Cruz Cora Aruba ta extende su programa di asistencia di cuminda na famianan mas vulnerabel. Kende ta cay den e clasificacion di mas vulnerabel pa yuda? Segun nan criteria, esunnan cu a perde nan entrada door di e pandemia di Covid-19.

Ayudo

E organisacion humanitario aki lo incrementa su esfuersonan na Aruba y enfoca riba yuda famianan den necesidad cu e-vouchers pa cuminda y cuminda cayente pa esunnan cu no por cushina, specialmente pa e hendenan di edad halto of cu algun sorto di limitacion.

“Hopi famia ta pasando den momentonan dificil durante e crisis di Covid-19. Desafortunadamente, e crisis aki no ta mustra di ta na su final por lo pronto na Aruba…” segun director di Cruz Cora Aruba, Sr. Michel ta Haye.

Hefe di Operacion, Marketing y Evento di Cruz Cora, Indra Anthony-Pereira a indica na Bon Dia Aruba cu nan prome fase a caba. Practicamente nan ta cuminsa nan di dos fase awor te luna di december cu e programa aki di Covid. Te ainda niun hende sa kico lo bay pasa despues di 31 di december. Esey ta un incertidumbre ainda pa Cruz Cora Aruba. Sin duda e ayudo di Hulanda ta grandi, no solamente pa maneha e programa aki hunto cu e demas islanan, pero tambe cu apoyo di personal. Pa maneha un proyecto grandi asina, nan ta hayando ayudo for di exterior pa por maneha cu nos hendenan tur e parti operacional y logistico di e programa aki.

E prome fase di e programa di ayudo aki, Cruz Cora a entrega 4500 famia e-vouchers. Aparte di e-Voucher, nan a reparti mas cu 51 mil cuminda cayente media pa personanan cu no por cushina. E criteria pa e tipo di ayudo aki basicamente ta e mesun pa ambos. Den e caso aki si e persona por cushina, e lo haya e-Voucher pa bay haci su compra. E suma di e-Voucher ta depende di e tamaño di e famia. E ta entre 358 florin pa 950 florin destina pa cubri cuminda y productonan di higiena pa 1 luna. Nan ta evalua despues si e persona of famia mester ainda di e sorto di ayudo humanitario aki.

E ayudo aki ta bira realidad danki na e ayudo financiero cu Minister di Asunto Interior y Asunto di Reino di Hulanda ta canalisa y monitor e fondo disponibel pa Cruz Cora Hulanda cu ta wordo distribui pa e sedenan di Cruz Cora di Aruba, Corsou y St. Maarten. Den e prome fase Cruz Cora Aruba a ricibi e cifra di 10 miyon florin. Pa e di dos fase ainda e suma no ta precies conoci. Cruz Cora Aruba no ta haya ayudo financiero di CEDE Aruba, sino cu Cruz Cora ta yuda nan den e programa di reparti cuminda cayente durante e prome fase. Den e fase aki, Fundacion Pa Nos Comunidad tabata partner cu Cruz Cora pa reparti pakete di cuminda.

Registracion

Awor den e di 3 periodo di registracion, a ricibi mas cu 6000 peticion nobo. Constantemente nan hot-line ta ocupa cu preguntanan riba nan asistencia humanitario.

Anthony-Pereira ta corda cu den e prome siman nan a cera cu 3 mil peticion. Den e dos siman ey, nan a haya mas cu 6 mil peticion. Nan no ta habri pa publico pa siguridad di nan mesun hendenan tambe, ya cu si nan kier sigui brinda nan servicio y continua cu nan operacion, nan mester cuida nan. Niun hende ta permiti pa subi tereno di Cruz Cora, si bo no ta trahando eynan.

Den e di tres periodo di registracion haci via online, Cruz Cora a haya mas cu 6000 peticion pa ayudo. Esaki ta un cantidad hopi grandi y ta tuma tempo pa procesa. Un team di boluntario ta haci entrevista cu video-call diariamente pa por evalua e situacion di cada persona cu a haci peticion. Den e di dos fase aki, ya caba nan a parti 500 e-Voucher diaranson ultimo. Den e di dos fase, Cruz Cora lo enfoca mas riba e e-voucher, ya cu esaki ta un metodo sostenibel y digno pa asisti famianan pa un periodo largo.

El a declara na Bon Dia Aruba cu cada persona cu a haci un peticion ta wordo yama y nan caso ta wordo papia y evalua dor di un team. E persona cu ta entrevista esun cu ta solicita pa ayudo, no ta parti di e team di evaluacion cu ta discuti cada caso. “E no ta depende di un hende,” el a bisa.

Documento ta wordo exigi, entre otro pa comproba cu e persona aki no ta trahando. Nan tin un contacto visual pa medio di entrevista cu un cantidad di pregunta, te hasta nan ta wordo bishita, si ta necesario. Nan tin un team di boluntario cu ta realisa e trabao aki for di mainta te anochi. No ta cuestion cu e persona ta aplica y e ta bay haya ayudo. “No! Tur caso ta wordo evalua pa e criteria cu nos implementa.”

E criteria mas grandi ta cu e persona of famia cu ta haci un aplicacion mester a perde su entrada principal directamente pa motibo di Covid. Ya cu esaki ta un Covid Response Program, y nan mester atene na esey. El a bisa cu Cruz Cora kier yuda tur hende, pero nan mester pone un criteria pa nan por cumpli cune.

Pero considerando cu hopi hende a perde entrada pa motibo di Covid, tin otro exigencia cu mester cumpli cune a base di nan criteria. Pa nan esunnan cu ta haya prioridad ta personanan na estado, menor di edad, persona di edad y persona cu limitacion. Pero uno principal ta cu nan ta duna prioridad na personanan cu no tin un asistencia di un otro organisacion.

Cruz Cora ta consciente cu tin hende cu ta purba tur caminda pa haya sosten, pero esaki ta kita e posibilidad cu otro hende cu necesidad lo por haya e ayudo humanitario aki cu si mester di dje. Nan tin cu pasa dor di e filter aki pa por yega na e persona mas vulnerabel.

Criteria y evaluacion

Cruz Cora sa cu tin critica cu ta wordo haci via social media di hendenan cu a solicita pa ayudo, y nan no a wordo honra. Mientras cu otro persona local of no local, si a wordo honra. Pero di otro banda tambe tin hendenan cu sa di aprecia y balora e trabou humanitario cu Cruz Cora ta bin realisando cu nan team di boluntarionan memey di e pandemia aki.

Cruz Cora tin principionan fundamental mundial di etica pa brinda su ayudo humanitario. Esun mas importante ta esun di yuda esnan mas vulnerabel sin distincion di rasa, religion of nacionalidad. Pa Cruz Cora no ta haci niun diferencia ken a pidi e ayudo. “E caso mester ta cualifica pa haya ayudo.”

Cuanto solicitud di hende local wordo honra compara cu esunnan di afo residencia na Aruba? El a abstene di menciona cifra porcentual pa no viola e principio di no haci distincion di nacionalidad. E no ta un cifra cu Cruz Cora por duna como instancia humanitario. Sinembargo e no kier papia di mayoria, pero si hopi hende migrante a aplica pa e ayudo humanitario aki. Pues e migrantenan ta un gran parti di e ayudo cu Cruz Cora ta duna na Aruba.

El a splica cu e hecho cu nos como Arubiano por haya ayudo for di otro instancia, entre nan di departamento di Asunto Social, unda nos por haya ayudo, pasobra nos tin e derecho ey, bo no ta cumpli cu nan criteria. Tambe eventualmente bo por tin pension tambe. Pero si bo no tin niun manera di entrada of ayudo, ya sea Arubiano of no, naturalmente e persona aki ta cumpli cu e criteria basico aki di Cruz Cora.

E criterianan ta puntonan cu nan mester tene na cuenta ora cu nan ta wordo evalua kendenan ta esun mas vulnerabel pa ricibi ayudo humanitario. E ta haya cu e ta un proceso nada facil pasobra cada caso ta diferente. Igualmente mester tene cuenta cu nos hendenan tin hopi berguensa pa pidi ayudo. Esey ta pone manera cu e mayoria di ayudo ta pa migrante, siendo cu e no ta asina. “Pasobra nos Rubiano ta keto. Si nos ta pidi ayudo ta cu hopi berguensa. Y si nos hay’e niun hende no sa,” el a declara.

 

LEAVE A REPLY

Please enter your comment!
Please enter your name here