Joke di april ta… Refleho di pensamento Hulandes…?

Den un relato inclui den e mesun edicion aki tin un intento bastante humoristico di e portal Hulandes ‘dossierkoninkrijksrelaties.nl’ cu ta dedica atencion na loke ta tuma lugar entre gobernacion Hulandes y e islanan den Caribe, di trece un autentico ‘aprilmop’. Parti principal ta e supuesto deseo di e gabinete nobo Hulandes pa duna e islanan den Caribe un status nobo, di ‘provincia extraordinario’, pa diferencia nan tambe di e provincianan Hulandes. Cerca conocedornan di e materia, tanto na Hulanda como na e islanan, e noticia lo a causa bastante harimento, pasobra ta obvio cu loke ta propone no por, en todo caso no sin consulta y acuerdo previo di e islanan mes y nan poblacion. Pero, banda di un joke di 1 di april, esaki ta refleha talvez cierto pensamento den circulo politico na Hulanda?

Por ta, pero si acaso e gabinete nobo lo bin cu idea cu nan lo kier implementa, nos no tin indicacion cu a consulta cu e gobiernonan di e diferente islanan. No tin ningun informacion di kico lo ta e plan pa e proximo periodo di gobernacion, pero ta inimaginable cu no a papia nada mes tocante e relacion cu e islanan, aunke por ta cu esey no a tuma lugar ainda. Tema di conversacion tin te sobra, aunke no na promer lugar esunnan di semper, manera asunto financiero. Manera discuti na varios ocasion den nos Editorial, a keda pendiente e punto di e deseo Hulandes pa logra un ley di Reino di supervision, pero tanten gobierno di Aruba ta keda bisa ‘No’, na e momento aki cualkier gobierno Hulandes no tin manera pa ‘troce braza’ di gobierno di Aruba, ya cu e supervision ta ancra den un ley local, cu practicamente e mesun contenido cu loke ta proyecta den e ley di Reino. Esey ta implica si cu Aruba, nos anto, ta keda paga e interes halto riba e prestamonan cu nos tin cu Hulanda, cu ta costa nos miyones pa aña. Honestamente, nos no ta mira mucho oposicion entre e demas partidonan contra e posicion aki di e gabinete, y nos mester supone anto cu nan ta tuma esaki como un hecho? Na su debido tempo lo tende mas, pero ban laga e tema un rato pa atende otro.

Kico asina ta otro tema importante, no pa Hulanda so, sino pa nos tambe? Por ehemplo, e garantia di soberania y integridad di henter e teritorio Hulandes den Caribe, es decir, tera y lama. E islanan, y Aruba sigurr, ta ubica den un region di riesgo grandi, principalmente causa pa presencia di crimen organiza internacional, specificamente trafico di droga, y e consecuencianan pa trafico financiero, cu riesgo di labamento di placa y financiamento di terorismo. Awor, algun critico por comenta cu 30 aña pasa nos tabatin e mesun problemanan, anto kico ta e urgencia pa haci algo? E contesta corecto ta cu, si nos kier ofrece un defensa contundente na e peligronan manera nan ta organiza den e era aki, nos mester otro forma di colabora pa enfrenta e sofisticacion mayor riba tereno di metodo di sconde y camufla informacion digital, metodo hopi mas refina den maneho di entidad huridico na diferente teritorio, pa por move recurso financiero rond pa yega unda mester di nan. Nos mester mihor vigilancia riba e teritorio maritimo di Reino, mirando e desaroyo di ultimo añanan, unda nos posicion cerca di e ‘rogue state’ principal di nos region, Venezuela, ta complica e asunto mas ainda. Banda di un exodo migratorio mayor for di Venezuela, den caso di fracaso di eleccion principal, sin un regreso na un democracia parlamentario normal, nos mester observa cu cautela e situacion na Haiti, unda por papia caba di un ‘estado fracasa’, cu por tin hopi consecuencia, no solamente pa e bisiña directo Republica Dominicana, sino tambe pa resto di region, entre nan nos mes. Na momento cu ta bay tin un fluho mas fuerte di migrante Haitiano cu ta huy pa e situacion di caos aya, parti di nan por ‘end up’ cerca nos…

Kico ta anto e urgencia actual den e problematica aki, si ta trata di problema cronico den nos region? Mas cu tur cos, cu e sofisticacion menciona den e manera di opera di rednan internacional di crimen organiza ta haci cu di mes ta casi imposible pa un teritorio chikito por planifica, financia y organiza su proteccion contra crimen organiza riba su mes. Ademas, ban ta franco, 30 aña pasa tampoco nos tabata por, ta intervencion di exterior a pone un paro (parcialmente) na infiltracion di crimen internacional na Aruba. E tarea conhunto cu tin den Reino awendia ta obliga tur partner pa intensifica nan colaboracion. No tin señal ainda di esey? Si, por ehemplo, nos no a caba di haya un suma fuerte di Union Europeo pa digitalizacion completo di administracion gubernamental? Di berdad bo ta kere cu ta haci esey solamente pa nos ‘cara bunita’? E berdad, segun nos opinion, ta cu si no tin mas control y vista riba loke ta move den gobernacion, especialmente e procesonan basico di persona, organizacion y propiedad inmobil, banda di e trafico financiero, ta bira dificil pa garantiza cu nos por duna e cooperacion necesario dentro di Reino y cu otro entidadnan internacional, y di e manera ey nos no por ‘build up’ tampoco nos propio proteccion, si nos ta desea esey…

Kico ta un di e obstaculonan mayor semper? E mentenan chikito cu ta keda hunga e papel di e ‘haan op de mesthoop’, cu ta keda grita ‘autonomia’ envez di asumi nan responsabilidad.