editorial 2_15_1.jpg

Den su ultimo aviso paga AHATA ta bolbe tira na cara di ministro encarga cu turismo cu e no ta publica e rapport cu supuestamente Price Waterhouse Coopers a traha tocante e tema All-inclusive. Mientras cu no necesariamente un persona mester apoya punto di bista di e gremio aki, por ta completamente den desacuerdo mes, pero mester  duna nan rason den esaki. No por ta asina cu hasta ta referi na e rapport den e Memorie van Toelichting di e proyecto di ley anto ta nenga redondamente di pone disponibel pa esnan cu tin interes den e asunto aki.

Con bo ta desea anto pa un pais conoce procedemento democratico normal, si bo kier pasa ley sin laga otronan sikiera lesa locual bo ta basa bo mes ariba? Kico ta bo miedo, si na final bo tin un coro di aprobacion permanente den Parlamento di 13, sorry 12, no sorry 11… en todo caso, suficiente pa gana e bataya aki? E ministro awor a haya solidaridad incondicional di su Prome Ministro tambe, cu den su afan di apoya hasta ta comete e barbaridad di bisa cu e no mester mira mas rapport, e ta cla cu uno so… Si esey ta e ‘short cut’ cu e kier tuma, bonbini, anto lo tabatin hopi cos cu nos por a regla na otro manera pa gana tempo. Nos  tin duda si cu e proceder aki ta gana premio di  gobernacion drechi.

Pero no ta keda na e caso aki so, ta parce awor cu loke a primera bista ta un acto di  soberbia individual di e ministro aki, a para bira un cancer generalisa den henter gobernacion. Asina a yega na gaba cu e acuerdo cu PDVSA/CITGO a resulta den un monton di papel di dos mil pagina, pero te dia di awe, casi un luna despues, ningun hende a haya un A-4 pa mira. No tin ningun claridad ken a firma kico, pero a laga sa caba cu pa via di compromiso cu e otro partnernan, tur cos mester keda secreto. Loke nan kier duna parlamento ta e proyectonan di ley cu mester pasa parlamento, pero mayoria di e dos mil pagina aki ta keda bon warda. E unico manera pa logra mas transparencia ta si parlamento exigi esaki, pero ta speransa envano pa kere cu e parlamentarionan di gobierno ta bay contra esnan cu ta duna nan di come.

Sinembargo, esaki no ta tur riba e tereno aki. A bin sali na cla cu e idea tabata pa e siman aki trata cambio den Codigo Civil den parlamento, unda un parlamentario cu tin como deseo personal pa promove e causa di e conciudadano homosexual, lo a trece un amienda pa loke ta e registracion di partner, haciendo esaki posibel pa pareha di mesun sexo tambe. Clero catolico a haya sa esaki y a cuminsa accion contra e intencion aki. Esey a haci cu e lider di partido mes mester a bin dilanti pa calma e asunto, declarando cu no ta posicion di e partido pa mishi cu ley di matrimonio.  No ta bay pa tuma parti den e asunto aki, pasobra nos ta biba den un pais liber unda cualkier ta pensa loke e ta haya ta bon. Pero no mester ta asina tampoco cu ta cuminsa ataca e asunto di otro banda, purbando di facilita e ‘geregistreerd partnerschap’ prome, algo cu no ta toca e pareha homosexual so, pero otronan tambe. Ta importante pa señala cu si algun dia ta yega na cambia legislacion encuanto matrimonio, esaki mester sucede abiertamente, ‘de cara al pueblo’ y no via porta patras. No ta necesario pa nos tin consenso den e tipo di asunto aki, esey nunca lo ta e caso, pero si nos mester tin mayoria den e comunidad cu ta apoya e punto di bista cu ta bay pone den ley. Na e momento aki ta mas cu obvio cu den ningun di e partidonan politico representa den parlamento tin un base pa pasa e tipo di cambionan aki.

E tema di matrimonio entre persona di mesun sexo no ta e unico tema cu semper lo haya oposicion fuerte den su contra. Pa hopi aña caba nos tur sa unda y con pa haya un aborto haci. Nos tur sa cu hopi di nos pa motibonan religioso ta rechasa aborto, y cu nan pleno derecho. Y  nos ta anda cu e asunto aki anto den e forma di “don’t ask, don’t tell”. Esey ta haci nos un pueblo hipocrita, loke ta un comentario cu nos a yega di tende? Por ta, y si ta asina e hipocresia ey lo ta mes tanto parti di e realidad cu nos ta biba aden, manera e mayoria di pueblo cu no ta apoya cambio den ley na fabor di e conciudadano di otro orientacion sexual, y tampoco un mayoria den parlamento pa carga un decision asina. Ora ta referi na Hulanda unda tur e cambionan aki si a tuma luga, mester corda cu aya tin un mayoria grandi cu no ta practica ningun religion, por lo tanto ta otro realidad.