KYPA (Kiwanis club of Young Professionals Aruba) a bin dilanti cu programa pa asina stimula e muchanan cu ta studiando pa hisa nan cifra di scol y mantene esaki cu motivacion di haya un recompensa.

Iliën Hernandez, Presidente di KYPA a splica cu nan a bin cu programa nobo pa mucha unda cu nan kier studiante participa mas den estudio y nan kier duna premio of reconoce e studiante pa asina nan mantene nan cifra na un cierto nivel.

Di e forma ey tambe nan por pone nan meta dilanti y duna e studiantenan honor. Un sistema cu Merca tin tambe cual nan ta yama e ‘honor system’. Esaki ta encera cu ora un mucha tin cierto cifra cu nan a mantene pa cada rapport nan ta haya un premio pa esaki.

“Esaki ta e iniciativa mirando cu mucha ta hopi den telefon, den tecnologia. Ta tempo pa trece dilanti cu nos kier duna un premio pa e mucha tin e sintimento cu e ta haciendo algo bon y ta haya algo. Tin cu bisa si nos no ta premia bo pa bo siña, tin cu pone meta pa e mucha mes siña”, Hernandez a bisa.

Pero nan kier pa e keda entre maestro cu muchanan, ‘cu nan por pone un meta dilanti’. Si un ta bisa cu no por cu rekenen anto otro mucha si ta bon den e materia, e ora un por yuda otro den esey.

Un studiante por stimula e otro pa mantene of subi nan cifra den e materia. Asina ambos por bay dilanti, traha riba dje y wak con ta logra. Nan kier pa Departamento di Enseñanza, mayornan stimula y organisacion cu ta den e veld pa wak e programa aki. Nan kier yudansa y cuminsa cu algo.

“No tur ora mayornan ta bay ta presente of tin tempo pa yuda nan yiu. Dus e mucha mester stimula su mes pa bay dilanti. Pasobra mayornan por yuda te cu un nivel pero despues ta keda na e mucha mes pa traha”, Hernandez ta splica.

Hernandez ta bisa cu responsabilidad di un mayor ta keda pa semper. Sinembargo tin mayor cu ta keda para tras di nan yiu, tin cu ta bay bijles, scol cu por yuda nan, pa e mucha bay dilanti. E ta comparti cu tin mucha den habilidad, arte den construccion y mester keda stimula e mucha pa locual nan por ‘e ta a base di nan’.

Dos scol ta bay cuminsa cu e programa: Fatima College y Pius X School. Nan tin algun cu ta interesa y di eynan tin manera pa trece otro scol tambe hunto cu e muchanan. Nan kier tambe pa mayornan duna mas atencion pa yuda nan yiu y lo tin e recompensa na final.

Pa 2020 nan tin e programa traha y lo pasa rapport di con e mucha ta, riba kico el a cuminsa traha y na kico e mucha tin cu enfoca. Den kico nan ta bon of kico nan kier hisa den nan materia pa nan rapport. Tambe si nan ta cumpli pa locual nan a bisa nan tin cu haci.

Segun Hernandez pa e muchanan cu ta menos bon tambe por wak y nan por traha riba locual nan kier yega of e logro. Si nan traha tambe nan ta obtene nan recompensa. Nan tin cu mantene y purba hisa e cifra tambe.

Habri pa traha cu cualkier scol.
Pa cualkier scol cu ta interesa y kier pa yega na programa tambe por tuma contacto cu KYPA riba Facebook. E scol tin cu bay acuerdo cu e programa y despues ta keda na mayor pa keda tras di nan yiu pa logra e meta.

Hernandez ta bisa cu e programa tambe ta pa inspira e mucha pa nan traha mas duro y nan sa cu tecnologia no ta malo pero ta importante pa pone cabes na scol pasobra ta esey ta locual ta yuda den futuro.

Tin mucha awendia cu por haya e cifra halto pero no ta tuma e tempo pa haya e cifra manera mester ta. Ora un mucha kier traha riba algo e por ta pa un rato intensivo cu no mester telefon, television of cualkier distraccion presente cu por afecta e estudio di e mucha.