Comunidad no mester keda sorprendi si e cantidad di caso di contagio cu Covid19 sigui subi e siguiente dos simannan. Y ta depende con cada persona ta actua awor, ta depende si ta logra domina e contagio y kizas mira mehoracion aki dos siman. Asina Jurette Croes, vocero di DVG a bisa Bon Dia Aruba.

Aworaki e ekipo di DVG ta trahando duro riba e asina yama ‘contact tracing’ esta pa manda personal papia cu personanan cu a test positivo, y busca su historia pa mira cu ken e tabata, na unda y asina informa tur esnan cu ken e tabata den contacto cune. “E ta sosode manera semper a haci. E personanan cu ta den risico di contagio, mester bay den cuarentena y si nan desaroya sintoma, nan lo mester bay controla.”

Studiantenan Hulanda

E pregunta ta si DVG tin atencion special pa famianan di studiantenan cu a biaha pa Hulanda den fin di siman. Croes a splica cu te ainda e famianan aki no ta rekeri pa drenta cuarentena, pero si en caso nan yiu of familiar cu a biaha den e grupo mester test positivo, anto e ora si e famia mester drenta den cuarentena y haci e testnan.

DVG ta enfatisa cu e responsabilidad pa percura cu no ta keda infecta cu e virus ta keda na cada individuo. Esey ta conta pa local y turista. DVG por bin cu medidanan general, pero na final, “ e ta un decision personal pa tuma e precaucionnan.” Por ehempel, ta test e turistanan ora nan drenta. Si nan ta test positivo, e turistanan mester bay den isolacion. Pero si e testnan sali negativo, algo cu ta e caso mayoria biaha, e responsabilidad ta keda na e turistanan mes pa cuida di contagio. “Nos no por proteha e turista. E mester haci esey su mes. Nos ta crea sistemanan si, protocolnan, pa tur localidad. Tur restaurant y localidad tin su protocol y di e forma aki tur ta yuda. Pero na final e ta keda na cada un di nos, pa no aglomera, tene distancia for di otro y pidi otro pa mantene distancia for di nan tambe.”

Cla pa e reto

E pregunta ta si DVG por atende cu e brote actual. Segun Jurette Croes desde e prome caso na Maart te ora cua logra cu e casonan a baha na cero, mester a trata cu 100 caso di Covid 19. DVG por a anda bon cu e cantidad aki. Pero si e casonan bira hopi mas, e Ekipo di Crisis lo percura pa haya mas hende pa yuda. Y asina por conta cu dokternan di cas, specialistanan cu por keda involucra. Cualkier departamento asigna por keda pon’i na disposicion di DVG pa por combati e crisis aki. “Si mester di refuerso lo acudi na Gobierno, cu e ora por busca esaki na Aruba mes of tambe for di exterior.”

Panico ta na su luga

Tin un sentido di panico awor aki den comunidad. E pregunta ta si esaki ta na su luga? Segun Jurette Croes, e contesta ta si. “Nos tin un cultura unda si no tin panico no ta tuma accion. Esaki ta conta pa henter mundo. Ta ora tin panico ta tuma accion. Esnan cu ta den un sentido di seguridad, nan ta sinti nan mes sigur y no ta tuma paso. Si e ta necesario pa comunidad por realisa e indole di e crisis aki y door di ta den panico nan ta bay proteha nan mes bon, anto si mi ta kere cu e panico aki ta bon pa comunidad.” Pasobra asina kizas tur hende por realisa cu nan mester cumpli cu tur medidanan cu t’ey pa nan propio proteccion.

Shutdown

Aruba na Maart a bay den shutdown caba pa evita cu e contagio sigui. Jurette Croes a bisa cu tur sa kico esaki a produci. E no tabata algo facil. Y un otro shutdown lo ta e ultimo recurso di Gobierno. “Lo purba pa tuma diferente otro medida prome.” Pero pa stop e contagio, ta di djis bolbe tuma e pasonan cu semper a enfatisa riba nan. Y comunidad sa exactamente kico esakinan ta. “Nan ta pasonan conoci cu ta mantene distancia, laba man frecuentemente, evita aglomeracion di hende. Comunidad sa esakinan caba. Awor mester ripiti atrobe. Pa por para e contagio, e persona cu tin e prome indicacion di sintoma, e mester isola su mes y no bay den publico. Nos tin e strategia ‘search and destroy,’ pa test mas hopi posibel pa haya e casonan mas pronto posibel y stop e transmision mesora.

Un cambio compara cu e prome periodo di Covid19 ta cu DVG awor ta traha cu laboratorionan priva, banda di esun di hospital. Tin diferente laboratorio na Aruba, unda personanan por bay haci nan test. Tur ta manda e resultadonan si pa DVG.

E cantidad di caso lo aumenta

Casonan lo sigui aumenta, mirando cu incubacion ta tuma 14 dia, Croes a sigui bisa. Den e proximo simannan lo mira aumento. Pero si aplica tur medida di proteccion, aki dos siman lo mira e resultado di e medidanan. Na momentonan aki, e app cu a desaroya ta pa duna resultado mas pronto posibel, Pero por ampli’e cu otro meta. “E ta djis pa facilita e resultado na tur persona, di forma cu por concentra pa mas riba esnan cu ta positivo. Esnan cu ta negativo no ta haya yamada mas, solamente esnan cu ta positivo cu e ora ta haya instruccion kico pa haci.”

Mientrastanto, DVG ta urgi cada doño di establecimento cu nan tin responsabilidad pa cumpli cune y sigui e protocolnan cu a traha. Ta trata aki di e Health and Happiness Code cu ta medidanan cu Gobierno ta pone pa nan. Nan mester cumpli, pero tambe cada ciudadano tin su responsabilidad pa carga pa proteha su mes y otro.

Y tin medida pa esnan den cuarentena cu no ta keda na su cas y esun mas pisa ta pa esun cu mester a keda den isolacion. “E ta mescos cu e prome periodo. E ta 1000 florin di boet si haya e persona infecta pafo di cuarentena,” Croes a enfatisa.