Ta mustra cu e boto La Cumanesa, las Piedras a yega Aruba diamars den careda di 12 or marduga cu algun persona ilegal aden. Esaki tabata cu durante patruya personal di Kustwacht hunto cu Polis maritimo a topa cu e boto aki pega den seco pariba di Baby Beach na santana di cacho.
Di biaha a bati alarma y aki a cuminsa cu un buskeda grandi den area di Sero Colorado unda patruyanan policial a participa na e buskeda aki tambe. Den area di santana di cacho e oficialnan a tuma nota di algun vest y marca di pianan muha cu ta sali for di lama, ta mustra cu tabata algun persona a baha for di e boto aki, ta desconoci cuanto nan ta y ningun a keda gara.
Ta mustra cu e personanan aki sa unda pa sconde di tur e casnan cu tin bandona y luganan den mondi. Por a tuma nota cu tabatin paña di hende den e boto unda nan a kita esaki pa drenta lama cu menos peso riba nan curpa, e boto tabatin tres motor y tuma esaki a keda tuma den beslag. Despues di algun intento personal di Kustwacht y Polis a logra saca e foto for di lama cu ayudo di Takelwagen y asina a laga destrui e boto completo cu tur cos aden.
No por descarta kico a bay robes cu e radar no a capta e boto aki drentando awanan teritorial di Aruba. Esaki ta duna señal den casonan asina mas departamento di husticia e.o K9 Unit, Douanne, Guarda Nos Costa tin cu drenta accion tambe pa asina gara e ilegalnan aki y frena e problematica. Debi cu ta e personanan aki pa haya cuminda pa nan come ta hayanan ta comete ladronicia y of atraco riba persona.
