2017-11-15 00:00:00 DEN HAAG - Staatssecretaris Raymond Knops tijdens de behandeling van de begroting van Binnenlandse Zaken en Koninkrijksrelaties in de Tweede Kamer. ANP BART MAAT

Secretario di Estado Hulandes pa Asuntonan Interno y Relacion di Reino, Raymond Knops a mustra optimismo durante e tratamento di presupuesto di Relacion di Reino 2021, tocante e negociacionnan cu Aruba y Corsou relaciona cu sosten di likides.

Knops a laga cla cu no tin acuerdo ainda, pero e señalnan tabata bon y tabatin urgencia pa yega na un acuerdo. “E situacion ta hopi critico. Mas largo dura, mas complica e ta bira.” Negociacionnan cu St. Maarten ainda ta para pasobra e pais no a cumpli cu e condicionnan di segundo tranche ainda.

E impacto di e pandemia di coronavirus riba Hulanda Caribense y e sosten di likides pa e tres pais tabata topico di hopi discusion durante e debate diamars. Parlamentarionan di Tweede Kamer a puntra tocante e rol di Hulanda, status di e negociacionnan y espacio pa maniobra den e negociacion.

Parlamentario Nevin Ozutok di GroenLinks a propone duna parlamentonan di Aruba, Corsou y St. Maarten mas poder den e proceso di toma di decision pa establece e Entidad di Reforma Caribense (CHE). Ozutok tabatin un mocion cla pa esaki, pero riba conseho di Knops, el a bay di acuerdo pa wanta e mocion mientras ta warda e resultado di e procedura actual.

Knops a splica cu na e etapa aki no tin rol pa parlamento di Hulanda Caribense, pero cu despues nan lo por duna nan opinion durante tratamento di e propuesta di rijkswet den Tweede Kamer.

Parlamentario Antje Diertens di D66 a puntra tocante e posibilidad di permiti persona di sector priva di e tres pais den e CHE, na luga di solamente personanan nombra pa gobierno Hulandes. El a destaca cu tabata importante pa crea mas sosten pa CHE.

Knops a bisa cu e personanan den CHE lo ser nombra pa minister Hulandes di Asunto Interior y Relacion di Reino, pero cu esaki lo tuma luga den consulta cu e tres pais. El a bisa cu nan lo mester ta persona cu experiencia den sector publico y priva, y cu un sentido pa Hulanda Caribense.

E secretario di estado a sugeri cu tin espacio pa negociacion. “No ta un situacion di ‘take-it-or-leave-it, manera a bisa. Nos ta papiando cu e paisnan pa mira si tin elemento- y puntonan cu e paisnan kier mira diferente”, el a bisa.

Den general, Knops a mustra positivo tocante e negociacionnan. “Mi no ta pesimista. Ta un tiki dificil na dado momento.” Tocante e acusacionnan cu Hulanda kier tuma over of recolonisa e islanan, Knops a enfatisa cu no tin ningun agenda pa haci esaki.

Tweede Kamer a expresa preocupacion tocante St. Maarten den e proceso pa negocia mas sosten di likides. “Mi no sa mas kico pa haci cu St. Maarten. Mi ta bao impresion cu e isla ta flotando mas leu di nos”, segun parlamentario Chris van Dam di CDA. “St. Maarten ta famia, pero famia cu bo casi nunca ta mira mas”, segun Ronald van Raak di SP.

Knops a nota cu tin contacto cu St. Maarten, por ehemplo riba cumplimento di ley, e prison y reconstruccion, pero cu e pais mester cumpli cu e condicionnan di segundo tranche prome cu por cuminsa negociacion pa e di tres tranche.

Parlamentario Roelof Bisschop di SGP a puntra si e retraso aki lo tin un efecto adverso riba Aruba y Corsou, pero Knops a bisa cu esey no ta e caso. “Nos ta papiando cu tres pais individual y esey ta nifica cu na dado momento, e trayectorionan no lo cana paralelo.”

Knops a bisa cu no lo ta responsabel pa warda te cu cera un acuerdo cu e ultimo pais, pasobra e necesidad ta hopi grandi, y no ta bon idea pa warda varios luna.