Kico ta e acusacion concreto di Merca contra Tareck El Aissami

Gobierno di Merca a pone Tareck El Aissami riba lista di persona relaciona cu trafico di droga. Dialuna Departamento di Tesoro di Merca a bisa cu ta considera El Aissami un persona importante den trafico internacional di droga.”

Diamars El Aissami a defende su mes di acusacionnan riba su twitter @TareckPSUV “dilanti di infamia y agresion for di imperio: 1- Moral Intacto 2. Mas firmeza y conviccion anti-imperio 3. mayor consciencia CHAVISTA”, El Aissami a skirbi. “Mi ta ricibi miserabel agresion aki, como un reconocemento pa mi condicion di revolucionario anti- imperio!! Venceremos”, el a bisa. Pero, kico ta e acusacion concreto di banda di gobierno di Merca contra e Lumber dos di gobierno di Nicolas Maduro?

Acusacionnan
Segun comunicado di OFAC (Office for Foreign Assets Control), El Aissami a facilita pa manda hopi carga di droga pa Merca pa via aereo y maritimo for di Venezuela. El Aissami a duna proteccion na otro narcotraficante tambe. “Concretamente El Aissami a haya placa pa facilita e transporte di droga cu tabata propiedad di Walid Makled Garcia, narcotraficante di Venezuela”, OFAC a bisa. Makled a ser deteni na Colombia y extradita pa Venezuela na 2011, pa motibo cu el a traha un operacion grandi di trafico di droga cu supuesto colaboracion di halto funcionario di gobierno di Venezuela. Awor e ta cumpliendo un condena di 14 aña den prizon.

Tareck El Aissami ta asocia tambe cu coordinacion di “envio di narcotico” pa e cartel Los Zetas, y cu proteccion pa varios capo di narcotrafico di Colombia y Venezuela yama Daniel Barera Barrera y Hermagoras Gonzalez Polanco. OFAC a bisa tambe cu El Aissami tabata controla avion cu tabata lanta desde un base aereo na Venezuela y otro caminda cu a usa varios narcotraficante pa transporta droga desde diferente puerto di Venezuela. “Den su funcion y na varios momento El Aissami a supervisa envio di narcotico di mas di mil kilo for di Venezuela, y algun di nan cu destino pa Mexico y Merca. Tambe nan ta kere cu El Aissami tabata un di e doñonan di cargamentonan ey” OFAC a bisa.

Testaferro
Departamento di Tesoro a bisa cu nan ta kere cu Jose Lopez Bello, Venezolano ta testaferro (representante) di El Aissami. Lopez Bello ta duna asistencia material, apoyo financiero y servicio na tur actividad di narcotrafico internacional.” Gobierno di Merca a identifica 13 empresa cu ta controla pa Lopez Bello cu presencia na Venezuela, Merca, Islas Virgenes Britanico, Panama y Reino Uni.