Benta y compra di productonan online mundialmente y na Aruba ta enfocando pa cuminsa paga belasting

Director di Departamento di Impuesto (DIMP) Luenne Gomez Pieters ta duna di conoce cu diabierna ultimo tabata un dia hopi grandi y importante no solamente pa Aruba pero e paisnan cu ta asocia cu e organisacion internacional pa desaroyo economico y cooperacion.

Den e organisacion aki tin un cantidad di 136 pais cu a bay di acuerdo pa tin un impuesto minimo di 15% na momento cu ta trata servicionan online.
E no ta un secreto mirando cu na Aruba y internacionalmente ya caba a debati riba e parti aki unda cu ta mira cu e economia digital ta hopi dificil pa por sa unda lo mester paga impuesto debi cu e ta bende servicionan diferente na diferente pais y na diferente hende rond mundo.

Esaki no ta conta pa tur e multi internationals manera Amazon, Google , Netflix , Microsoft ect ect . Esakinan ta companianan cu tin un entrada 20 milliard euro bay ariba of 750 miyon bay ariba y cu nan ta cay den e categoria cu nan ta aplica e impuesto minimo di 15%.

Actualmente tin 136 pais cu a bay di acuerdo cu e iniciativa aki y awor ta den e fase cu lo mester bay wak con lo hink’e den nos leynan local. “Nos tur sa cu Aruba ta actualmente bezig tambe cu reforma fiscal y e ta cay den e mesun liña di trabao cu mester atende cu ne. E paisnan cu ta asocia cu e organisacion aki a bisa cu nan ta desea di implementa esaki pa 2023. E ta poni cu den 2022 e trabaonan mester sosode unda cu lo mester mira na unda e entradanan aki lo mester keda aloca y cua grandura di impuesto lo cay pa cada pais.

Segun Director di DIP, aki ta bin e rancamento di siboyo na unda cu Merca antes no tabata mucho interesa pa tin un impuesto den companianan grandi asina’ki. Sinembargo por a mira cu awor si a tuma nota cu Merca tambe ta desea di firma den e organisacion. Den un situacion asina ta haya cu cada pais tin cu paga nan fare share unda cu transparencia fiscal ta algo hopi importante. No ta solamente e homber chikito tin cu paga su inkomstenbelasting y su grondbelasting, pero e companianan grandi cu tin nan entradanan bruto door cu tin diferente structura.

Nan ta duna servicio na diferente pais cu kisas no conoce un belasting, pero cu ta uza un structura di antes manera Panama, Virgin Island cu no conoce un winstbelasting.

Ta paisnan cu bo ta wak unda aworaki tin un presion hopi halto riba cada pais pa por forma parti di iniciativanan asina. Esaki debi cu ta toma nota cu internacionalmente tur compania y tur contribuyente individual ta paga nan fare share na impuesto.

Pa Aruba mes despues di e reunion di diabierna lo mester bay sinta hunto y traha hunto. Sinembargo ya caba Aruba tabata pensando pa implementa esaki den leynan existente manera BBO of introduccion di un BTW cu posiblemente pa tin un tipo di areglo tambe.

Unda cu ta brinda e servicio online, e compania mester registra su mes p’asina Aruba mester controla e leynan internacional. Pero tambe kico ta e ley cu e otro paisnan ta cumpli cu ne y evalua kico ta e posibilidadnan pa pone den nos propio leynan aki na Aruba. Sinembargo Aruba ya caba ta trahando riba leynan den reforma fiscal cu ta pega su mes na e landsbesluitpakket di Aruba.

Aruba ta un di e paisnan chikito cu ta asocia su mes na e organisacion aki, pero tin paisnan grandi cu tambe ta den dje. Sinembargo e paisnan grandi ta para hopi fuerte tras di e organisacion menciona, manera Francia y Merca.

Tin paisnan manera Kenia, Nigeria, Pakistan y Srilanka cu no a firma e acuerdo aki, pero tur hende ta pensa cu den un lapso di tempo cortico tambe lo cuminsa firma. Tin algun pais un poco reserva na momento cu ta trata e porcentahe unda cu ta duna di conoce cu e porcentahe di 15% ta hopi halto. Tambe tin e discusion cu si e 15% ta keda pa den futuro e no lo subi.

Den e reunion cada pais a haya chens pa duna nan opinion y mas cu 600 persona tabata riba zoom y na Aruba pa 6 or di mainta mester a subi zoom debi cu e reunion a tuma luga na Paris.

Pa Aruba mes e negoshinan online ta keda controla. Departamento di Impuesto ta controla Facebook, Google y corant, pero tambe sa cu hopi propaganda ta pasa via di whatsapp y ta tuma nota cu e contribuyente no ta registra na Departamento di Impuesto, pero DIMP lo registra nan y lo manda nan formulario di impuesto pa nan por paga y esnan cu no ta pagando por haya nan mes confronta cu un boet.