Home Editorial Kico mester ta nos maneho di refugiado?

Kico mester ta nos maneho di refugiado?

240

Den nos edicion di ayera un di nos editornan a bay riba e tema di refugiado (Venezolano) y loke gobierno ta mira su dilanti, pa maneha e situacion. E preguntanan haci na nos prome minister a indica nos cu tin diferente aspecto na e asunto aki, y trata tur aki ta bira dificil. Pues nos ta scoge un par di nan cu a atrae nos atencion. Pa cuminsa e definicion di ‘refugiado’. Ki ora un persona ta bira refugiado formalmente y na ki momento e ta un persona cu a logra drenta nos teritorio di manera ilegal? En corto bisa, pasobra nos no ta bay por trata tur aspecto, un refugiado ta un persona cu a haya su mes forsa pa huy for di su pais, sin posibilidad pa regresa. Esaki pa motibo di por ehemplo persecucion politico, cu temor pa su bida; tambe situacion di violencia generalisa cu ta causa tambe temor pa bida. E persona aki, tan pronto cu e yega e otro pais, ta duna di conoce cu e ta considera su mes un refugiado, y no un simpel persona indocumenta, y e pais recipiente ta inicia e proceso di duna refugio temporal na e persona, y cuminsa cu e proceso di atende e peticion di e persona pa obtene asilo. Naturalmente por rechasa e peticion tambe.

Asina leu cu nos sa, no tabatin hopi persona cu a yega aki y a reclama e status di refugiado. Naturalmente nos tur ta mira cu preocupacion cu loke awe ainda nos ta considera persona indocumenta, di un momento pa otro por bira un fluho di persona cu no solamente segun nan opinion, pero obhetivamente por considera un refugiado, y nos mester atende nan. Den esey nos por siña bastante, manera nos minister presidente a observa corectamente, di nos bisiñanan Colombiano cu mester atende un problema sumamente grandi, di cien miles di persona cu ta caba den nan teritorio, y tur dia ta yega mas. Ta di spera cu e situacion cerca nos no yega asina leu, pero mester ta prepara. Nos ta prepara?

Aparentemente tin preparacion andando. Nos a confronta prome minister cu e dato cu nos a ricibi di un persona oficial, cu a menciona e cifra di 6,8 miyon florin pa luna, pa atende 500 persona. Un suma cu ta parce exagera, na prome instante… Pero ban haci un calculo acerta pa sa kico nos ta papiando aki. Un suma di 6,8 miyon pa 500 persona, ta Afl. 13.600,- pa luna, pa persona. Pa dia, conta riba 30 dia pa luna, ta un suma di Afl. 453,- pa dia. Esaki ta hopi exagera? Nos no ta sigur, asina ta ban mira kico por ta hinca den e suma aki. Prome asunto: ken ta percura pa un dak pa e personanan aki? Nos ta paga Lotto pa Deporte un cierto suma pa huur un di nan facilidadnan, manera a menciona caba esun na Santa Cruz? Nos no ta desea di haya un cantidad di yamada di ciudadano preocupa; comprende cu esaki ta djis un ehemplo. Cuanto esey por costa? Nos no sa pasobra nan como fundacion lo no tin experiencia cu esaki, pues kico por ta rasonabel. Pero nos tin cifra di pasado si. Asina nos sa cu algun aña atras Rode Kruis tabata cobra gobierno Afl. 250,- pa persona pa dia, pa keda un tempo limita, si nos no ta hera tres dia, den nan shelter. Cu nos a comprende, un dado momento gobierno mes a stop cu e practica aki, pasobra nan tabata haya esey hopi placa. Por ta cu e organisacion tin un splicacion aceptabel pa e suma, pero esey ta desconoci pa nos actualmente. Pero en todo caso, aki mas di mita di e 450 florin por tin un clarificacion.

Ta bin acerca e mobilisacion di hende extra pa atende e emergencia, cu talbes parcialmente por recluta for di servicio publico, cu tin un salario caba. Ta bin acerca tambe tur tipo di extra material cu ta necesario, cu honestamente nos no por tin un bista completo ariba. Esey ta trabao di esunnan envolvi profesionalmente den e esfuerso aki. Pero, en todo caso, nos por bisa cu hasta si e suma ta exagera, y nos por hacie pa mita di e placa, ainda e ta un suma cu nos no tin un banda poni, just in case. Si nos a sigui e acontecimentonan di e pais aki bon, e unico cos cu tin na abundancia den banda poni ta… debe.

Y kico tur esaki ta implica? Nada mas y nada menos cu dia cos yega asina leu, nos lo sa di comporta nos mes manera mester ta. Si di berdad nos ta haya nos mes cu un grupo di hende cu a huy pa por keda na bida, nos ta mustra e civilisacion cu nos mester tin y ta atende e asunto cu profesionalismo, y calor humano. Ohala nunca nos lo ta den e situacion den cual nan ta pasando awor. En todo caso, loke nos ta bay gasta cu nan, ta peanuts compara cu loke nos mes ta desperdicia na placa publico anualmente. Sikiera nos sa na kico a gast’e e biaha aki.