jerwin a tuma e tempo pa gradici tur persona cu den su bida si un of otro manera yudele yega na unda e ta aworaki den su bida. Y su mensahe pa comunidad ta:

“Nos tur ta skirbiendo nos buki di bida y ora bo bira bieu bo no kier un buki cu arepentimento, bo kier pasa back den bo buki y pasa den tur bo experiencianan di bida y bo kier hari, bo kier yora, bo kier conta y bo kier comparti pasobra den e bida na final ta locual cu bo ta locual cu bo ta laga atras y ta haci bo ken bo ta, na e manera cu nan ta corda bo, kiermen ta un bon hende pa tur hende y pa bo mes”.