WEB Aruba NV lo haya un dirigente nobo, pasobra e dos directornan cu tabat’ey te ayera, a dicidi cu nan ta bay. Esey ta e informacion cu por saca di e comunicado di prensa di e compania madre Utilities Aruba NVden cual a anuncia cu a yega na un acuerdo cu e dos directornan. E comunicado tabata skirbi den un Papiamento pesimo, un berguenza pa un compania asina. Ta di spera cu e calidad di e texto no ta refleha e forma di traha den e compania, esey si lo ta mal noticia.

En todo caso, tin un acuerdo cu ta mara ambos partido na mantene e contenido di e convenio di retiro confidencial, loke ta garantiza cu den un empresa estatal no tin mester di duna cuenta na e berdadero doñonan di e empresa, cu ta nos, Pais Aruba. Nos por anticipa cu e tipo di secrecia aki ta continua, pasobra nos no ta mira nada ta cambia den e cultura administrativo di sector gubernamental y semi-gubernamenta. Keto bay ta tratando nos como si fuera Aruba ta un sorto di CIA, unda ta duna informacion limita, ‘on a need to know basis’.

Pa simannan largo nos ta tende tur tipo di rumor di descontento cu e maneho actual, tanto di e directornan como di e compania matriz, pa cu e asuntonan strategico, manera e cambionan cu mester tuma lugar den e uso di combustible fosil den forma di heavy fuel oil (HFO) loke mester por haya reemplazo den forma di gas natural liquido (LNG). Lamentablemente di ningun banda ta haya sa kico exactamente ta e problemanan unda aparentemente tin diferencia di opiniontocante e strategia aki. Awor, no comprende nos malo. Diferencia di opinion no mester ta algo negativo, pero por yuda clarifica tur aspecto cu cual mester tene cuenta y den e sentido ey por amplia e panorama, y ta yuda establece meta a mas largo plazo mas balanza y saludable.

Y ta exactamente den e tereno ey nos ta awor, no solamente pa loke ta toca WEB mes, pero den un sentido mas amplio: kico lo ta nos futuro a mediano y largo plazo pa loke ta nos suministro di dos cos asina basico manera coriente y awa. Y ta aki cu e contestanan riba e preguntanan clave mester bin. Si ta kita director pasobra no gusta nan cara, manera a sucede algun aña atras cu un director cu e ministro di e momento ey no tabata haya ‘comunicativo’ o cu tin cosnan mas serio cu mester keda tapa pa comunidad, anto nos lo bisa ‘que sea asi’ pero de paso cuminza duna abiertamente cuenta kico ta e maneho strategico ey. Y naturalmente esey no ta toca solamente e compania WEB so, ni solamente e cupula di Utilities, no, esaki ta toca maneho di e actual y proximo gobierno. Y aki si no tin awa pa laba, no por simplemente bisa nos cu esey tambe ta keda un secreto bon warda di e companianan. Y ya cu nos no ta tende nada, y nos no ta bay perde tempo tampoco cu carga speranza cu lo bin contesta a corto plazo, nos ta trata di ilustra pa nos mes kico ta e asuntonan strategico cu mester clarifica awor.

Pa cuminza, e asunto di cambio strategico di tipo di combustible, o tipo di energia cu ta usa pa opera e planta. Pa hopi aña caba no tabatin tanto cambio den e set up fundamental di e produccion di awa y energia electrico. Despues di introduccion di e molinonan di biento na Vader Piet, cu a sucede anterior na aña 2009, pa nos no mester bay den e otro discusion inutil ey, di ken a ‘percura’ pa esey, no a mira tanto cambio mas. Nos tin algun parke solar di cual tin ta opera , otro no, pero basicamente mas di 80 porciento di suministro di coriente ta bin di kima HFO. Bao di gobierno anterior a contempla e uso di LNG pa WEB, y esaki a resulta den nada. Principalmente pasobra sin un refineria pa tuma como 75% di e gas natural pa su cuenta, WEB su so a resulta un cliente demasiado chikito pa por logra esey.

Awor, durante e actual gobierno – demisionario – a bin riba e briyante idea cu lo por renoba e ‘fata morgana’ di e anterior gobierno, creando atrobe e imagen ‘color de rosa’ di tanto un refineria como WEB operando riba gas natural. Ta parce cu nan ta conta riba cu nos tin un perdida colectivo di memoria, y nos a haya e siguiente ronda di charlatan cu ta purba convence nos gobierno cu nan lo percura pa gas natural, na un prijs conveniente, y terminando e dependencia di HFO pa semper, loke riba su mes lo ta hopi bon. Pero como cu no ta bay tin refineria, nos ta bolbe pega riba e realidad cu WEB su so ta demasiado chikito pa LNG na un prijs aceptable. Unico manera pa nos sali di e asunto aki ta cu ta obliga tanto e companianan, como tambe e actual y futuro ministro di energia, pa conta nos na un forma coherente y creible, den ki rumbo nos ta bay. Kita director, pone director, no ta e issue. Bisa nos ‘de una vez por todas’, unda nos ta bay cu energia renovable.