(TMZ) – Kim Kardashian ta critica su ex pareha Kanye West despues cu el a papia publicamente tocante Kim su sex tape y creando rumornan cu e tabatin un relacion cu Drake tras West su lomba.
Durante e prome episodio di e tercer temporada di “The Kardashians”, Kim tabata conta Kris Jenner con “agota” e ta di lidia cu su ex pareha su comportamento, bisando cu el a plama e rumor cu e tabatin un relacion cu Drake, cu ken Kanye tabatin problema.
Algun tempo atras, Kanye West a papia di Kim su famia y amistadnan pa varios siman riba rednan social, criticando nan y plamando rumor. No solamente el a ataka Pete Davidson, ken tabata pareha di Kim den e tempo aki, sino tambe el a haci comentarionan racista contradi Trevor Noah, cual eventualmente a causa e suspension di West riba Instagram.
Durante e tempo aki, Kanye West tabata haya un victima nobo practicamente tur dia, sinembargo Kim a permanece su victima principal. Algo cu tabatin peso comprendibel riba e mama di 4 yiu. Tambe e tabata publica videonan acusando cu Kim ta mantene e muchanan scondi for di dje, algo cu tampoco tabata berdad,
Kim a expresa cu Kanye, ken durante un tempo tabata yama su mes Kim su protector awo ta haciendo lo contrario, incluyendo haci comentarionan tocante Kim su sex tape cu Ray J di varios aña atras. El a agrega cu tur e “storianan loco” cu e ta papia ta birando algo comun, pero tambe e ta kere cu tur esaki lo tin un impacto mas fuerte riba nan yiunan compara cu loke e sex tape lo tin. El a bisa cu te hasta Kanye a purba di aproba loke Kim lo bisa tocante su persona riba e programa, cual claramente Kim no a permiti.
Recientemente Kim a expresa cu ta haci su maximo esfuerso pa mantene tur e drama leu for di su 4 yiunan pero tambe a admiti cu e ta yora hopi ora di drumi pa causa di e desafionan cu e ta enfrenta cuidando pa su yiunan.
