2017-10-03 16:57:07 DEN HAAG - Raymond Knops (CDA) tijdens het debat over het fatale ongeluk met Nederlandse militairen in Mali. Tijdens een oefening ontplofte een mortiergranaat, waardoor twee Nederlandse militairen verongelukten en een derde militair zwaargewond raakte. ANP BART MAAT

Tin un Minister di Integridad cu mester percura cu no tin conflicto di interes

No ta na Aruba so tin pregunta riba e imagen di Gabinete Wever Croes II cu ta papia di integridad, apesar cu no por exclui cu varios di e Ministernan tin relacion familiar cerca cu otro. Na Hulanda e tema a bin dilanti di parti di Machiel De Graaf di PVV. E miembro di Tweede Kamer a puntra Secretario di Estado Raymond Knops si por hiba un combersacion cu Aruba riba e cultura di maneho.

E parlamentario a puntra esaki den luz di locual e ta considera conflicto di interes den Parlamento y cu ademas “ainda tin tres Minister cu e fam Croes den Gobierno.”

E pregunta a bin durante tratamento di presupuesto pa Asuntonan Interior y Relacionnan di Reino 2021-2022 den Tweede Kamer.

Na e ocasion aki, Secretario di Estado Knops a bisa cu “tur Minister di Gabinete Wever Croes a pasa door di screening. Tambe a nombra un Minister cu ta responsabel pa integridad, cu entre otro tin e responsabilidad cu no tin conflicto di interes denter di Gobierno y Conseho di Minister. Esakinan ta bon desaroyo. Sinembargo, e ta crucial cu ta keda pone atencion riba maneho. Pesey mes, den cuadro di e landspakket ta mira ampliamente riba con pa fortifica un maneho publico cu ta bon y integro,” tabata e contesta di Secretario di Estado Knops.

AZV

Raymond Knops tambe a atende cu diferente otro punto di preocupacion di parti di miembronan di Tweede Kamer, entre otro, riba cua ta e logica tras di e condicion cu a impone riba Aruba pa prome recorta 60 miyon florin den cuido di salud, pa despues traha riba calidad di cuido. E pregunta aki a bin tambe di e mesun Parlamentario di PVV, Machiel de Graaf. Knops a bisa cu e structura di costo y calidad di cuido no necesariamente ta mara na otro. “Cuido di salud na Aruba ta menasa di ta bira impagabel. Apesar di advertencianan continuo di IMF, AZV y CAft, no a tuma medidanan pa percura cu cuido ta keda pagabel.” P’esey, e Secretario di Estado a ripiti, cu a pone como condicion prome cu a duna e di dos sosten di likides na Mei 2020, basa riba conseho di CAft,  cu Aruba tin e tarea pa recorta 5 miyon di gasto den cuido tur luna. Cu e paso aki ta fortifica e pago di cuido y presupuesto di Aruba di forma sostenibel, segun Knops. Pero, e paso aki no ta nifica cu e mester bay a costo di mehoracion di calidad. Locual e ta nifica cu cuido mester bira mas eficiente y ta evita cuido cu no ta medicamente necesario, por ehempel door di saca remedinan cu por cumpra sin receta, for di e pakete,” e Secretario di Estado a ilustra. “Tur esakinan ta pasonan cu ta scapa placa sin cu ta afecta e calidad di cuido.”

Belasting

Parlamentarionan Hulandes ta haya hopi informacion di e islanan, pero no sa kico ta berdad of no. Segun de Graaf ta tende di casonan di Friends & Family cu no ta paga belasting, amigonan cu ta keda dispensa di paga belasting, y mescos ta conta pa companianan, hotel y casinonan.  Aukje de Vries di VVD tabata specifico den su pregunta: “Hendenan cu si por mustra cu nan a paga belasting, no por haya e datonan di e pago den administracion. No por ta asina cu Hulanda ta duna placa y e islanan ta haci un desaster di maneho financiero. Ki tempo lo por mehora y soluciona e puntonan aki?

Raymond Knops a bisa cu e tema di maneho financiero y cumplimento di belasting ta uno importante, y ta condicion pa un Gobierno cu ta funcciona bon. Pa tal motibo mes a palabra riba modernisacion necesario di Servicionan di Belasting, pa nan por ta capacita pa ehecuta e cobramento na forma adecuado. Banda di esey, simplificacion di e cuadro fiscal ta necesario. E ta importante cu ta reparti e belasting di forma husto y percura cu tur hende ta paga nan ‘fair share’ pa asina contribui na futuro financiero fuerte di e paisnan. E tarea di reforma aki ta compleho y ta pidi pa determinacion politico,” tabata e contesta di Raymond Knops.

El a sigui bisa cu ta trahando caba riba e tereno y refiriendo na Aruba, Knops a bisa cu ta siguiendo e pasonan pa reforma den SIAD y ta trahando pa corta den e retrasonan den cobranza  y otro procesonan.

LEAVE A REPLY

Please enter your comment!
Please enter your name here