Si Gobierno di Aruba a mustra cu e tabatin necesidad pa sosten adicional, CAFT lo por a haci un evaluacion y pidi Gobierno di Reino mas cu e 204 miyon florin. Pero lo por a haya e fondonan unicamente si a firma e acuerdo pa e dos rijkswetten. Asina Secretario di Estado, Raymond Knops a bisa ayera den un conferencia di prensa, yama na Hulanda pa atende cu locual el a yama ‘sorpresa’ di e tono di Aruba.

Segun Knops, el a keda sorprendi di a tende Prome Minister Evelyn Wever Croes acusa Hulanda di a bin cu condicion adicional pa e di tres tranche y a nenga esaki rotundamente.

Knops a cuminza pa bisa medionan di comunicacion di Aruba, ademas di como 200 otro persona cu a sigui e conferencia di prensa, cu te cu siman pasa, e negociacionnan cu Aruba tabata bay den bon esfera. Y ta p’esey e expresion di Prome Minister Evelyn Wever Croes no a cay den bon tera .

El a ilustra e proceso di e proposicion di Hulanda, unda tabata kier pa, entre otro, Aruba a firma dia 10 di juli ultimo pa acepta e condicionnan di e dos rijkswetten – cu ta bay pasa e supervision financiero di Aruba na nivel di Reino y tambe e creacion di e Organo di Reforma y Recuperacion, OHH cu mester implementa e asina yama landspaket pa Aruba. Aruba no a bay de acuerdo riba 10 di juli pa acepta e condicionnan. “E prestamo di likides no ta un obligacion, pero ta basa riba di 0 porciento di interes. A cambio, gobierno lo mester haci su esfuerso pa maneho y finanzas drecha, pa bolbe duna perspectiva na hendenan di Aruba.”

Prome Minister Wever Croes indica di kier bay den deliberacion pa mira bao cua condicion Aruba lo por bay di acuerdo cu e proposicion. “Mi a reuni mesora cu Prome Minister y di banda di Gobierno di Hulanda, Minister Hoekstra tabata presente, pa wak con pa soluciona e problemanan cu Aruba tin. E intencion tabata pa por a sali di e diferencianan den dos siman. A papia tanto riba nivel di Gobierno como di ambtenaar. Pero no a sali afo.”

Aki ta unda a bin e discrepancia den interpretacion di e necesidad financiero. Prome Minister Evelyn Wever Croes a informa Bon Dia Aruba e mesun dia cu mientras cu ta bay negocia cu Hulanda, lo usa reservanan cu tin, pero cu e mes lo a spera di firma mas lihe posibel.

Hulanda no a cambia condicion

Knops a sigui bisa cu tur e combersacionnan tabata den un bon esfera. P’esey mes e tabata un sorpresa di a tende e tono di e conferencia di Prensa di Prome Minister di 10 di september. Esta cu a bisa cu Hulanda a cambia e condicionnan riba su mes y cu door di esey, Aruba a haya su mes den mas problema financiero. “Locual nos a palabra cu e di tres tranche lo sucede pa lunanan september te cu november. Pero prome cu esey sucede, mester di un acuerdo cu te ainda no a logra. Si no logra un acuerdo, no por apela na un palabracion di pago.”

E Secretario di Estado a bisa cu Aruba a mustra di por a cumpli cu su obligacionnan financiero pa lunanan di juli y augustus, y cu e tabata pendiente un acuerdo pa e rijkswetten, prome cu manda di e tres tranche di 204 miyon.

“Pa pone esaki awor comosifuera cu Hulanda unilateralmente a cambia e condicionnan no ta corecto. Ora cu trece cambio, esaki ta sucede a base di un evaluacion di CAFT, cu ta mira e posicion agudo di likides y kico lo mester pa por continua e siguiente tres lunanan. Nos a palabra cu e tranchenan ta pa cada tres luna. Esey ta nifica tres luna for di momento cu ta yega na un acuerdo, y cumpli cu condicionnan. Nos a constata cu Aruba a cumpli cu su obligacionnan financiero y como tal ta logico cu e 204 miyon florin lo keda pa despues. Aruba no a reacciona riba esey, y no a haci ni e pregunta con por haya e fondonan na un manera mas lihe.”

Pues, e tabata sorprendi pa e tono, pero tambe e reclamo direccion di Hulanda di no ta cumpli cu e palabracion. “Esey no ta berdad. Mi kier bisa para aki, cu mas lihe yega na un acuerdo, mas lihe Aruba cumpli cu e condicionnan di e di tres tranche, mas lihe ta haya e suma cu mester. Y e suma cu mester ta determina pa CAFT. Y si Aruba ta haya cu e suma no ta suficiente, Aruba ta liber pa pidi CAFT pa haci su analisis y presenta esaki na Hulanda y nos punto di salida ta cu nos lo otorga un prestamo cu ta cumpli cu e necesidadnan financiero cu tin.”

Prestamo tin consecuencia pa Aruba

Raymond Knops a bisa cu e clarificacion aki ta importante, pasobra den e ultimo dos lunanan a sigui papia cu Aruba den un esfera hopi agradabel y “e tono di siman pasa tabata di un otro tipo.” Particularmente ora el a tende cu Aruba lo busca prestamo, y manera el a mustra na prome instante, riba mercado internacional. ”Mi no ta compronde completamente con, ya cu ta bay aki pa un porcentahe cu ta hopi mas halto compara cu e prestamo di 0 porciento di Hulanda.” Pero Knops a bisa cu e mes no sa exactamente riba e asunto, ya cu ta informacion cu e ta haya di medionan di comunicacion. “Formalmente, ainda e no ta cla pa mi. E consecuencianan di e decision aki no ta pa Hulanda, sino pa Aruba mes. Si ta presta a cambio di 5.5 porciento en bes di 0 porciento, e ta limita e presupuesto di Aruba mes.” Knops ta haya cu asina ta traha contra beneficio di comunidad di Aruba si ta bay fia otro caminda, en bes di tuma e prestamo di Hulanda a cambio di 0 porciento.

Negociacion ta riba detaye, no e rijkswetten

Locual a yama atencion sinembargo ta cu tanto Prome Minister, Evelyn Wever Croes y Secretario di Estado, Raymond Knops ta papia di negociacion. Pero Prome Minister di Hulanda, Mark Rutte a bisa hopi cla cu Hulanda no ta negocia. Riba e punto aki, Knops a bisa cu no ta negocia e dos rijkswetten. Esey ta e condicion di Hulanda. Hecho ta cu e acuerdo mester ta basa riba ley. “Nos a bisa cu e varios cien miyon, cu por hasta yega na biyones, depende con largo Covid dura, mester tin responsabilisacion p’e. Ta placa di belasting di Hulanda cu ta bay ta maneha pa un entidad. E acuerdo mester tin e base huridico unda tur e paisnan y Hulanda mester acorda. Esey ta e punto crucial y ta keda asina.”

Hulanda tabata y ta dispuesto pa negocia cu Aruba riba cierto puntonan den e pakete pa mira con por acomoda mas hopi posibel e deseonan di Aruba. “Esey a yega na ahustacion concreto. Mi no ta bay den detaye kico nan ta, pasobra e consenso ta bin te ora cu e Gobiernonan ta di acuerdo cu otro. Pero mi por bisa cu riba hopi punto di Aruba, a yega na ahustacion cu ta hacie mas aceptabel pa carga pa Aruba. Sinembargo pa bisa cu e ta un negociacion habri, unda tur cos ta discutibel, anto e contesta ta no. E necesidadnan ta mucho halto. Tin un problemanan grandi, un falta di likides de inmediato. Nos mester wak na un cos, esta con nos kier haci cos bon pa e ciudadanonan di Aruba y Hulanda kier yuda den esaki. Pero nos no ta bay pone varios 100 miyon na disposicion sin cu nos tin bista con ta bay usa e fondonan aki. Un parti ta prestamo, otro ta e reduccion di gasto di prestamo cu ta yuda presupuesto di Aruba.

Mehoracion di perspectiva pa Aruba

E pakete pa Aruba ta dirigi riba mehora perspectiva pa Aruba, cu ta un combinacion di rebaho di gasto, Knops a sigui splica. “Nos a duna e oferta di reduccion di gasto di interes riba prestamonan cu Aruba tin. Ta trata di un suma di 80 miyon na interes cu ta paga tur aña. Eseynan ta medionan cu Aruba lo por usa pa inversionnan y reforma, cu ta nifica cu tin rosea y ta duna perspectiva na Gobierno mes, pa den un tempo cu mester reforma un cantidad di asunto, manera aparato publico, cobramento di belasting, alabes tin espacio pa inverti den asuntonan cu ta importante pa Aruba mes.”

Knops a bisa cu e landspakket pa Aruba berdad ta contene puntonan cu Gobierno di Aruba mes a indica di kier logra. “Casi no tin diferencia den opinion. Tabata net e Gabinete Wever Croes cu a anuncia pasonan, pero cu ainda no a keda implementa. Pero no tin discusion riba esey, pasobra bao expertonan tin consenso kico tin su beneficio y desbentahanan pa economia. Y como tal tambe tin un consenso pa gran parti riba e landenpakket cu no ta inventa pa Hulanda, sino ta locual e pais mes a bisa di lo kier. “

Autonomia

Knop a considera e nocion cu Hulanda, pa medio di e entidad, ta comete un golpi di estado como un disparate grandi. “Grote onzin,” e Secretario di Estado a bisa. “Ta mescos cu nos kier mishi cu autonomia di Aruba. Esey no ta e asunto. Claro cu e storianan ey ta bay rond y mi mester bisa di aki cu eseynan ta disparatenan grandi. Locual si ta asina, y ta parce cu algun hende no kier reconoce esey, ta cu tin problema grandi na Aruba. Cu Aruba particularmente no por haci prestamonan pa motibonan di debenan halto. Y riba dje a bin e crisis di Covid. Y nos kier yuda aki. Nos ta duna ayudo humanitario, medico, cu ta regalonan di Hulanda y ta costa miyones. Y nos kier duna prestamo basa riba condicion. Y nos ta pidi un cos, esta cu locual por bay miho, manera administracion publico, finanzas, berdad ta sucede.”

Raymond Knops a agrega cu e bunita tabata cu net Aruba a cumpli cu e condicionnan di e prome y di dos tranche, y a cuminza cu e reformanan. “Esey tabata e tononan di e negociacionnan di ultimo lunanan.” Knops a puntra esnan cu ta argumenta cu e posicion di Hulanda ta afecta autonomia di Aruba, cu si nan bay banco, nan tambe mester cumpli cu yen di condicion. “Nos no kier mishi cu autonomia di Aruba. Nos kier cu Aruba realmente duna contenido na autonomia cu awor ta riba papel so. Pasobra Aruba ta para cu su lomba na muraya, y no por sigui asina.”

Condicionnan ta mara na fecha

Den e pakete di condicion ta menciona fechanan unda Aruba mester percura pa leynan ta na luga. Pero ainda esakinan no ta asina. E pregunta pues ta, si Aruba no por cumpli cu tur condicion segun fechanan stipula, kico ta e posibilidad pa e sosten. Segun Knops, door cu a spera di a yega na un acuerdo dia 10 di juli, e lo a nifica cu e prestamonan por a cuminza tuma luga, y e preparacion di e entidad riba papel tambe lo por a inicia. Y hunto cu esey, cuminza prepara e aspectonan legislativo cu e parlamentonan. “Mas lihe Aruba bay di acuerdo, mas lihe e trabao por inicia. “Mi ta kere cu e ta na interes di Aruba pa bay di acuerdo cu e sosten cu no ta solamente placa, pero tambe conocemento, posibilidad pa atrae capital internacional aden y inverti den Aruba.”

Conseho di Minister di Reino lo determina con largo e oferta aki lo keda warda riba Aruba. Ainda no a pone un limite di fecha. “Pero ta mira si cu mas largo e dura, mas problema Aruba ta haya. E situacion no a mehora desde 10 di juli. Esey ta implica si cu por bin otro medidanan for di Aruba mes, cu no ta bon pa economia. E ta na interes di tur pa yega na un palabracion.”

Knops ta sigura cu e relacion cu Prome Minister, Evelyn Wever ta keda bon. A keda cu bon contacto, incluso ora di yuda na nivel di salud publico, por ehempel. “Esey no kiermen cu semper ta di acuerdo. E relacion a confronta dificultad debi na e conferencia di prensa siman pasa, pero ainda tin negociacionnan entre e teamnan negociado.”

Pero na final di dia, e pregunta mester ta, kico ta e interes di e pais. “Kico ta e interes pa Pais Aruba, su hendenan, su empresanan y su economia. Kico ta den interes di e generacion nobo, hendenan cu awor ta jong, pero den futuro mester carga e sociedad.” Segun e Secretario di Estado pa Asuntonan di Reino tin biaha mester discuti e forma con ta maneha asuntonan. “Nos no ta haci esaki na interes di Hulanda, tampoco pasobra nos kier mina Autonomia di Aruba. Al contrario. Nos kier pa Aruba por carga completamente su autonomia y nos ta haci esaki particularmente na interes di e pueblo di Aruba.”

 

LEAVE A REPLY

Please enter your comment!
Please enter your name here