Minister Marisol Lopez Tromp ripitidamente a menciona cu el a pasa un investigacion di antecedencia hopi riguroso, prome cu el a por a huramenta como Minister na Januari 2020. Durante e reunion publico di 31 di juli, 2020 Sra Lopez Tromp a manda un mensahe cla pa tur mandatario cu su persona mester a somete su mes na un investigacion cu nunca prome otro ministernan a pasa den dje y cu esey ta forma e base di su maneho. Y cu esey tambe ta hunga un rol pakico e ta tuma e casonan di Serlimar y DIP asina na serio.

Na Aruba, e proceso di revision di antecedente ta basa riba ley cu ta dirigi e trabou di Seguridad Nacional. E ley a conoce diferente cambio, y e articulonan ta reparti riba diferente publicacion. E investigacionnan riba antecedencia ta keda secreto y no por keda publica na ningun momento.

Bon Dia Aruba den e caso aki ta repasa e splicacion di Hulanda.

TOM

Un di e aspectonan importante ta si e persona, pues candidato pa Minister no tin un papel di bon conducta. E pregunta aki tabata interesante pasobra comunidad por corda ainda e confrontacion fisico entre ex-Parlamentario Chris Dammers y drs. Marisol Lopez Tromp cu a bira un problema penal.

Na 2018, Ministerio Publico a informa sr. Dammers cu e ta liber di tur acusacion, y cu a yega na un areglo cu Marisol Lopez Tromp. No a publica e resultado di e acuerdo cu drs. Lopez Tromp ni cu Sr. Dammers. Den caso cu a uza e sistema di TOM zitting, cu ta Transactie Openbare Ministerie e lo no tin efecto riba e capacidad di Lopez Tromp pa bira Minister, mirando cu esaki no tin refleho riba su asina yama ‘strafblad.’

Un TOM zitting ta trata casonan cu ta castigabel, pero no ta casonan penal grave. Huez no ta presente. Fiscal mes ta trata e caso cu no ta un cargo pisa, si en caso e ta considera cu esaki practicamente proba. E Fiscal por impone e ora un boet. Pero tambe e por dicidi pa seponeer, esta laga e caso un banda, temporal of no, si no tin suficiente prueba. Durante un session di TOM, Fiscal ta haci pregunta riba situacionnan personal.

Y esaki ta di vital importancia si un persona por bira Minister. Pasobra un di e aspectonan crucial ta e investigacion di antecendente ta netamente un analisis di tur e casonan penal cu un candidato lo por tabata envolvi aden of no, y si mester a presenta dilanti un huez. Un TOM ta implica cu esey no tabata e caso.

Estado di Derecho

Tambe seguridad nacional ta haya autoridad pa investiga tur organisacion y persona cu e candidato pa Minister ta relaciona cune, pa determina si nan por ta forma un peliger pa estado di derecho, siguridad of otro interes di pais Aruba.

Departamento di Impuesto tambe ta analisa e dossier fiscal di e candidato y ta duna su opinion riba e comportacion fiscal. E servicio ta menciona si tin eventual aspecto fiscal cu por nifica risico. E cifranan concreto sinembargo ta keda limita pa ehecutivonan di e departamento.

E resultado di e investigacionnan, ta bira parti di e combersacion cu e candidato, kende mester pone tur su funcionnan paga y no paga un banda. Por sigui cu un otro funcion, pero cu permiso di formado of Minister President. Minister Marisol Lopez Tromp den e caso aki a sigui cu su programa informativo Voices and Choices. Pero en todo caso, e no por tin e minimo indicacion cu tin conflicto di interes, ni pa su casa, den caso cu nan ta den e convenio di matrimonio di biennan comun. Si investigadonan ripara cierto risico cerca e pareha, of casa, nan ta nota esaki tambe. Na Hulanda por ehempel, un Minister di Finanzas cu tin accion (shares) den fondonan di inversion publico ta considera un risico. Como tal e mester tuma tur medida pa kita e risico aki. Por ehempel, sea e mester bende, of tuma distancia di cierto contratonan. Lo por pone propiedadnan bou maneho di un fundacion unda cu no tin famia ta den e directiva.

Tampoco e Minister, unabes huramenta, ta permiti pa crea otro negoshi of actividad financiero cu ta contra e rekisitonan aki.

Integridad

Tambe ta haci un analisis di e estado di salud di e futuro Minister pa mira si e ta fisicamente capaz pa carga cu e responsabilidad pisa.

E candidato tambe tin cu conta di tur caso of hecho di su pasado cu por tin un influencia negativo riba funcionamento di dje como un Minister y cu por trece henter e gabinete den problema. E ley di Aruba por ehempel ta bisa cu ta revisa si e persona no lo stroba e estado di derecho, integridad di maneho publico y siguridad of interes general di Aruba. Mester bisa cu esaki ta e punto cu Minister Marisol Lopez Tromp a keda enfatisa durante e reunion publico.

LEAVE A REPLY

Please enter your comment!
Please enter your name here