8jul, NW, simon gollo (1).JPG

E aña aki e proyecto Nuevo Mundo Festival y Academia un biaha mas lo wordo teni. Aña pasa e violinista Suiso- Venezolano Simon Gollo a bin cu esaki pa prome biaha, unda cu musiconan studiante internacional y local ta bini hunto pa asina haya e oportunidad di siña mas di e canticanan clasico. Pero mayoria di esunnan cu lo ta participa na e festival aki ta di exterior.

 

Segun, Sr. Gollo, e lo kier mira mas talento den musica di Aruba participa na e proyecto aki. E aña aki 82 studiante internacional di 15 pais lo ta presente durante e dos siman di e academia. Aña pasa 59 studiante internacional a participa na e proyecto aki. Aña pasa 1 talento di Aruba a participa na e proyecto aki, y e aña aki un biaha mas e lo participa na esaki. Aruba ta bira un centro academico musical. Mas o menos 100 musico lo ta na Aruba desde 14 te cu 22 di juli. Loke cu pa Sr. Gollo ta haci falta ta e presencia di Arubanonan. “Pa e sala yena cu hende. No solamente pe isla ta un happy island, pero pa ta un isla musical. Mi ta bisando esaki desde cu mi a cuminsa cu e proyecto aki.”

 

Engrandece Aruba

E ta pensa cu e proyecto aki por engrandece Aruba culturalmente pero tambe e lo yuda den turismo y ta educativo. “Pero nada di esaki no por ta posibel si nan no tabata tin un historia pa mas cu 13 aña na Venezuela, unda cu e festival a Nuevo Mundo a bira den un festival di musica di camara na e academia di zomer mas importante na e pais.” Aruba ta duna festival un dimension internacional. Aki na Aruba e proyecto ta

creciendo, unda cu hopi otro porta ta wordo habri.

 

Proyecto ta creciendo

E proyecto aki ta creciendo den compania di hendenan importante di Aruba cu ta representante di scol di musica, specialmente e amabilidad Arubano manera Sr. Clyde Harms, Sr. Gollo a indica. Semper ta importante cu esaki ta un trabou di team. “Mi ta representa e vision artistico cu esaki mester tin cun’e, pero cada un di nos ta aportando algo na e proyecto. E proyecto ta educativo, di cual den futuro nos por desaroya cu hobennan di Aruba.”

 

Artista cu prestigio internacional

Cada dia di e evento aki, segun Sr. Gollo, lo tin artista cu prestigio internacional. Dia 14 di juli proximo, cu ta dia di inauguracion di e di dos edicion di e festival aki na Aruba, lo ta presente e Cuarteto La Catrina. E grupo aki ta consisti di dos musico cu ta toca fio, 1 cu ta toca chelo y 1 cu ta toca viola. Cada anochi lo bay tin personanan cu a gana premionan internacional cu ta representa su pais na nivel internacional, manera Dimitri Belinsky kende ta e artista mas hoben den historia cu a gana e concurso Competencia Internacional di Violin Paganini. Pa nan e competencia aki ta manera un copa mundial, el a indica.

 

No ta pa haya placa y bay

“Nan ta artistanan cu tin un cello mundial. Y nan ta artistanan cu ta bin Aruba cu e idea cu Aruba ta bira un centro di musica internacional. No un espacio di benta musical. No a haci e evento aki pa produci ticket, pa bende T-shirt,” el a sigui bisa. E evento aki ta pa hendenan Arubano sinti nan mes orguyoso di ta biba na Aruba. Pero tambe pa turistanan ora nan yega aki, nan por bisa cu Aruba ta hopi diferente cu cualkier otro isla den Caribe. “Mi ta kere cu e festival aki lo contribui na esey y hopi mas.”

 

LEAVE A REPLY

Please enter your comment!
Please enter your name here