Dia di Betico a bin te bay, y si e ocasion no a duna tanto comentario y contribucion tocante nos actual situacion como pais, en vista di e logronan haci e tempo aya, y kico realmente nos a haci cu esey, no tin motibo pa keda lamenta unda nos ta awor, y ‘ta ken a entrega autonomia’.

Na e momento aki nos ta algun siman separa di e momento cu atrobe nos situacion, hunto cu e dos otro islanan (Corsou y Sint Maarten) lo ta riba agenda di Conseho di Ministro di Reino. Y contrario na loke tin hende ta kere, e asunto no ta solamente nos presupuesto, ni e protocol cu mester firma pa reemplaza esun cu a caduca na fin di december pasa. E temanan realmente di peso ta, pa Aruba e leynan di Reino cu mester keda introduci pa e structura di supervision por funciona: e ley cu ta regula COHO, y e ley di supervision financiero (Raft). E ultimo aki ta bay reemplaza, pareu cu e ta na vigor, e protocol temporal cu lo mester firma entre awe y e fecha di e proximo reunion di Conseho di Ministro di Reino. No a tende nada ainda di esey.

Y kico ta e urgencia na e momento aki? Dos cos; un ta e urgencia cu gobierno di Aruba tin pa regla e asunto pa por dispone di e recursonan financiero necesario pa sobrevivi e aña aki. E otro ta cu Hulanda ta bastante irita caba cu e tardanza grandi cu e asunto ta mustrando, y esey ta conta pa tur tres isla. Nos ta yegando na maart, dos aña despues di inicio di e pandemia na e islanan cu a paraliza bida economico pa tur tres. E isla mas dependiente di turismo, Aruba, a haya e golpi mas fuerte y tabatin mas necesidad di e ayudo Hulandes. ‘Voor wat hoort wat’, e Hulandesnan a bisa y casi dos aña pasa e gobiernonan insular a bay di acuerdo cu loke ta e ‘trade off’: un restructuracion profundo riba varios tereno, a cambio di ayudo. Pero nan no ta parce tanto interesa pa pone cierto diligencia tras di e asunto. Pakico anto e actitud aki di ‘dragging their feet’? Segun nos impresion pasobra al fin y al cabo no tin voluntad politico pa implementa ningun reforma. Ta parce cu mas bien ta bisa loke mester bisa den relato y rueda di prensa oficial, pero cada oportunidad cu presenta pa tarda e asunto, ta ser gara cu gran gana. Mientras cu di banda Hulandes na nivel politico ta mantene semper e cordialidad y cortesia oficial, di comentario individual di oficialnan Hulandes ta tende mas di e iritacion tocante e lentitud cu e islanan ta demostrando den atende e asuntonan clave. E ultimo entrevista na december cu e anterior secretario di estado na Den Haag, despues di a suspende e reunion di Conseho di Ministro di Reino tabata un bon ehemplo di e iritacion apenas conteni, pa e falta di avance den e asuntonan na e momento ey. Problema principal tabata e progreso cu Hulanda kier mira den aceptacion di e proyectonan di ley di COHO, y pa Aruba tambe esun di RAft. Y ta net aki ta mira con grandi e falta di voluntad ta, unda cada incidente chikito ta ser converti den un oportunidad pa posterga e asunto.

Awor, por argumenta cu e actitud aki no ta nada straño, ya cu e islanan ta entrega gran parti di nan forza di decision propio pa basta aña. Esey ta berdad, pero mester reconoce cu e situacion ta exigi medida extraordinario, cu ningun di e gobiernonan insular lo kier tuma riba nan mes. Anto e ora bo ta haya e situacion straño, comparable cu un persona sinta na banco pa haya un prestamo urgente, anto e ta esun cu ta trece problema na mesa… Lamentablemente nos ta kere cu e Dia di Betico no a sirbi pa un bon reflexion den e asunto aki, y nos lo sigui perde tempo cu e discusion ‘ta ken a entrega nos autonomia’. Un discusion inutil pasobra ta e maneho iresponsable di varios gobierno a crea e base pa e intervencion Hulandes na 2014 caba, y no despues di 2017 manera e partido actualmente opositor kier pa hende kere. E protocol firma na 2018 tabata nada otro cu un consecuencia serio di e situacion cu a surgi despues di decadas di maneho inferior. Cu e consecuencia tambe, cu e actual gobierno, y cualkier cu lo tabat’ey, mester actua segun interes general, y no segun e maniobranan tactico pa trata di evadi e acusacionnan opositor cu ta actualmente lo ta ‘entregando autonomia’.

Den e sentido aki nos ta corda e palabranan corto y sincero di e ex-representante di Aruba den Raad van State, expresa den e dianan di e huelga di hamber, na prensa dilanti Oficina di Gobernador: “Esaki ta e limite di autonomia”. E no a dedica mas palabra na e payasada tumando lugar ey dilanti. Autonomia ta ora bo ta parti di un algo mas grandi cu bo mes. Anto bo por maneha bo asuntonan, no tur tampoco, pero ora bo ‘mess up’, bo a yega na limite di bo autonomia y tin intervencion ‘di ariba’. Y no ta exactamente esey nos tabata desea na 1986? Cu tin un nivel di supervision riba nos mandatarionan? Ken a entrega no ta relevante…

LEAVE A REPLY

Please enter your comment!
Please enter your name here