Gobierno Argentino a suspende lesnan presencial pa via di casonan positivo di Covid-19 un siman despues cu aña escolar a cuminsa. Na dos luna y mey cu ta falta pa lo finalisa e aña escolar aki, autoridadnan educativo a autorisa e reapertura di scolnan na varios districto cu poco risico.

Loke a adelanta un anuncio oficial, adolescentenan a uni nan bos cu ta pidi pa nan bay bek na scol: 72% di nan a manifesta cu nan ta desea esey, segun un encuesta realisa pa Unicef y Google.

E datonan ta basa den e contesta di 852 adolescente entre 14 y 19 aña cu ta sigui e lesnan di forma virtual na distinto provincia di Argentina. Autornan di e rapport a aclaria cu no ta un muestra representativo, pero cu nan resultado ta den mesun linea cu otro estudionan importante.

Studiantenan ta celebra e flexibilidad di orarionan cu ta permiti enseñansa virtual (54%) y e incorporacion di recursonan digital nobo (21%), pero loke ta mas dificil pa nan ta pa mantene contacto a traves di un pantaya cu nan compañero (39%) y cu docentenan (22%).

Unicef ta traha hunto cu Gobierno pa elaboracion di protocolnan cu lo permiti un reapertura mas sigur. “Nos sa cu lo bin bek un scol diferente” Cora Steinberg, specialista den educacion di Unicef a adverti. Segun e tambe a anticipa, e plannan ta contempla un regreso gradual cu modalidad mixto: encuentro presencial cu gruponan chikito di alumno y e mantenemento di lesnan na distancia.

Conseho Federal di Educacion, diahuebs ultimo a aproba e indicadornan nobo cu lo defini e regreso na scolnan cu lesnan presencial y a habilita pa cada provincia pa defini e fecha den caso di cumpli cu e rekisitonan.

 

LEAVE A REPLY

Please enter your comment!
Please enter your name here